ប្រមាត់ គឺជាសរីរាង្គតូចមួយដែលស្ថិតនៅខាងក្រោមថ្លើម។ ប្រមាត់មានតួនាទីសំខាន់ក្នុងការស្តុកនិងបញ្ចេញទឹកប្រមាត់ចូលទៅក្នុងពោះវៀនដើម្បីជួយក្នុងដំណើរការរំលាយអាហារ ។ ការយល់ដឹងពីប្រភេទនៃអាហារដែលគួរ និងមិនគួរទទួលទាន គឺសំខាន់ណាស់ សម្រាប់អ្នកដែលកំពុងជួបប្រទះបញ្ហាថង់ទឹកប្រមាត់ ដូចជាជំងឺក្រួសក្នុងប្រមាត់ដើម្បីជៀសវាង ឬទប់ស្កាត់ផលវិបាកធ្ងន់ធ្ងរកើតឡើង។ របបអាហារត្រឹមត្រូវក៏ចាំបាច់ដូចគ្នាសម្រាប់អ្នកដែលចង់រក្សាបាននូវសុខភាពថង់ទឹកប្រមាត់ល្អប្រសើរ។ ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗទប់ស្កាត់ហានិភ័យនៃបញ្ហាក្រួសក្នុងថង់ទឹកប្រមាត់ ៖
១. ចៀសវាងរំលងមិនទទួលទានអាហារ
ទឹកប្រមាត់នៅក្នុងថង់ទឹកប្រមាត់ត្រូវបានបញ្ចេញនៅរាល់ពេលអ្នកទទួលទាន។ ប្រសិនបើអ្នករំលងមិនទទួលទានអាហារមួយពេលនោះទឹកប្រមាត់នឹងស្ថិតនៅក្នុងថង់ទឹកប្រមាត់រហូតដល់អ្នកដាក់អ្វីមួយចូលក្នុងមាត់ ហើយនេះបង្កើនហានិភ័យនៃក្រួសក្នុងថង់ទឹកប្រមាត់ឱ្យកើតមានឡើង។ ក្រៅពីនេះទម្លាប់នៃការរំលងមិនទទួលទានអាហារក៏អាចបង្កបញ្ហាផ្សេងៗពាក់ព័ន្ធប្រព័ន្ធរំលាយផងដែរ។
២. ទទួលទានឱ្យបានច្រើនគ្រប់គ្រាន់
ចូរព្យាយាមទទួលទានទឹកឱ្យបានប្រមាណ ២ លីត្រក្នុងមួយថ្ងៃជាប្រចាំដើម្បីរក្សាសុខភាពល្អប្រសើរចៀសផុតពីហានិភ័យនៃបញ្ហាជាច្រើនរួមបញ្ចូលទាំងបញ្ហាក្រួសក្នុងថង់ទឹកប្រមាត់។
៣. រក្សាភាពសកម្មនៃរាងកាយ
រាងកាយមានភាពសកម្មអាចជួយកម្ចាត់ ក៏ដូចជាទប់ស្កាត់បញ្ហាក្រួសក្នុងថង់ទឹកប្រមាត់គួរឱ្យកត់សម្គាល់ដោយវារក្សាដំណើរការមុខងារប្រព័ន្ធរំលាយអាហារ រួមបញ្ចូលទាំងថង់ទឹកប្រមាត់ឱ្យមានភាពប្រសើរត្រឹមត្រូវ។ ម្យ៉ាងវិញទៀតការធ្វើលំហាត់ប្រាណ ឬសកម្មភាពរាងកាយអាចជួយសម្រកទម្ងន់ដែលលើស ខណៈដែលភាពធាត់ជ្រុលបង្កើនហានិភ័យនៃបញ្ហាក្រួសក្នុងថង់ទឹកប្រមាត់។
៤. កាត់បន្ថយការទទួលទានខ្លាញ់មិនល្អ
ចូរព្យាយាមកាត់បន្ថយ ឬចៀសវាងការរួមបញ្ចូលខ្លាញ់មិនល្អក្នុងរបបអាហារ។ នេះក៏ព្រោះតែរបបអាហារដែលមានផ្ទុកជាតិខ្លាញ់មិនល្អកាន់តែច្រើន ទឹកមាត់ក៏ត្រូវបានផលិតកើនឡើងតាមនោះដែលអាចបង្កការរលាកដល់ថង់ទឹកប្រមាត់។ អ្នកអាចជ្រើសរើសទទួលទានរបបអាហារមានផ្ទុកជាតិខ្លាញ់ទាបដើម្បីទប់ស្កាត់បញ្ហាក្រួសក្នុងថង់ទឹកប្រមាត់។
៥. រួមបញ្ចូលរមៀតក្នុងរបបអាហារ
រមៀតមានផ្ទុកសារធាតុ Curcumin និងលក្ខណៈសម្បត្តិប្រឆាំងការរលាកដែលជួយទប់ស្កាត់បញ្ហាក្រួសក្នុងថង់ទឹកប្រមាត់បានយ៉ាងប្រសើរ៕
ត្រួតពិនិត្យដោយ www.health.com.kh