ពីនេះ ពីនោះ
សុខភាព
កុំរំលង! ផ្លែឈើអ្វីខ្លះមានឥទ្ធិពលបន្សាបកម្ចាត់ជាតិពុលពីក្នុងរាងកាយ?
កុំរំលង! ផ្លែឈើអ្វីខ្លះមានឥទ្ធិពលបន្សាបកម្ចាត់ជាតិពុលពីក្នុងរាងកាយ?
×![]()
ដោយ: សារព័ត៌មានថ្មីៗ
ចង់សម្អាតក្នុងរាងកាយមិនពិបាកឡើយ! គួរធ្វើបែបណា? ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីផ្លែឈើដែលអ្នកគួរទទួលទានដើម្បីសម្អាតក្នុងរាងកាយ ៖
១. ផ្លែប៉ោម
ផ្លែប៉ោមប្រសើរណាស់សម្រាប់សុខភាពរាងកាយទាំងមូល រួមទាំងពោះវៀនដោយវាមានផ្ទុកសម្បូរទៅដោយសារធាតុចិញ្ចឹមល្អៗ និងវីតាមីន C ដែលសារធាតុប្រឆាំងអុកស៊ីតកម្មជួយកម្ចាត់ពពួកបាក់តេរីអាក្រក់ ហើយបង្កើនចំនួនបាក់តេរីល្អជំនួសវិញធ្វើឱ្យមុខងារពោះវៀនកាន់តែប្រសើរឡើង។ ផ្លែឈើនេះក៏ជាប្រភពដ៏ល្អនៃជាតិទឹកនិងជាតិសសៃដែលចាំបាច់សម្រាប់ការស្រកទម្ងន់។ ការទទួលទានផ្លែប៉ោមក៏ជួយកាត់បន្ថយហានិភ័យនៃជំងឺបេះដូងនិងជំងឺដាច់សសៃឈាមក្នុងខួរក្បាលផងដែរ។
២. ស្ត្របឺរី
ជាប្រភពដ៏ប្រសើរនៃសារធាតុប្រឆាំងអុកស៊ីតកម្មដែលអាចកម្ចាត់រាល់ជាតិពុលពីសំណាក់រ៉ាឌីកាល់សេរី។ ចូរព្យាយាមទទួលទានផ្លែឈើនេះឱ្យបាន ១ ពែងក្នុងមួយថ្ងៃជាប្រចាំ។
៣. ផ្លែទទឹម
ផ្លែឈើនេះមានប្រសិទ្ធភាពបង្កើនបរិមាណសារធាតុប្រឆាំងអុកស៊ីតកម្មក្នុងរាងកាយ ហើយកម្ចាត់នូវរាល់ជាតិពុលគ្រោះថ្នាក់។ ការទទួលទានផ្លែទទឹមក៏ជួយពង្រឹងប្រព័ន្ធភាពស៊ាំរាងកាយគួរឱ្យកត់សម្គាល់។
៤. ក្រូចឆ្មារ
មានផ្ទុកសម្បូរទៅដោយវីតាមីន C និងលក្ខណៈសម្បត្តិអាចរក្សាតុល្យភាពអាល់កាឡាំងអាស៊ីដនៃរាងកាយដែលបង្កើនប្រសិទ្ធភាពក្នុងការកម្ចាត់ជាតិពុល។
៥. ផ្លែម្នាស់
ជាប្រភពដ៏ប្រសើរនៃម៉ង់កាណែសនិងវីតាមីន C ដែលជួយសម្អាតពេញក្នុងរាងកាយ។ លើសពីនេះទៅទៀតម្នាស់មានផ្ទុកសារធាតុ Bromelain ដែលល្អសម្រាប់ប្រព័ន្ធរំលាយអាហារ ទប់ស្កាត់ហានិភ័យនៃជំងឺបេះដូង និងថែមទាំងដើរតួជាថ្នាំអង់ទីប៊ីយ៉ូទិកកាត់បន្ថយការរលាកក្នុងរាងកាយទៀតផង។
៦. ផ្លែល្ហុង
ផ្លែឈើនេះជួយសម្រួលដល់ប្រសិទ្ធភាពនៃការរំលាយអាហារល្អសម្រាប់ការសម្អាតក្នុងរាងកាយ។ ផ្លែល្ហុងក៏ជាប្រភពដ៏ល្អនៃវីតាមីននិងជាតិរ៉ែចាំបាច់ដែលជួយបង្កើនកម្រិតនៃថាមពល។
៧. ផ្លែឪឡឹក
ជាប្រភពដ៏ប្រសើរនៃជាតិទឹក ជាតិសសៃ វីតាមីន និងជាតិរ៉ែដែលជួយកម្ចាត់រាល់ជាតិពុលពីក្នុងរាងកាយ។
៨. ដូង
ទឹកដូង គឺជាថ្នាំបញ្ចុះទឹកនោមបែបធម្មជាតិដែលមានប្រសិទ្ធិភាពយ៉ាងប្រសើរក្នុងការទប់ស្កាត់ជំងឺតម្រងនោម។ វាក៏ជួយសម្អាតផ្លូវទឹកនោម ផ្លោកនោម និងថែមទាំងអាចបំបែកក្រួសក្នុងតម្រងនោមបានផងដែរ។
៩. ផ្លែបឺរ
ជាប្រភពដ៏ប្រសើរនៃសារធាតុ glutathione រួមទាំងសារធាតុប្រឆាំងបាក់តេរីនិងអុកស៊ីតកម្មដែលជួយសម្អាតថ្លើម ក៏ដូចជាកម្ចាត់ជាតិពុល។ ផ្លែបឺរក៏ជួយថ្លើមក្នុងដំណើរការបន្សាបជាតិពុល ឬបញ្ចេញជាតិពុល ក៏ដូចជាសារធាតុគីមីគ្រោះថ្នាក់ចេញពីរាងកាយតាមរយៈទឹកនោមនិងលាមកផងដែរ។ ដូច្នេះដើម្បីជាការប្រសើរ ចូរព្យាយាមទទួលទានផ្លែឈើនេះជាប្រចាំ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com
