អន្តរជាតិ
បោះឆ្នោតមីយ៉ាន់ម៉ា៖ បក្សប្រឆាំងត្រៀមខ្លួនរួចរាល់ក្នុងការប្រជែងបក្សកាន់អំណាចលោកស្រី ស៊ូជី គណបក្សសហភាពបង្រួបបង្រួម និងអភិវឌ្ឍន៍ (USDP) ដែលជាបក្សប្រឆាំងធំជាងរបស់មីយ៉ាន់ម៉ា បានប្រកាសពីភាពរួចរាល់ក្នុងការចូលរួមប្រកួតប្រជែងជាមួយនឹងបក្សកាន់អំណាចសម្ព័ន្ធជាតិដើម្បីប្រជាធិបតេយ្យ (NLD) របស់លោកស្រី អ៊ុងសាន ស៊ូជី ក្នុងការបោះឆ្នោតសលនាពេលខាងមុខដ៏ខ្លីនេះ។ ម្តងនេះ បក្សប្រឆាំង ប្រកាសថា មិនឲ្យអ្នកគាំទ្រខ្លួនខកចិត្តឡើយ។
អ្នកនាំពាក្យបក្សសហភាពបង្រួបបង្រួម និអភិវឌ្ឍន៍ មីយ៉ាន់ម៉ា លោក Thein Tun Oo នៅថ្ងៃទី៣១ ខែកក្កដា បានអះអាងថា បក្សរបស់លោក គឺជាបក្សនយោបាយតែមួយគត់ ដែលមានធនធានដើម្បីជួយបេក្ខជនរបស់ខ្លួនក្នុងយុទ្ធនាការបោះឆ្នោត។ ហើយបក្ស ក៏មានការរំពឹងមុតមាំក្នុងការប្រកួតប្រជែងជាមួយនឹងបក្សកាន់អំណាចបច្ចុប្បន្នដែរ។ នេះបើយោងតាមការចុះផ្សាយរបស់សារព័ត៌មាន Myanmar Times។
តាមប្រភពព័ត៌មានដដែល អ្នកនាំពាក្យបក្សប្រឆាំងរូបនេះ បានបន្តថា បេក្ខជនរបស់បក្សលោក នៅមិនទាន់មានតួលេខច្បាស់លាស់នោះទេ ក៏ប៉ុន្តែគណបក្ស បានបើកចំហរចំពោះបេក្ខជនទាំងចាស់ និងថ្មី ដែលមានសមត្ថភាពហើយអាចតំណាងផលប្រយោជន៍របស់ប្រជាជនក្នុងមណ្ឌលដែលខ្លួនឈរឈ្មោះបាន។ លោក សង្កត់ធ្ងន់ថា ពលរដ្ឋដែលបោះឆ្នោតឲ្យបេក្ខជនរបស់លោក នឹងមិនស្តាយក្រោយឡើយ។
ខណៈបង្ហាញការខកចិត្តដោយសារតែភាពមិនប្រក្រតី និងមិនតម្លាភាពក្នុងយុទ្ធនាការបោះឆ្នោត មន្ត្រីជាន់ខ្ពស់បក្សប្រឆាំងដដែល ក៏បានបង្ហាញពីសក្តានុពលមួយរបស់លោក ដែលបក្សកាន់អំណាចមិនទាន់ធ្វើបាន។ នោះគឺ លោកអះអាងថា បក្សលោក នឹងផ្តល់ជួយបេក្ខជនក្នុងការចំណាយលើយុទ្ធនាការបោះឆ្នោត តាមចំនួន ដែលច្បាប់កំណត់។
គួររម្លឹកបន្តិចថា បក្សសហភាពបង្រួបបង្រួម និងអភិវឌ្ឍន៍ គឺជាអតីតបក្សកាន់អំណាចមួយរបស់មីយ៉ាន់ម៉ាផងដែរ។ បក្ស ដែលត្រូវបានគេមើលឃើញថាបង្កើតឡើងក្រោមការផ្ចុងផ្តើមដោយយោធានេះ បានដឹកនាំរដ្ឋាភិបាល បន្ទាប់ពីមីយ៉ាន់ម៉ា បញ្ចប់របបយោធាផ្តាច់ការ រហូតដល់ឆ្នាំ២០១៥ ដែលជាពេលបក្សសម្ព័ន្ធជាតិដើម្បីប្រជាធិបតេយ្យ លោកស្រីអ៊ុងសាន ស៊ូជី បានឈ្នះឆ្នោតជាមួយនឹងសំឡេងគាំទ្រលើសលុប។
សម្រាប់ការបោះឆ្នោតមីយ៉ាន់ម៉ា ដែលគ្រោងធ្វើឡើងនៅខែវិច្ឆិកាខាងមុខនេះ បក្សសម្ព័ន្ធជាតិដើម្បីប្រជាធិបតេយ្យ ដែលជាបក្សកាន់អំណាចរដ្ឋាភិបាលបច្ចុប្បន្ន មិនសូវមានការព្រួយបារម្ភពេកទេ។ ទោះបីជាបក្សនេះ មិនទាន់បានធ្វើអ្វីសម្រេចការសន្យាដូចជាកសាងសន្តិភាព និងកែរដ្ឋធម្មនុញ្ញយោធាជាដើមនោះ បក្សនេះ នៅតែរំពឹងថា ទទួលបានជោគជ័យ ដ្បិតប្រជាជនមីយ៉ាន់ម៉ា មានក្តីប្រាថ្នាចង់ឃើញ លទ្ធិប្រជាធិបតេយ្យពេញលេញរបស់ប្រទេស៕
Tag:
មីយ៉ាន់ម៉ា
បោះឆ្នោត
© រក្សាសិទ្ធិដោយ thmeythmey.com