សហព័ន្ធខ្មែរកីឡាហែលទឹកមិនចង់មានប្រវត្តិដូចប្រទេសឡាវ និងមីយ៉ាន់ដែលធ្វើជាម្ចាស់ផ្ទះការប្រកួតកីឡាស៊ីហ្គេម ហើយមិនដណ្តើមបានមេដាយនោះឡើយ។ លោក ហែម គីរី អគ្គលេខាធិការសហព័ន្ធខ្មែរកីឡាហែលទឹក ប្តេជ្ញាថា នឹងខិតខំប្រឹងប្រែងឲ្យអស់ពីលទ្ធភាពក្នុងការប្រជែងដណ្តើមមេដាយពីព្រឹត្តិការណ៍កីឡាស៊ីហ្គេមនៅឆ្នាំ២០២៣។ ជាមួយគ្នានេះ លោក ក៏បានបង្ហាញពីក្តីកង្វល់ និងបញ្ហាប្រឈមមួយចំនួនរបស់សហព័ន្ធផងដែរ។
លោក ហែម គីរី អគ្គលេខាធិការសហព័ន្ធខ្មែរកីឡាហែលទឹក មិនចង់ឲ្យប្រវត្តិរបស់ឡាវ និងមីយ៉ាន់ម៉ា ដែលមិនដណ្តើមបានមេដាយសោះលើវិញ្ញាសាហែលទឹកពេលពួកគេធ្វើជាម្ចាស់ផ្ទះការប្រកួតកីឡាស៊ីហ្គេមកើតមាននៅកម្ពុជាឡើយ។ លោកជឿជាក់ថា កីឡាករកីឡាការិនីកម្ពុជានឹងអាចមានសមត្ថភាពគ្រប់គ្រាន់ក្នុងការប្រជែងដណ្តើមមេដាយក្នុងព្រឹត្តិការណ៍កីឡាស៊ីហ្គេមនៅឆ្នាំ២០២៣ ដែលកម្ពុជាធ្វើជាម្ចាស់ផ្ទះ។
«នៅតំបន់អាស៊ានមានប្រទេសចំនួនពីរដែលប្រឈមបញ្ហាលើវិញ្ញាសាកីឡាហែលទឹកព្រោះជាគោលការណ៍វិញ្ញាសាកីឡាហែលទឹកនិងអត្តពលកម្មត្រូវតែមានដាច់ខាត។ ប្រទេសឡាវ និងមីយ៉ាន់ម៉ា ដែលជាម្ចាស់ផ្ទះស៊ីហ្គេមកន្លងមក គាត់ប្រឈមបញ្ហាអត់ដណ្តើមបានមេដាយសោះលើវិញ្ញាសាកីឡាហែលទឹក ដូច្នេះក្នុងនាមជាអ្នកអនុវត្តការងារ និងមានការចង្អុលបង្ហាញពីឯកឧត្តមប្រធានសហព័ន្ធ គឺកម្ពុជាអត់ចង់បានលទ្ធផលបែបនេះទេ»។ នេះជាការលើកឡើងរបស់លោក ហែម គីរី។
ទន្ទឹមនឹងការលើកឡើងនេះ លោក បានបង្ហាញផែនការ និងយុទ្ធសាស្ត្រសំខាន់ៗមួយចំនួន ដែលរំពឹងថា ផែនការនិងយុទ្ធសាស្ត្រទាំងនោះនឹងអាចជួយឲ្យខ្លួនសម្រេចគោលដៅនៅស៊ីហ្គេមឆ្នាំ២០២៣។ បើតាមលោក ហែម គីរី សហព័ន្ធខ្មែរកីឡាហែកទឹកនឹងបញ្ជូនកីឡាករមួយចំនួនទៅហ្វឹកហាត់រយៈពេលវែងនៅប្រទេសចិន ក្រោយស្ថានភាពឆ្លងរីករាលដាលនៃជំងឺកូវីដ-១៩ មានភាពធូរស្បើយ។ សហព័ន្ធក៏មានគម្រោងបញ្ជូនកីឡាករទៅហ្វឹកហាត់នៅប្រទេសថៃផងដែរ។
លើសពីនេះ សហព័ន្ធនឹងព្យាយាមស្វែងរកកីឡាករសក្តានុពលដែលមានសញ្ជាតិខ្មែរនៅតាមបណ្តាប្រទេសផ្សេងៗនៅលើពិភពលោក ដើម្បីឲ្យពួកគេចូលរួមប្រកួតតំណាងឲ្យកម្ពុជានៅឆ្នាំ២០២៣។ លោក ហែម គីរី អះអាងថា លោកកំពុងធ្វើការលើបញ្ហានេះ តាមរយៈការទាក់ទងទៅកាន់សមាគមខ្មែរនៅក្រៅប្រទេស។
លោកបានបន្ថែមថា៖«ដូចខ្ញុំលើកឡើងពីផែនការទី៣យុទ្ធសាស្ត្រយកប្រៀប គឹយើងសង្កត់ធ្ងន់លើវិញ្ញាសាណា ដែលយើងរំពឹងថា អាចដណ្តើមមេដាយបាន។ វិញ្ញាសាហែលទឹក ដែលសហព័ន្ធកីឡាអន្តរជាតិទទួលស្គាល់រួមមានហែលទឹក លោតទឹក បាល់ទឹក របាំក្នុងទឹក និងហែលទឹកចម្ងាយឆ្ងាយ(Open Water)។ ប៉ុន្តែក្នុងនោះមានវិញ្ញាសាថ្មីមួយ គឺហែលទឹកពាក់កន្ទុយ ដែលកម្ពុជាយើងកំពុងសិក្សាថា យើងនឹងរៀបចំនៅស៊ីហ្គេមឆ្នាំ២០២៣»។
ជាមួយគ្នានេះ លោក បានបង្ហាញពីឆន្ទៈរបស់សហព័ន្ធយ៉ាងដូច្នេះថា៖«យើងនឹងប្រឹងប្រែងឲ្យអស់ពីលទ្ធភាពដល់ដំណាក់កាលចុងក្រោយ។ ឆន្ទៈរបស់យើង គឺយ៉ាងណាយើងត្រូវតែដណ្តើមមេដាយឲ្យបានជូនជាតិ ព្រោះកន្លងមកសហព័ន្ធយើងបានខិតខំប្រឹងប្រែងខ្លាំង តែមិនទាន់ដល់កម្រិតដែលយើងចង់បាន»។
លោកបានបន្ថែមទៀតថា៖«ក្នុងនាមជាអ្នកកីឡា គឺយើងត្រូវតែតាំងចិត្តថា នឹងព្យាយាមប្រឹងប្រែងដណ្តើមជ័យជម្នះ តែនេះជាកត្តានិយាយ។ ប៉ុន្តែកត្តាជាក់ស្តែងយើងត្រូវមើលទៅលើបញ្ហា និងឧបសគ្គផ្សេងៗ ដែលយើងជួបប្រទះ ក៏ដូចជាបញ្ហាប្រឈមដែលយើងកំពុងធ្វើការ យើងត្រូវប៉ាន់ប្រមាណថា យើងដល់កម្រិតណា?»៕