មន្ទីរទេសចរណ៍កំពតពង្រឹងវិធានការអនាម័យនៅទីតាំងទេសចរណ៍សក្តានុពលជាង២០កន្លែង

COVID-19

ជាតិ

មន្ទីរទេសចរណ៍កំពតពង្រឹងវិធានការអនាម័យនៅទីតាំងទេសចរណ៍សក្តានុពលជាង២០កន្លែង

05, Aug 2020 , 7:59 am

រូបភាព

ដោយ:

ភ្នំពេញ៖ កំពតជាខេត្តជាប់តំបន់ឆ្នេរ ដែលមានសក្តានុពលទេសចរណ៍រហូតដល់១៧កន្លែង និងសហគមន៍ទេសចរណ៍៤កន្លែង ។ ថ្ងៃសម្រាកជំនួសចូលឆ្នាំ ខេត្តកំពត ត្រៀមខ្លួនជាស្រេចក្នុងការទទួលភ្ញៀវទេសចរ ដោយអនុវត្តវិធានសុវត្ថិភាពតាមការណែនាំរបស់រដ្ឋាភិបាល និងក្រសួងសុខាភិបាល។

ប្រធានមន្ទីរទេសចរណ៍ខេត្តកំពត លោក សយ ស៊ីណុល ប្រាប់សារព័ត៌មានថ្មីៗ២៥ តាមទូរសព្ទថា៖ «បច្ចុប្បន្នការងារដ៏ធំមួយដែលខេត្តបានធ្វើនោះគឺ យុទ្ធនាការអនុវត្ត និងផ្សព្វផ្សាយវិធានសុវត្ថិភាពទេសចរណ៍ តាមការណែនាំរបស់ក្រសួងទេសចរណ៍ ទៅលើសេវាកម្មទាំង៦មាន សេវាកម្មស្នាក់នៅ សេវាកម្មម្ហូបអាហារ សេវាកម្មរមណីយដ្ឋាន សហគមន៍ទេសចរណ៍ មធ្យោបាយដឹកជញ្ជូនតាមផ្លូវគោក និងតាមផ្លូវទឹក»។

លោកបានអះអាងបន្ថែមថា៖ «យើងបានបង្កើតក្រុមការងារមួយ និងមានការបង្រៀនមន្ត្រីរបស់យើងពីវិធាននានារបស់ក្រសួងសុខាភិបាលដើម្បីចុះទៅតាមមូលដ្ឋានទេសចរណ៍ដើម្បីផ្សព្វផ្សាយផ្ទាល់ ក្នុងការពង្រឹងការបង្ការ ដូចជាមានការពាក់ម៉ាស់ ប្រើជែលលាងដៃ ឬទឹកសាប៊ូ ការវាស់កម្ដៅ និងរក្សាគម្លាត»។

លោក សយ ស៊ីណុល បានបន្ថែមថា ដើម្បីរក្សារសុវត្ថិភាពពីការឆ្លងជំងឺកូវីដ១៩ គឺត្រូវមានការសហការពី មន្ទីរទេសចរណ៍ខេត្ត អាជីវកដែលបម្រើលើសេវាកម្មទេសចរណ៍ និងការរក្សាអនាម័យរបស់ភ្ញៀវទេសចរផ្ទាល់។ ក្រៅពីវិធានសុវត្ថិភាព មន្ទីរទេសចរណ៍ខេត្តកំពតក៏បានចុះផ្សព្វផ្សាយដល់អាជីវករ ដែលបម្រើសេវាកម្មទេសចរណ៍ ទៅលើការពង្រឹងគុណភាពចំណីអាហារ សេវាកម្មស្នាក់នៅ និងសណ្ដាប់ធ្នាប់បរិស្ថាន៕