COVID-19
អន្តរជាតិ
COVID-19៖ អ្នកស្លាប់នៅវៀតណាមឡើងដល់៨នាក់ ដោយ២នាក់ចុងក្រោយមានបញ្ហាតម្រងនោម ប្រជាជនវៀតណាម នៅទីក្រុង ហាណូយ អង្គុយរង់ចាំធ្វើតេស្ត COVID-19 កាលពីថ្ងៃទី ៣១ ខែកក្កដា ឆ្នាំ២០២០ (AFP)
× ក្រសួងសុខាភិបាលវៀតណាម នៅថ្ងៃទី៤ ខែសីហា បានបញ្ជាក់ពីករណីស្លាប់ទី៨ដោយសារជំងឺ COVID-19 ។ អ្នកស្លាប់នោះគឺជាអ្នកជំងឺដែលទើបជាសះស្បើយពីជំងឺតម្រងនោម។
ក្នុងសេចក្តីថ្លែងការណ៍របស់ខ្លួន ក្រសួងសុខាភិបាលវៀតណាម អះអាងថា បុរសវ័យ៦៥ឆ្នាំម្នាក់ បានបាត់បង់ជីវិតដោយសារជំងឺ COVID-19 ខូចតម្រងនោម និងបញ្ហាសុខភាពដទៃទៀត។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters ។
សេចក្តីថ្លែងការណ៍នេះ គូសបញ្ជាក់ទៀតថា អ្នកជំងឺដែលទើបអនុញ្ញាតឲ្យចាកចេញពីមន្ទីរពេទ្យក្រុងដាណាងកាលពីថ្ងៃទី ២៤ ខែកក្កដា ក្រោយសម្រាកព្យាបាលជំងឺតម្រងនោមចំនួន៥ខែរួច ត្រូវបានរកឃើញថា ឆ្លង COVID-19 នៅថ្ងៃទី ២៨ ខែកក្កដា ។
ចំណែក អ្នកស្លាប់ទី៧ដោយសារ COVID-19 ក្នុងប្រទេសវៀតណាម គឺជាស្ត្រី៦២ឆ្នាំម្នាក់ ដែលខូចតម្រងនោមដែរ។ អ្នកជំងឺរូបនេះ បានសម្រាកព្យាបាលនៅមន្ទីរពេទ្យដាណាង ពីថ្ងៃទី ១៨ ដល់ ថ្ងៃទី ២៧ ខែកក្កដា ហើយមានលទ្ធផលតេស្ត COVID-19 វិជ្ជមាន នៅថ្ងៃទី២៦ ខែកក្កដា មុនពេលបញ្ជូនទីកាន់មន្ទីរពេទ្យមួយទៀត ។
ទាក់ទិនរឿងនេះ អនុរដ្ឋមន្ត្រីសុខាភិបាលវៀតណាម Nguyen Truong Son អះអាងថា ចំនួនអ្នកជំងឺ COVID-19 ផ្សេងទៀត ប្រឈមហានិភ័យស្លាប់ខ្ពស់ ដោយសារតែបញ្ហាសុខភាពដែលពួកគេមានស្រាប់ និងអាយុកាន់តែចាស់។ នេះបើតាម Reuters ។
គិតមកទល់ថ្ងៃទី ៤ ខែសីហា អ្នកជំងឺ COVID-19 ក្នុងវៀតណាមសរុប មានដល់៦៥២ករណី ក្នុងនោះជាសះស្បើយ ៣៧៤នាក់។ យ៉ាងណា ក្នុងទីក្រុង ដាណាង ដែលចាត់ទុកជាតំបន់ផ្ទុះថ្មីក្នុងប្រទេសតំបន់អាស៊ីអាគ្នេយ៍មួយនេះ រាយការណ៍ករណីឆ្លងរហូតដល់២០៥ករណីហើយ ។ នេះបើតាមគិតចាប់ពីផ្ទុះដំបូង កាលពីថ្ងៃទី ២៥ ខែកក្កដាមក៕
© រក្សាសិទ្ធិដោយ thmeythmey.com