អតីតមហាក្សត្រអេស្ប៉ាញ Juan Carlos ដែលកំពុងប្រឈមមុខការស៊ើបអង្កេតពាក់ព័ន្ធរឿងពុករលួយទាំងក្នុងប្រទេស និងបរទេស បានប្រកាសថា ទ្រង់នឹងរស់នៅដោយនិរទេសព្រះកាយ។ ទោះនិរទេសព្រះកាយក្ដី មេធាវីការពាររបស់អតីតស្ដេចអង្គនេះ អះអាងថា កូនក្តីខ្លួននៅតែអាចសហការជាមួយព្រះរាជអាជ្ញាអេស្ប៉ាញដដែល។
អតីតប្រមុខរដ្ឋអេស្ប៉ាញ Juan Carlso ព្រះជន្ម ៨២ វស្សា បានបង្ហើបថា ទ្រង់នឹងចាកចេញពីប្រទេសក្នុងលិខិតមួយច្បាប់ដែលផ្ញើទៅកាន់បុត្រាទ្រង់ ស្តេច Felipe VI ដែលបានព្រមទទួលយកការសម្រេចចិត្តនេះ ហើយបានអរព្រះគុណបិតារបស់ទ្រង់។ រាជវាំងអេស្ប៉ាញ បញ្ជាក់បែបនេះ ក្នុងសេចក្តីថ្លែងការណ៍នៅថ្ងៃទី ៣ ខែសីហា។
ការស៊ើបអង្កេតទាក់ទងករណីណុករលួយ ចាប់ផ្ដើមក្នុងប្រទេសអេស្ប៉ាញ និងស្វ៊ីស ក្រោយបែកធ្លាយព័ត៌មានលម្អិតពាក់ព័ន្ធនឹងការគ្រប់គ្រងមិនត្រឹមត្រូវមូលនិធិដែលត្រូវបានអះអាងថា ប្រគល់ឲ្យអតីតប្រមុខរដ្ឋរូបនេះពីសំណាក់ប្រទេសអារ៉ាប៊ីសាអូឌីត។
តុលាការកំពូលអេស្ប៉ាញ ក្នុងខែមិថុនា បានប្រកាសពីការស៊ើបអង្កេតដើម្បីបញ្ជាក់ពីទំនួលខុសត្រូវស្របច្បាប់របស់អតីតស្ដេចអង្គនេះ។ ក៏ប៉ុន្តែព្រោះតែមានអភ័យឯកសិទ្ធិ ទ្រង់ទទួលខុសត្រូវតែចំពោះអំពើដែលទ្រង់បានប្រព្រឹត្តក្រោយដាក់រាជ្យប៉ុណ្ណោះ។
ការសង្ស័យ គឺផ្ដោតលើលុយ១០០លានដុល្លារ ដែលអះអាងត្រូវបានផ្ទេរដោយសម្ងាត់ចូលទៅក្នុងគណនីធនាគារស្វ៊ីសមួយរបស់ទ្រង់ក្នុងឆ្នាំ២០០៨។ ក្រោយមានការផ្សាយផ្ទួនៗពីសំណាក់ប្រព័ន្ធផ្សព្វផ្សាយ នាយករដ្ឋមន្ត្រីអេស្ប៉ាញ បានលើកឡើងក្នុងខែកក្កដាដូច្នេះថា«ប្រជាជនអេស្ប៉ាញទាំងមូល កំពុងទទួលបានព័ត៌មានមិនល្អ ដែលធ្វើឲ្យយើងគ្រប់គ្នាមានបញ្ហា រួមទាំងខ្ញុំផងដែរ»។
មេធាវីការពាររបស់អតីតស្ដេច Juan Carlos បានចេញសេចក្តីថ្លែងការណ៍មួយនៅថ្ងៃទី៣ ខែសីហា ដោយនិយាយថា កូនក្តីលោកពុំបានព្យាយាមរត់គេចពីយុត្តិធម៌ដោយការធ្វើនិរទេសខ្លួន ហើយទ្រង់នៅតែសហការជាមួយព្រះរាជអាជ្ញាបានដដែល។ គេមិនទាន់ដឹងពីគោលដៅនិរទេសឡើយ។
ព្រះចៅ Juan Carlos បានឡើងសោយរាជ្យក្នុងឆ្នាំ១៩៧៥ ក្រោយការស្លាប់របស់មេដឹកនាំផ្ដាច់ការ Francisco Franco ហើយបានសោយរាជ្យអស់រយៈពេល៣៨ឆ្នាំ មុនពេលដាក់រាជ្យឲ្យបុត្រាទ្រង់ មាហាក្សត្រ Felipe VI ក្នុងខែមិថុនា ឆ្នាំ២០១៤។
អតីតស្ដេចអេស្បាញ់អង្គនេះ ទទួលការគោរពស្រលាញ់ពីសំណាក់ពលរដ្ឋ ព្រោះទ្រង់បានដើរតួយ៉ាងសំខាន់ក្នុងការអូសទាញប្រទេសអេស្ប៉ាញដែលស្ថិតក្រោមការដឹកនាំបែបផ្ដាច់ការរបស់ Franco អស់ពេល៣៦ឆ្នាំ ឲ្យទៅជាប្រទេសប្រជាធិបតេយ្យ៕