ជាតិ
លោក កែន ហេង ចែករំលែកបច្ចេកទេសចិញ្ចឹមត្រី និងកង្កែបដល់ពលរដ្ឋផ្សេងទៀតនៅបរសេដ្ឋ
រដ្ឋមន្រ្តីកសិកម្ម (រូបនៅកណ្ដាល ពាក់វែនតា) ចុះពិនិត្យទីតាំងចិញ្ចឹមកង្កែប ត្រី របស់កសិករក្នុងខេត្តកំពង់ស្ពឺថ្ងៃទី ៩ សីហា ២០២០ រូបភាពពី Facebook វេង សាខុន
×![]()
លោក កែន ហេង ជាកសិករគំរូ ដែលរស់នៅភូមិត្រពាំងឈូក ឃុំនិទាន ស្រុកបរសេដ្ឋ ខេត្តកំពង់ស្ពឺ។ គាត់ បានចាប់ផ្ដើមការចិញ្ចឹមត្រី និងកង្កែប តាំងពីឆ្នាំ២០០១មកម្ល៉េះ។ ក្រៅពីចិញ្ចឹមត្រី និងកង្កែប លោក កែន ហេង ក៏ស្ទាត់ជំនាញ ការងារបង្កាត់ពូជត្រី និងកង្កែបផងដែរ ដោយគាត់ទទួលបានការបណ្តុះបណ្តាលបច្ចេកទេស ជាហូរហែ ពីអ្នកជំនាញកសិកម្ម។ នេះបើតាមបញ្ជាក់របស់លោក វេង សាខុន នៅគណនីហ្វេសប៊ុក អមដោយរូបភាពនាពេលលោក ចុះសួរសុខទុក្ខ ពលរដ្ឋខេត្តកំពង់ស្ពឺ កាលពីថ្ងៃទី៩ ខែសីហា ឆ្នាំ២០២០។
ក្នុងនាមជាកសិករគំរូ លោក កែន ហេង មិនត្រឹមតែបានផ្ទេរបច្ចេកទេសចិញ្ចឹមត្រី និងកង្កែប ដល់កសិករផ្សេងទៀតនោះទេ លោក ហេង ក៏មានចែកចាយពូជត្រី និងកង្កែបនេះ ទៅដល់កសិករផងដែរ។ នេះបើតាមលោក វេង សាខុន ដែលបានបន្តបញ្ជាក់ទៀត កសិករ កែន ហេង អាចរកចំណូល បានពី ២៥លានរៀល ទៅ៣០លានរៀល ក្នុងមួយឆ្នាំៗពីការចិញ្ចឹមត្រី-កង្កែប និងការលក់ពូជសត្វទាំងពីរប្រភេទនេះ។
ខេត្តកំពង់ស្ពឺ មានបណ្តុំវារីវប្បករចំនួន១១កន្លែង ស្មើនឹងជាង២០០គ្រួសារ ក្នុងនោះមានកន្លែងបង្កាត់ និងភ្ញាស់កូនត្រី៣ កន្លែង ដែលអាចផលិតកូនបាន ៤៨៥ ០០០ក្បាល។ កន្លែងបង្កាត់ និងភ្ញាស់កូនកង្កែបមាន ៤ កន្លែង អាចផលិតកូនបាន ២៣៥ ០០០ក្បាល។ ១២គ្រួសារ ចិញ្ចឹមបង្កងអូស្ត្រាលីចំនួន ៣៣២០ក្បាល និងមួយគ្រួសារទៀត ចិញ្ចឹមបង្កងទឹកសាបចំនួន ៧០ ០០០ក្បាល។ នេះបើតាមរបាយការណ៍ របស់មន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ស្ពឺ៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 6 ថ្ងៃ
