ជាតិ
ទេពកោសល្យ! ខន ឆវ័ន អាយុ១៥ឆ្នាំ គូររូបគំនូរ Doodle បែបវប្បធម៌បានយ៉ាងល្អ
×![]()
ដោយ: ផាត ដាណេ
គំនូរ Doodle ជាសិល្បៈនៃគំនូសអក្សរអមដោយក្បូរក្បាច់លំអរបែបវប្បធម៌ទៅតាមជាតិនីមួយៗ។ ដោយក្តីស្រឡាញ់ និងមានទេពកោសល្យផ្នែកគំនូរ យុវជន ខន ឆវ័ន ដែលរស់នៅស្រុកក្រឡាញ់ ខេត្តសៀមរាប អាចគូរគំនូរប្រភេទនេះ បានយ៉ាងទាក់ទាញ បើទោះបីជាមិនបានឆ្លងកាត់ការសិក្សាផ្ទាល់ពីគ្រូជំនាញណាក៏ដោយ។
ជាសិស្សថ្នាក់ទី១០នៅវិទ្យាល័យក្រឡាញ់ ខន ឆវ័ន តែងតែប្រើប្រាស់ពេលទំនេរដើម្បីគូររូប Doodle បែបវប្បធម៌ ហើយក៏ផ្នែកមួយនៃប្រាក់ចំណូលដ៏ស្តួចស្តើងរបស់យុវជនវ័យ១៥ឆ្នាំរូបនេះផងដែរ។ «ខ្ញុំគូរគំនូរបែប Doodle នេះជិត១ឆ្នាំហើយ ដោយបច្ចុប្បន្នសម្រេចបានជាង៨០រូប»។ នេះជាការអះអាងរបស់ឆវ័ន មកកាន់សារព័ត៌មាន ThmeyThmey។
ថ្វីដ្បិតមិនមានគ្រូបង្រៀន ប៉ុន្តែយុវជន ឆវ័ន ក៏មិនមែនចេះជំនាញនេះដោយឯកឯងនោះឡើយ ដោយគេបានសម្រួចជំនាញរបស់ខ្លួន តាមរយៈការស្រាវជ្រាវក្នុងបណ្តាញអ៊ីនធ័រណិត រីឯមនុស្សឆវ័នយកគំរូតាមនោះ គឺលោក កុយ វិសុទ្ធ ដែលមានរហស្សនាមថា «វិសុទ្ធកវី»។ ស្នាដៃរបស់លោក កុយ វិសុទ្ធ ក៏មានការទទួលស្គាល់ជាអន្តរជាតិផងដែរ។
កើតនៅខេត្តបន្ទាយមានជ័យ តែយុវជន ឆវ័ន បានប្តូរទៅរស់នៅស្រុកក្រឡាញ់ ខេត្តសៀមរាប ជាមួយឪពុកតាំងពីឆ្នាំ២០១៦មក។ ដោយមានឧបនិស្ស័យផ្នែកគំនូរ ឆវ័នបានចាប់ផ្តើមគូរតាមការបង្ហាត់បង្ហាញនៅលើអ៊ីនធ័រណិតដោយបញ្ចូលជាមួយអក្សរឈ្មោះរបស់ខ្លួន។ នៅពេលគូរដំបូង យុវជនរូបនេះ ត្រូវចំណាយពេលយ៉ាងហោចណាស់មួយសប្តាហ៍ដើម្បីបានរូបមួយសន្លឹក ប៉ុន្តែរហូតមកដល់ពេលនេះ មួយថ្ងៃ ឆវ័ន អាចគូរបានមួយសន្លឹក។
យុវជនវ័យ១៥ឆ្នាំរូបនេះ បានប្រាប់ ThmeyThmey តាមទូរសព្ទដូច្នេះថា៖ «ខ្ញុំមិនចូលចិត្តគូររូបមនុស្សទេ ។ ខ្ញុំចូលចិត្តគូរតែរូបដែលស្មុគស្មាញច្រើនបែបហ្នឹង មើលទៅរស់រវើក ហើយយករចនាបទខ្មែរមកលាយបញ្ចូលគ្នា»។
រូបគំនូរប្រភេទ Doodle មិនទាន់ពេញនិយមឡើយនៅកម្ពុជា តែមានការគាំទ្រដ៏ផុសផុលនៅក្រៅប្រទេស។ ឆវ័នចង់ឲ្យបរទេសស្គាល់ស្នាដៃខ្លួន ដើម្បីបង្ហាញពួកគេឲ្យដឹងពីវប្បធម៌ដ៏ផូរផង់របស់ខ្មែរ។ ជាមួយគ្នានេះ ឆវ័ន ស្វាគមន៍ពលរដ្ឋខ្មែរទាំងដែលចង់ឲ្យគេគូរ Doodle ដោយមួយសន្លឹកតម្លៃ២ម៉ឺនរៀល ជាថ្នូរនឹងថ្លៃសម្ភារ ក៏ដូចជាពេលវេលាដែលគេចំណាយ៕
Tag:
សិល្បៈ
គំនូរ
វប្បធម៌
© រក្សាសិទ្ធិដោយ thmeythmey.com
