COVID-19
អន្តរជាតិ
មេទ័ពជើងគោកថៃ៖ ជំងឺស្អប់ជាតិឯង ជាការគំរាមខ្លាំងជាង COVID-19 ទៀត មេទ័ពជើងគោកថៃដ៏មានឥទ្ធិពលរបស់ថៃ ឧត្តមសេនីយ៍ Apirat Kongsompong (AFP)
× មេទ័ពជើងគោកដ៏មានឥទ្ធិពលរបស់ថៃ ឧត្តមសេនីយ៍ Apirat Kongsompong បានប្រាប់សិស្សនាយទាហានថា ជំងឺស្អប់ខ្ពើមជាតិខ្លួនឯងដែលកំពុងរាលដាលក្នុងប្រទេស គឺជាការគំរាមធំជាងជំងឺរាតត្បាតសកល COVID-19 ទៅទៀត។
អំឡុងទស្សនកិច្ចទៅកាន់សាលាបណ្ឌិតសភាយោធាមួយ នៅថ្ងៃទី ៥ ខែសីហា ឧត្តមសេនីយ៍ Apirat Kongsompong លើកឡើងដោយប្រយោលពីជំងឺរិះគន់ប្រទេសជាតិឯង។ លោកនិយាយថា៖«ជំងឺ COVID-19 អាចព្យាបាលជាសះស្បើយ តែជំងឺដែលពុំអាចព្យាបាលជា គឺ ការស្ពប់ខ្ពើមជាតិឯង»។
តាមការចុះផ្សាយរបស់ទីភ្នាក់ងារព័ត៌មាន Reuters ឧត្តមសេនីយ៍ថៃរូបនេះ សង្កត់ធ្ងន់ថា៖«យើងមិនអាចព្យាបាលមនុស្សដែលស្ពប់ជាតិពួកគេឡើយ»។ លោក Apirat បន្តថា ម្ល៉ោះហើយទើបជំងឺនេះ ជាការគំរាមកំហែងធំជាងជំងឺ COVID-19 ទៅទៀត។
ការលើកឡើងរបស់ឧត្តមសេនីយ៍ Apirat ធ្វើឡើងខណៈចលនាទាមទារប្រជាធិបតេយ្យក្នុងប្រទេសថៃបន្តកើនឡើងពីមួយថ្ងៃទៅមួយថ្ងៃ។ តួយ៉ាង រយៈពេលជាង២សប្តាហ៍មកនេះ បាតុករថៃ បន្តចេញតវ៉ាជាបន្តបន្ទាប់។
បាតុករភាគច្រើន ជាយុវជនដែលទាមទារឲ្យរដ្ឋាភិបាលរំលាយសភាចោល បញ្ឈប់ការធ្វើទុក្ខបុកម្នេញលើក្រុមអ្នករិះគន់ និងក្រុមអ្នកប្រឆាំង ហើយធ្វើវិសោធនកម្មរដ្ឋធម្មនុញ្ញ។ អ្វីដែលធ្ងន់ធ្ងរជាងនេះ បាតុករថៃប្រមាណ២០០នាក់ កាលពីថ្ងៃយប់ថ្ងៃទី៣ ខែសីហា បានហ៊ានរិះគន់ជាសាធារណៈលើស្ថាប័នមហាក្សត្រដែលមានឥទ្ធិពលខ្លាំង ដែលការពារដោយច្បាប់ដ៏តឹងរ៉ឹងទៀតផង។
ខណៈរងការបាតុកម្មជាបន្តបន្ទាប់ នាយករដ្ឋមន្ត្រីថៃ ប្រាយុទ្ធ ចន្ទអូចា នៅថ្ងៃ៤ ខែសីហា បានប្ដេជ្ញាជំរុញការធ្វើវិសោធនកម្មរដ្ឋធម្មនុញ្ញ ហើយអះអាងថា រដ្ឋាភិបាលលោក ក៏នឹងបង្កើតវេទិកាសម្រាប់យុវជនបញ្ចេញទស្សនៈលើអ្វីដែលពួកគេចង់ឲ្យបានសម្រាប់អនាគតរបស់ប្រទេសថៃផងដែរ៕
Tag:
ថៃ
Apirat Kongsompong
COVID-19
© រក្សាសិទ្ធិដោយ thmeythmey.com