COVID-19
ជាតិ
COVID-19៖ កម្ពុជារឹតត្បិតការចេញចូលជាមួយវៀតណាមដើម្បីទប់ស្កាត់ការឆ្លងជាសហគមន៍
សម្តេចឧបនាយករដ្ឋមន្ត្រី ស ខេង និងលោក ម៉ម ប៊ុនហេង រដ្ឋមន្ត្រីក្រសួងសុខាភិបាល
×![]()
ភ្នំពេញ៖ ក្នុងលិខិតដាច់ដោយឡែកពីគ្នា កាលពីថ្ងៃទី៣១ ខែកក្កដា សម្តេចឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ និងលោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ-១៩ បានណែនាំទៅអភិបាលរាជធានី-ខេត្ត ឲ្យបង្កើនសកម្មភាពត្រួតពិនិត្យការចេញចូលនៅច្រកព្រំដែនជាមួយវៀតណាម ក្រោយប្រទេសជិតខាងមួយនេះ រីករាលដាលឆ្លងកូវីដ-១៩ជាសហគមន៍ ដែលចេញពីខេត្តដាណាង។
សម្តេចឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ ណែនាំទៅអភិបាលខេត្ត ជាពិសេសប្រធានគណៈបញ្ជាការឯកភាពខេត្តជាប់ព្រំដែនជាមួយវៀតណាមឲ្យពង្រឹងការគ្រប់គ្រង ត្រួតពិនិត្យនៅរាល់មធ្យោបាយដឹកជញ្ជូន និងអ្នកដែលធ្វើដំណើរតាមជ្រកព្រំដែនកម្ពុជា-វៀតណាម។ លើសពីនេះ សម្តេចក៏ជំរុញឱ្យមន្ត្រីនៅតាមមូលដ្ឋានបន្តណែនាំ និងផ្សព្វផ្សាយអំពីជំងឺ-១៩ ដល់ប្រជាពលរដ្ឋ ជាពិសេសអ្នកដែលរស់នៅជាប់ព្រំដែន។
ជាមួយគ្នានេះ លោក ម៉ម ប៊ុនហេង បានអំពាវនាវឲ្យប្រជាពលរដ្ឋទាំងអស់ដែលរស់នៅតាមបណ្ដាខេត្តជាប់ព្រំប្រទល់ប្រទេសវៀតណាមអាចផ្អាក ឬពន្យាពេលធ្វើដំណើរទៅប្រទេសវៀតណាម ជាពិសេសនៅតំបន់ដែលកំពុងមានការរាតត្បាតនូវជំងឺកូវីដ-១៩នៅក្នុងសហគមន៍ ប្រសិនបើពុំមានការចាំបាច់។
រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ-១៩ ក្រើនរំឭកដល់អាជ្ញាធរពាក់ព័ន្ធ ជាពិសេសបណ្ដាខេត្តដែលនៅជាប់ព្រំប្រទល់ប្រទេសវៀតណាមដូចជា ខេត្តកំពត ព្រៃវែង ស្វាយរៀង ត្បូងឃ្មុំ ក្រចេះ មណ្ឌលគិរី តាកែវ និងរតនគិរី ត្រូវបង្កើនសកម្មភាពត្រួតពិនិត្យលើអ្នកដំណើរចេញ-ចូល តាមច្រកព្រំដែនឱ្យបានម៉ដ្ឋចត់ និងធ្វើតេស្តរកកូវីដ-១៩ សម្រាប់សិស្ស និស្សិត និងអ្នកដែលទើបត្រឡប់មកពីប្រទេសវៀតណាម។
វៀតណាមបានប្រកាសពីការឆ្លងកូវីដ-១៩នៅក្នុងសហគមន៍ ដែលបានកើតឡើងនៅទីក្រុងដាណាង និងបានរាលដាលដល់ភាគកណ្ដាលនៃប្រទេស គឺទីក្រុងហាណូយ និងហូជីមិញ។ បើគិតត្រឹមថ្ងៃអាទិត្យ ទី២ ខែសីហា ឆ្នាំ២០២០នេះ វៀតណាមមានអ្នកឆ្លងកូវីដ-១៩សរុបចំនួន៥៩០ករណី ដោយមានអ្នកស្លាប់ចំនួន៥នាក់ និងសះស្បើយ៣៧៣នាក់ ៕
© រក្សាសិទ្ធិដោយ thmeythmey.com
