COVID-19
អន្តរជាតិ
អាមេរិក អង់គ្លេស និងសម្ព័ន្ធមិត្តឯទៀត ជំរុញឲ្យហុងកុងរៀបចំការបោះឆ្នោតសភាឲ្យបានឆាប់
ប្រធានប្រតិបត្តិទីក្រុងហុងកុង លោកស្រីការី ឡាំ។ រូបភាព៖ AFP
×![]()
ដោយ: ធៀន ភារិន្ទ
អង់គ្លេស អាមេរិក កាណាដា អូស្ត្រាលី នូវែលសេឡង់ នៅថ្ងៃទី៩ ខែសីហា បានជំរុញឲ្យតំបន់រដ្ឋបាលពិសេសហុងកុង រៀបចំការបោះឆ្នោតឲ្យបានឆាប់រហ័ស។ ជាមួយគ្នានេះ ប្រទេសទាំង៥ ក៏បានលើកឡើងពីបញ្ហាព្រួយបារម្ភមួយចំនួនផងដែរ ជុំវិញការហាមឃាត់បេក្ខជន ដែលមានទំនោរទៅរកប្រជាធិបតេយ្យចំនួន១២រូប ពីការឈរឈ្មោះបោះឆ្នោតសភាហុងកុង។ 
នាពេលកន្លងមក ប្រធានប្រតិបត្តិតំបន់រដ្ឋបាលពិសេសហុងកុង លោកស្រី ការី ឡាំ បានប្រកាសលើកពេលបោះឆ្នោតហុងកុង ដែលគ្រោងធ្វើនៅថ្ងៃទី ៦ ខែកញ្ញាខាងមុខ ទៅធ្វើនៅឆ្នាំ២០២១វិញ ដោយសារតែហេតុផល ទប់ស្កាត់ និងបង្ការការរាតត្បាត COVID-19 ។ ការប្រកាសនេះ ធ្វើឡើងស្របពេលករណីឆ្លងកូរ៉ូណាវីរុសនៅក្នុងទីក្រុង កំពុងតែកើនឡើង និងបន្ទាប់ពីហាមឃាត់បេក្ខជនដែលមានទំនោរទៅរកប្រជាធិបតេយ្យចំនួន ១២នាក់ មិនឲ្យឈរឈ្មោះបោះឆ្នោតសភាហុងកុង។
ពាក់ព័ន្ធនឹងបញ្ហានេះ រដ្ឋមន្ត្រីការបរទេសប្រទេស៥ ដែលមានអង់គ្លេស អាមេរិក កាណាដា អូស្ត្រាលី នូវែលសេឡង់បានលើកឡើងពីបញ្ហាបារម្ភជុំវិញការហាមឃាត់បេក្ខជនប្រជាធិបតេយ្យមិនឲ្យឈរឈ្មោះថា គឺជារឿងអយុត្តិធម៌ ឯការលើកពេលបោះឆ្នោត គឺមិនសមហេតុផល។ ក្នុងសេចក្តីថ្លែងការណ៍រួមគ្នា រដ្ឋមន្ត្រីការបរទេសទាំង៥ បានអះអាងថា សកម្មភាពនៅក្នុងទីក្រុងហុងកុងបែបនេះ គឺជាការបំផ្លាញដំណើរការលទ្ធិប្រជាធិបតេយ្យ ដែលជាមូលដ្ឋាននៃស្ថិរភាព និងវិបុលភាពរបស់ទីក្រុងនេះ។
ប្រមុខការទូតនៃក្រុមប្រទេសទាំង៥ ដែលជាក្រុមប្រទេស Five Eyes បានជំរុញឲ្យរដ្ឋាភិបាលហុងកុងរៀបចំការបោះឆ្នោតឲ្យបានឆាប់រហ័សបំផុត។ យ៉ាងណាក៏ដោយ សេចក្តីថ្លែងការណ៍ដដែលនេះ មិនបានបញ្ជាក់ពីទណ្ឌកម្មពីការដាក់ទណ្ឌកម្មអ្វីឡើយ។
ការជំរុញឲ្យហុងកុងរៀបចំការបោះឆ្នោតឲ្យបានឆាប់រហ័ស ធ្វើឡើងស្របពេលគណៈអចិន្ត្រៃយ៍សភាប្រជាជនចិន កំពុងប្រជុំពីជំហានបន្ទាប់សម្រាប់សភាហុងកុង ដែលនឹងបញ្ចប់អាណត្តិនាពេលខាងមុខ។ កិច្ចប្រជុំនេះ ក៏ជជែកគ្នាពីការបន្តអាណត្តិរបស់សភាហុងកុង។ សភាចិនដែលមានអំណាចបកស្រាយច្បាប់ក្នុងស្រុកនានានោះ អាចកំណត់ពីសិទ្ធិអំណាចរបស់សភាហុងកុងដែលអំឡុងពេលពេលពន្យារពេលបោះឆ្នោតនេះផងដែរ។
អាមេរិក នៅថ្ងៃទី៧ ខែសីហាកន្លងទៅ បានសម្រេចដាក់ទណ្ឌកម្ម លើប្រធានប្រតិបត្តិហុងកុង លោកស្រីការី ឡាំ រួមទាំងមន្ត្រីហុងកុង និងមន្ត្រីចិនផ្សេងទៀត ក្រោមហេតុផលថា បានចូលរួមបំផ្លាញលទ្ធិប្រជាធិបតេយ្យទីក្រុងហុងកុង និងចូលរួមអនុវត្តច្បាប់សន្តិសុខជាតិហុងកុង។ ទណ្ឌកម្មនេះ គឺជាការបង្កកទ្រព្យសម្បត្តិ និងការហាមរកស៊ីជាមួយអាមេរិក។
សូមបញ្ជាក់ថា សម្ព័ន្ធមិត្ត Five Eyes ត្រូវបានបង្កើតឡើងនៅក្នុងឆ្នាំ១៩៤១ ដើម្បីចែករំលែកព័ត៌មានសម្ងាត់ និងស៊ើបការណ៍លើបញ្ហាមួយចំនួន។ រយៈពេលចុងក្រោយ សម្ព័ន្ធមិត្តមួយក្រុមនេះ ផ្ដោតការងារខ្លាំងលើចិន៕
Tag:
អាមេរិក
អង់គ្លេស
ហុងកុង
ចិន
© រក្សាសិទ្ធិដោយ thmeythmey.com
