ជាតិ
ពីនេះ ពីនោះ
កំណត់ត្រាពិស្តារលើកដំបូងនៃសិប្បីជាតិចំនួន ៣១ប្រភេទ នៅក្នុងអាងទន្លេសាប ប្រភេទគ្រំ លៀសនៅក្នុងអាងទន្លេសាប។ រូបភាព៖ TH Ng (A-C) and K Macharoenboon (D-G)
× លោកបណ្ឌិត ង៉ោ ប៉េងប៊ុន ជាអ្នកស្រាវជ្រាវ របស់វិទ្យស្ថានស្រាវជ្រាវ និងអភិវឌ្ឍន៍ជលផលទឹកសាប នៃរដ្ឋបាលជល ដោយមាការគាំទ្រពីគម្រោងអច្ឆរិយភាពនៃទន្លេមេគង្គ ថ្មីៗនេះ លោកនឹងសហការីបានធ្វើការសិក្សាស្រាវជ្រាវ និងចងក្រងជាឯកសារមួយ អំពីសិប្បីជាតិនៅក្នុងអាងទន្លេសាប។ នេះជាឯកសារលម្អិតលើកដំបូង ស្តីពីសិប្បីជាតិទឹកសាបនៅក្នុងអាងទន្លេសាប នៃប្រទេសកម្ពុជា។ សំណាកសិប្បីសត្វទាំងនេះ ត្រូវបានថែរក្សាទុកនៅបន្ទប់ថែរក្សាសំណាកវារិជាតិ របស់វិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាប នៃរដ្ឋបាលជលផល សម្រាប់ការប្រើប្រាស់បែបវិទ្យាស្ត្រ ដូចជាការធ្វើសុពលភាព និងការសិក្សានានា ដើម្បីលើកកម្ពស់ការយល់ដឹងឲ្យបានទូលំទូលាយទៅលើប្រភេទសត្វទាំងនេះ។
បឹងទន្លេសាប គឺជាចំណុចដ៏សំខាន់នៃជីវចម្រុះទឹកសាប ដែលគាំទ្រដល់ជលផលទឹកសាបដ៏ធំបំផុតមួយរបស់ពិភពលោក។ ពពួកសិប្បីជាតិ បានដើរតួនាទីយ៉ាងសំខាន់ ក្នុងការជួយទ្រទ្រង់ប្រព័ន្ធអេកូឡូស៊ីនៅក្នុងអាងទន្លេសាប និងជីវភាពរស់នៅប្រចាំថ្ងៃរបស់ប្រជាពលរដ្ឋ។ ដូចពពួកមច្ឆជាតិដែរ បច្ចុប្បន្ននេះ ពពួកសិប្បីសត្វទាំងនេះ កំពុងស្ថិតនៅក្នុងចំណោមពពួកវារិសត្វគោលដៅ ដែលត្រូវធ្វើអាជីវកម្ម។ ជារៀងរាល់ឆ្នាំ សិប្បីជាតិរាប់ពាន់តោន ត្រូវបានគេប្រមូលចេញពីបាតអាងទន្លេសាប ជាពិសេសពពួកខ្យង និងលៀស។ ទោះបីសិប្បីជាតិមានសារៈសំខាន់ក៏ដោយ ក៏ប៉ុន្តែ ការធ្វើបច្ចុប្បន្នភាពអំពីស្ថានភាពផលស្តុក និងផលប៉ះពាល់ផ្សេងៗ ដែលបង្កឡើងដោយសកម្មភាពរបស់មនុស្សទៅលើពួកវាទាំង ត្រូវបានធ្វើឡើងតិចតួចនៅឡើយ នៅក្នុងអាងទន្លេសាប ក៏ដូចជានៅក្នុងអាងទន្លេមេគង្គទាំងមូលផងដែរ។
ប្រភេទគ្រំ នៅក្នុងអាងទន្លេសាប។ រូបភាព៖ K Macharoenboon
យោងតាមការឯកសារចាស់ដែលបានកត់ត្រាទុកបានឲ្យដឹងថា យ៉ាងហោចណាស់មានសិប្បីជាតិទឹកសាបចំនួន ១៥៣ ប្រភេទ បានមកពីទូទាំងប្រទេសកម្ពុជា ត្រូវបានប្រមូល និងកត់ត្រាទុក។ ក្នុងនោះមាន ៣៣ ប្រភេទ បានមកពីអាងទន្លេសាប។
ការចុះប្រមូលសំណាកសិប្បីជាតិនៅបឹងទន្លេសាប និងតាមតំបន់ជុំវិញបឹង បានរកឃើញសិប្បីជាតិចំនួន ៣១ ប្រភេទ នៅក្នុងអាងទន្លេសាប រួមទាំងកំណត់ត្រាថ្មីចំនួន ៣ ប្រភេទ នៅក្នុងនោះរូមមាន៖ (Scaphula minuta, Novaculina siamensis, Wattebledia siamensis)។ វត្តមាននៃខ្យង Pomacea maculata ដែលប្រភេទក្រៅស្រុក កំពុងរាតត្បាតជាសកល និងប្រភេទគ្រំតូចៗ ដែលងាយកើតដូចជា Limnoperna fortunei ក៏ជាក្តីបារម្ភមួយដែរ។
សូមចុចលើតំណភ្ជាប់ខាងក្រោមនេះ ដើម្បីទទួលបានព័ត៌មានលម្អិតពីលទ្ធផលនៃការសិក្សាស្រាវជ្រាវនេះ។
© រក្សាសិទ្ធិដោយ thmeythmey.com