COVID-19
អន្តរជាតិ
មនុស្សយ៉ាងតិច៤០នាក់ ឆ្លង COVID-19 លើនាវាទេសចរណ៍ពីរគ្រឿងនៅន័រវែស នាវាទេសចរណ៍ MS Roald Amundsen ចតនៅកំពង់ផែ Tromsoe កាលពីថ្ងៃទី ៣១ ខែកក្កដ ឆ្នាំ២០២០ (AFP)
× យ៉ាងហោចណាស់អ្នកដំណើរនិងបុគ្គលិកបម្រើការចំនួន៤០នាក់នៅលើនាវាទេសចរណ៍ពីរគ្រឿងនៅន័រវែស ត្រូវបានរកឃើញថាឆ្លងជំងឺ COVID-19 ។ អាជ្ញាធរសុខាភិបាលប្រទេស ន័រវែស បញ្ជាក់បែបនេះ នៅថ្ងៃទី ២ ខែសីហា ។ អ្វីដែលគួរឲ្យភ្ញាក់ផ្អើល អ្នកដំណើរ១៧៨នាក់ត្រូវបានអនុញ្ញាតឲ្យចាកចេញពីនាវាមួយគ្រឿង មុនពេលករណីឆ្លងទី១ត្រូវបានរកឃើញ។
កាលពីថ្ងៃទី៣១ ខែកក្កដា បុគ្គលិកបម្រើលើនាវាទេសចរណ៍ MS Roald Amundsen ចំនួន ៤នាក់ ត្រូវបានបញ្ជូនទៅកាន់មន្ទីរពេទ្យ នៅពេលនាវាបានទៅដល់កំពង់ផែ Tromsoe ហើយក្រោយមកអ្នកទាំងបួនមានលទ្ធផលតេស្តវិជ្ជមាន COVID-19 ។ លទ្ធផលតេស្ត ក៏បានបង្ហាញថា បុគ្គលិក៣២នាក់ផ្សេងទៀតក្នុងចំណោមបុគ្គលិកបម្រើលើនាវាទេសចរណ៍សរុប១៥៨នាក់ ក៏ត្រូវបានរកឃើញថា ឆ្លងផងដែរ ។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters ។ តួលេខឆ្លង COVID-19 លើនាវានេះមានចំនួន៣៦នាក់។
ខណៈបុគ្គលិកត្រូវបានដាក់ឲ្យធ្វើចត្តាឡីស័កលើនាវា អ្នកដំណើរ១៧៨នាក់ ត្រូវបានអនុញ្ញាតឲ្យចាកចេញពីនាវា មុនពេលករណីឆ្លងទី១ ត្រូវបានរកឃើញ។ ភាពធ្វេសប្រហែសនេះបង្កឲ្យអាជ្ញាធរន័រវែសញាប់ដៃញាប់ជើងបើកប្រតិបត្តិការតាមរកពួកគេ ដើម្បីទប់ស្កាត់ការឆ្លងរាលដាល COVID-19 ។
ជាមួយគ្នានេះ អ្នកដំណើរ៤នាក់ទៀតដែលធ្វើដំណើរលើនាវាកម្សាន្តមួយគ្រឿងទៀតដែលចេញដំណើរតាំងពីថ្ងៃទី ១៧ ខែកក្កដាមក ក៏ត្រូវបានរកឃើញថាមានផ្ទុកជំងឺ COVID-19 ។ វិទ្យាស្ថានសុខភាពសាធារណៈន័រវែស (FHI) អះអាងបែបនេះ ដែលដកស្រង់ចុះផ្សាយដោយទីភ្នាក់ងារព័ត៌មាន Reuters ។ បូកបញ្ចូលករណីឆ្លងលើនាវាទាំងពីរ ករណី COVID-19 មាន៤០នាក់ហើយ។
«យើងរំពឹងថា ករណីឆ្លងច្រើនថែមទៀត នឹងត្រូវបានរកឃើញពាក់ព័ន្ធនឹងការផ្ទុះរាលដាលនេះ»។ អគ្គនាយក FHI លោក Line Vold និយាយដូច្នេះនៅថ្ងៃទី២ ខែសីហា ដោយបន្ថែមថា អ្នកដំណើរទាំងអស់ត្រូវបានណែនាំឲ្យធ្វើចត្តាឡីស័កដោយខ្លួនឯង។
ក្រុមហ៊ុន Hurtigruten line ដែលជាម្ចាស់នាវាទេសចរណ៍ MS Roald Amundsen ក៏ដូចជានាវាទេសចរណ៍១៥គ្រឿងផ្សេងទៀត បានក្លាយជាក្រុមហ៊ុនដំបូងដែលវិលត្រលប់ទៅបើកដំណើរកម្សាន្តតាមសមុទ្រឡើងវិញកាលពីពាក់កណ្ដាលខែមិថុនាកន្លងទៅ ក្រោយផ្អាក៣ខែដោយសារជំងឺរាតត្បាតសកល COVID-19 ។
ចាប់តាំងពីផ្ដើមផ្ទុះ COVID-19 កាលពីដើមឆ្នាំ២០២០ អ្នកដំណើររាប់ពាន់នាក់ បានជាប់គាំងលើនាវាទេសចរណ៍ក្នុងសមុទ្រ អាស៊ី សហរដ្ឋអាមេរិក និងប្រទេសដទៃទៀត ដែលធ្វើឲ្យប្រតិបត្តិករលុបចោលការធ្វើដំណើរតាមសមុទ្រ៕
Tag:
ន័រវែស
COVID-19
MS Roald Amundsen
នាវាទេសចរណ៍
© រក្សាសិទ្ធិដោយ thmeythmey.com