សេដ្ឋីរ៉ែចិនម្នាក់ ត្រូវឃាត់ខ្លួនពាក់ព័ន្ធរឿងរកស៊ីក្នុងតំបន់ភ្នំអភិរក្ស

អន្តរជាតិ

សេដ្ឋីរ៉ែចិនម្នាក់ ត្រូវឃាត់ខ្លួនពាក់ព័ន្ធរឿងរកស៊ីក្នុងតំបន់ភ្នំអភិរក្ស

11, Aug 2020 , 3:49 pm

រូបភាព

ប្រភពរូបពីកាសែតហុងកុង South China Morning Post

ដោយ:

សេដ្ឋីឧស្សាហកម្មរ៉ែរបស់ចិនម្នាក់ ត្រូវបានអាជ្ញាធរឃាត់ខ្លួនក្នុងខេត្តចិនភាគពាយព្យ ក្រោយរបាយការណ៍ព័ត៌មានមួយបានចោទលោកថាកាប់កាប់ជំនួញជីករ៉ែធ្បូងថ្មខុសច្បាប់យ៉ាងបើកចំហ ក្នុងតំបន់ភ្នំអភិរក្សរបស់រដ្ឋាភិបាលចិន។

អាជ្ញាធរចិនក្នុងខេត្ត Qinghai បានប្រកាសកាលពីថ្ងៃ៩ ខែសីហាថា លោក Ma Shaowei ម្ចាស់ក្រុមហ៊ុនជីករ៉ែ ឈ្មោះថា Xinqing ត្រូវបានឃុំឃាំងខ្លួន ហើយមន្ត្រីចិន៥នាក់ទៀត ក្នុងទីក្រុង Haixi ក៏ត្រូវបានដកហូតតំណែង និងដាក់ក្រោមការស៊ើបអង្កេតប្រឆាំងអំពើពុករលួយ។ នេះបើតាមការចុះផ្សាយកាសែតហុងកុង South China Morning Post ។

ការប្រកាសពីការចាប់ខ្លួនសេដ្ឋីចិនក្នុងឧស្សាកម្មរ៉ែនេះ ធ្វើឡើងក្រោយសារព័ត៌មានចិន Economic Information Daily ដែលជាកាសែតសាខាជាមួយទីភ្នាក់ងារព័ត៌មានរដ្ឋចិន Xinhua បានរាយការណ៍កាលពីសប្តាហ៍មុនថា ក្រុមហ៊ុនរុករករ៉ែ Xinqing របស់លោក Ma រកចំណូលបានរហូតដល់២,១៥ពាន់លានដុល្លារ ក្នុងពេល១៤ឆ្នាំ ពីប្រតិបត្តិការជីកយករ៉ែធ្បូងថ្មខុសច្បាប់ក្នុងតំបន់ភ្នំ Qilian ។

យោងតាមការស៊ើបអង្កេតអស់ពេល២ឆ្នាំរបស់កាសែតចិនខាងលើ ក្រុមហ៊ុននេះ បានប្រតិបត្តិការខួងរ៉ែធ្បូងថ្ម ចាប់តាំងពី ឆ្នាំ២០០៦មក ដោយគ្មានលិខិតអនុញ្ញាតឲ្យធ្វើអាជីវកម្មឡើយ។

ទាក់ទិនបញ្ហានេះ លោក Li Jiexiang អភិបាលរងនៃខេត្ត Qinghai អះអាងថា ការស៊ើបអង្កេតបឋមរបស់អាជ្ញាធរ បានរកឃើញថា ក្រុមហ៊ុន Xinqing នេះបានប្រតិបត្តិការជីករ៉ែដោយខុសច្បាប់មែន។ លោកបន្ត ក្រុមការងារចំនួន២ មកពីក្របខណ្ឌប៉ូលិស និងទីភ្នាក់ងារប្រឆាំងអំពើពុករលួយ នឹងស៊ើបអង្កេតបន្តលើរឿងអាស្រូវខាងលើនេះ។

សូមបញ្ជាក់ថា កិច្ចការពារបរិស្ថាន គឺជាអាទិភាពដ៏សំខាន់មួយរបស់ប្រធានាធិបតីចិន ស៊ី ជិនភីង ចាប់តាំងពីឡើងកាន់អំណាចក្នុងឆ្នាំ២០១២មក ហើយចន្លោះពីឆ្នាំ២០១៤ និងឆ្នាំ២០១៦ ប្រមុខរដ្ឋរូបនេះ តែងចេញការណែនាំអំពីការអភិរក្សជួរភ្នំ Qilian ។ នេះបើយោងតាមភាពយន្តឯកសាររបស់ទូរទស្សន៍រដ្ឋចិន CCTV ។

តួយ៉ាង ក្នុងឆ្នាំ២០១៧ មន្ត្រីជាង១០០នាក់ រួមទាំងមន្ត្រីជាន់ខ្ពស់បក្សកុម្មុយនីស្តរបស់ចិនផងនោះ ត្រូវបានដាក់ទោសសម្រាប់ការបរាជ័យអនុវត្តបញ្ជាទាំងនេះរបស់លោកប្រធានាធិបតី។ មន្ត្រីជាន់ខ្ពស់រូបនោះ ចុងក្រោយ ត្រូវបានបណ្ដេញចេញពីបក្ស ហើយជាប់គុក១២ឆ្នាំសម្រាប់អំពើពុករលួយ។

ក្នុងឆ្នាំ២០១៩ លោក ស៊ី ក៏បានចុះទៅពិនិត្យផ្ទាល់ដល់ទីតាំងភ្នំនោះផងដែរ ដោយអះអាងថា ជួរភ្នំ Qilian គឺជាខែលដ៏សំខាន់សម្រាប់សន្តិសុខអេកូឡូស៊ី ក្នុងភាគខាងលិចប្រទេសចិន ហើយការអភិរក្សវា គឺជាសារសំខាន់ផ្នែកយុទ្ធសាស្ត្រដើម្បីការពារបរិស្ថានប្រទេស៕