COVID-19
អន្តរជាតិ
វៀតណាម មាន COVID-19 ចំនួន១០ករណីទៀត ឯករណីពាក់ព័ន្ធដាណាងឡើងដល់២០៥នាក់
ប្រជាជនវៀតណាមរង់ចាំការធ្វើតេស្តរក COVID-19 ។ រូបភាព AFP
×![]()
ដោយ: តន ចាន់រិទ្ធារ៉ា
វៀតណាម នៅថ្ងៃទី៤ ខែសីហា បានប្រកាសពីករណីជំងឺ COVID-19 ចំនួន១០ថែមទៀត ដែលធ្វើឲ្យករណីសរុបនៅប្រទេសនេះកើនដល់៦៥២នាក់។ ទីក្រុងដាណាង នៅតែជាទីតាំងផ្ទុះខ្លាំងដដែល។
បើតាមការប្រកាសគណៈកម្មាធិការជាតិដើម្បីទប់ស្កាត់ និងគ្រប់គ្រង COVID-19 ក្នុងចំណោមករណីឆ្លងថ្មីចំនួន១០ មាន៧ករណីត្រូវបានរាយការណ៍នៅទីក្រុងទេសចរណ៍ដាណាង និងបីករណីទៀតនៅខេត្ត Quang Nam ភាគកណ្ដាលប្រទេស។
នៅQuang Nam អ្នកឆ្លងម្នាក់ស្ថិតក្រោមការព្យាបាល ខណៈករណីពីរទៀត ឆ្លង COVID-19 ពីអ្នកជំងឺម្នាក់នៅមន្ទីរពេទ្យដាណាង។ សម្រាប់ដាណាងវិញ ករណីឆ្លងម្នាក់ ជាបុគ្គលិកក្នុងមន្ទីរពេទ្យ ប្រាំនាក់ទៀតជាអ្នកជំងឺ និងម្នាក់ទៀតបានប៉ះពាល់បុគ្គលម្នាក់ផ្សេងដែលបន្ទាប់មកពីត្រូវបានរកឃើញថា មានផ្ទុ COVID-19 ដែរ។
ក្រោយការផ្ទុះជាថ្មីនៅថ្ងៃទី២៥ ខែកក្កដា ករណីឆ្លងទាំងអស់ដែលពាក់ព័ន្ធករណីដាណាងមានដល់២០៥នាក់ហើយ។ នេះបើតាមការប្រកាសរបស់រដ្ឋាភិបាលវៀតណាម។
នាយករដ្ឋមន្ត្រីវៀតណាម ង្វៀន ស៊ួនហ្វុក និយាយថា ជារួមវៀតណាមអាចគ្រប់គ្រងករណីឆ្លងចុងក្រោយនេះ ក្រោយរកឃើញករណីឆ្លងជាបន្តបន្ទាប់។ ថ្លែងក្នុងកិច្ចប្រជុំគណៈរដ្ឋមន្ត្រីនៅថ្ងៃទី៣ ខែសីហា លោក ង្វៀន លើកឡើងថា វៀតណាមមានបទពិសោធគ្រប់គ្រាន់ដើម្បីគ្រប់គ្រងការផ្ទុះករណីឆ្លងថ្មី ព្រមគ្នានឹងរក្សាលំនឹងស្ថិរភាពម៉ាក្រូសេដ្ឋកិច្ច៕
Tag:
វៀតណាម
COVID-19
© រក្សាសិទ្ធិដោយ thmeythmey.com
