ជាតិ
មេភូមិ ឲ្យអ្នកធ្វើដំណើរនិងមានផ្ទះក្បែរផ្លូវកំពង់សំបួរប្រុងប្រយ័ត្ន ដោយសារផ្លូវអាចនឹងបាត់បន្តទៀត
ផ្លូវកំពង់សំបួរ ដែលបាក់កាលពីយប់ថ្ងៃទី៦ សីហា ២០២០។(រូបពីទំព័រហ្វេសប៊ុក ថ្នាលថ្មីទឹកដីបាត់ដំបង)
×![]()
ដោយ: ឡាយ សុភាវតី
ភ្នំពេញ៖ លោក ប៉ាត សុភី មេភូមិកំពង់សំបួរ អំពាវនាវឲ្យពលរដ្ឋដែលត្រូវធ្វើដំណើរតាមផ្លូវកំពង់សំបួរ នៅតាមបណ្ដោយស្ទឹងសង្កែ ជិះវាងទៅផ្លូវសំរោងក្នុងវិញ ដោយសារផ្លូវនេះបានបាក់ប្រមាណ២០ម៉ែត្រ ហើយទទឹងផ្លូវនៅសល់ប្រមាណ១ប៉ុណ្ណោះ។ លើសពីនេះ លោក ប៉ាត សុភី អះអាងថា ផ្លូវ អាចនឹងបាក់បន្តទៀត។ 
មេភូមិកំពង់សំបួរបានបញ្ជាក់ប្រាប់សារព័ត៌មានថ្មីៗតាមទូរស័ព្ទថា ផ្លូវកំពង់សំបួរនេះ បាក់ដោយសារភ្លៀងធ្លាក់ច្រើនហើយទឹកហូរច្រុះដី។ លោកថ្លែងថា៖«ផ្លូវនេះ បាក់នៅម្ដុំក្លោងទ្វារវត្តសំរោងក្នុងខាងលិចប្រហែលម៉ោង១០យប់ បាក់ជាង២០ម៉ែត្រ ដោយសារទឹកភ្លៀងច្រុះដី ហើយផ្លូវនេះនៅសល់ទទឹងផ្លូវប្រមាណ១ម៉ែត្រប៉ុណ្ណោះ»។
ទន្ទឹមនឹងនេះ លោក សុភី បានអំពាវនាវឲ្យពលរដ្ឋដែលមានបំណងធ្វើដំណើរឆ្លងកាត់ផ្លូវកំពង់សំបួរនេះ ធ្វើដំណើរវាងទៅផ្លូវសំរោងក្នុងវិញ។ លោកសង្កត់ធ្ងន់ថា ផ្លូវនេះនៅសល់ប្រមាណ១ម៉ែត្រ គឺមានតែម៉ូតូនិងកង់ប៉ុណ្ណោះដែលអាចធ្វើដំណើរបាន។ ប៉ុន្តែដើម្បីជៀសវាងគ្រោះថ្នាក់ មេភូមិរូបនេះ ស្នើឲ្យពលរដ្ឋធ្វើដំណើរផ្លូវវាង។ បច្ចុប្បន្នលោក សុភី បានរាយការណ៍ទៅថ្នាក់ស្រុកហើយ ដើម្បីសុំការជួយអន្តរាគមន៍។
«ប្រសិនបើមានភ្លៀងធ្លាក់បន្តបន្ទាប់ទៀត ផ្លូវនេះ អាចនឹងបាក់បន្តទៀត អ៊ឹចឹងសុំឲ្យបងប្អូនប្រយ័ត្នឲ្យបានគ្រប់ពេលផង ទាំងអ្នកធ្វើដំណើរនិងអ្នកមានផ្ទះនៅក្បែរហ្នឹង»។ នេះបើតាមការលើកឡើងរបស់ លោក សុភី ហើយបានបញ្ជាក់បន្ថែមថា កាលពីឆ្នាំមុនផ្លូវនេះមានសភាពបាក់តិចតួចប៉ុណ្ណោះ ប៉ុន្តែមានបណ្ដោយវែងជាង១៣០ម៉ែត្រ ដោយសារទឹកជំនន់ពីស្ទឹងសង្កែ។ លោកក៏បានរាយការណ៍ទៅថ្នាក់លើដែរ ប៉ុន្តែមិនមានការជួសជុលណាមួយឡើយ ព្រោះត្រូវចំណាយថវិកាច្រើន៕
Tag:
បាត់ដំបង
បាក់ផ្លូវ
© រក្សាសិទ្ធិដោយ thmeythmey.com
