ពីនេះ ពីនោះ
ប្រភេទត្រីទឹកសាបជាច្រើនបានធ្លាក់ចុះ ៧៦ ភាគរយ ក្នុងរយៈពេលតិចជាង ៥០ ឆ្នាំ (ត) អន្ទង់អឺរ៉ុប ប្រភេទកំពុងរងគ្រោះជិតផុតពូជ ក្នុងរូបនេះវាកំពុងស្ថិតនៅបាតទន្លេមួយ នៅក្នុងប្រទេសបារាំង នេះប្រហែលជាប្រភេទមច្ឆជាតិដែលធ្វើចរាចរផ្លាស់ទីដ៍សែនឆ្ងាយជាងគេបំផុតមួយ ពីសមុទ្រសាហ្គាសសូ (Sargasso) ទៅដល់ទន្លេនៅអឺរ៉ុប និងត្រឡប់មកវិញ ក្នុងចម្ងាយផ្លូវ ប្រហែល ១៦,០៩៣គីឡូម៉ែត្រ។ វាប្រឈមនឹងការគំរាមកំហែងពីស្ថានីយ៍ទឹកវារិអគ្គិសនី ការបំពុល និងការនេសាទ។ រូបភាព៖ Bruno Guenard ពី Minden Pictures។
×
ដោយ៖ STEFAN LOVGREN / National Geographic
លោក Herman Wanningen អ្នកជីវវិទូផ្នែកវារិជាតិ និងជានាយកផ្នែកច្នៃប្រឌិត នៃមូលនិធិ ការផ្លាស់ទីរបស់មច្ឆជាតិពិភពលោក នៅទីក្រុង Groningen ក្នុងប្រទេសហូឡង់ បាននិយាយថា «ការធ្វើចរាចរផ្លាស់ទីរបស់ត្រី មានសារៈសំខាន់ណាស់ ទាំងផ្នែកសេដ្ឋកិច្ច និងប្រព័ន្ធអេកូឡូស៊ី ប៉ុន្តែជារឿយៗ យើងតែងតែមើលរំលងពីចំណុចទាំងនេះ។»
នៅក្នុងរបាយការណ៍ បានចង្អុលបង្ហាញពីការរិចរិលនៃទីជម្រក ការផ្លាស់ប្តូរ និងការបាត់បង់ទីជម្រក ដែលជាការគំរាមកំហែងធំបំផុតមួយ ចំពោះប្រភេទត្រីធ្វើចរាចរផ្លាស់ទីទាំងអស់។ កាន់តែធ្ងន់ធ្ងរជាងនេះថែមទៀតនោះគឺ ទំនប់វារិអគ្គិសនី និងរបាំងកាត់ទន្លេជាច្រើន ដែលរារាំងមិនឲ្យត្រីធ្វើចរាចរផ្លាស់ទីទៅដល់កន្លែងបង្កាត់ពង-កូន ឬរកចំណីរបស់ពួកវា ដែលរំខានដល់វដ្តជីវិតរបស់ពួកវាយ៉ាងខ្លាំង។ យោងតាមការសិក្សាមួយកាលពីឆ្នាំមុន បានបង្ហាញថា មានតែមួយភាគបី (១/៣)នៃទន្លេធំៗ នៅលើពិភពលោកប៉ុណ្ណោះ ដែលមានលំហូរទឹកដោយសេរីពុំមានការរំខាន។
កត្តានេះ អាចពន្យល់ពីមូលហេតុទ្វីបអឺរ៉ុប ដែលមានទន្លេធំៗ មួយចំនួន នៅមិនមានសំណង់ទំនប់ ក្រោយបានមើលឃើញការធ្លាក់ចុះយ៉ាងខ្លាំង នៃប្រភេទត្រីធ្វើចរាចរផ្លាស់ទីដ៏ធំបែបនេះ។ ពពួកត្រីមួយប្រភេទដែលធ្វើចរាចរផ្លាស់ទីខ្លាំង ត្រូវបានគេរកឃើញនៅអឺរ៉ុប នោះគឺត្រីស្ទើចៀន (sturgeon) ការធ្វើចរាចររបស់វាបានធ្លាក់ចុះជាង ៩០ភាគរយ ចាប់តាំងពីឆ្នាំ១៩៧០។ នេះជាការធ្លាក់ចុះដ៏ធំបំផុតក្នុងចំណោមប្រភេទត្រីធ្វើចរាចផ្លាស់ទីជិត ២៥០ប្រភេទ ដែលត្រូវបានគេឃ្លាំមើលដើម្បីធ្វើរបាយការណ៍។ ក្នុងចំណោមត្រីស្ទើចៀន (sturgeon) ចំនួន ៦ប្រភេទ យ៉ាងហោចណាស់ មានត្រីស្ទើចៀន (sturgeon) មួយប្រភេទ ជាប្រវត្តិសាស្ត្រ ដែលហែលនៅក្នុងទន្លេដានយុប Danube (ទន្លេដានយុប មានប្រវែង ២៨៥០គីឡូម៉ែត្រ មានប្រភពចេញពីប្រទេសអាល្លឺម៉ង់ ហូរកាត់ចំនួន ១១ប្រទេស គឺប្រទេសអូទ្រីស ស្លូវ៉ាគី ហុងគ្រី ក្រូអាត ស៊ែប រ៉ូម៉ានី ប៊ុលហ្គារី ម៉ុលដាវី និងអ៊ុយក្រែន មុនពេលចាក់ចូលសមុទ្រខ្មៅ) ត្រូវបានគេជឿថា វាផុតពូជទៅហើយ និងក្រៅពីនេះភាគច្រើន ត្រូវបានកត់ត្រាក្នុងបញ្ជីជាប្រភេទត្រី កំពុងរង់រគ្រោះជិតផុតពូជ (សូមចូលអានអំពីប្រភេទត្រីធ្វើចរាចរផ្លាស់ទីផ្សេងទៀត ដែលប្រហាក់ប្រហែលនឹងត្រីស្ទើចៀន វាមានឈ្មោះថា Chinese paddlefish ដែលត្រូវបានគេប្រកាសថាផុតពូជនៅដើមឆ្នាំ២០២០។ (សូមរង់ចាំអាននៅវគ្គបន្ត)
© រក្សាសិទ្ធិដោយ thmeythmey.com