ជាតិ
សង្គមជាតិ
សណ្ឋាគារធំៗទទួលការកក់បន្ទប់ជាបណ្ដើរៗ រំពឹងអាចស្រោចស្រង់អាជីវកម្មបានមួយផ្នែក
×![]()
សៀមរាប៖ រដ្ឋបាលខេត្តសៀមរាប នឹងរៀបចំកម្មវិធីកម្សាន្តរយៈពេល៥ថ្ងៃ កំឡុងពេលឈប់សម្រាកដែលរាជរដ្ឋាភិបាល សងជំនួសថ្ងៃបុណ្យចូលឆ្នាំកាលពីខែមេសា នៅពេលមានការព្រួយបារម្ភចំពោះការរាតត្បាតជំងឺកូវីដ-១៩ ខ្លាំង។ រដ្ឋបាលខេត្តរំពឹងថា កម្មវិធីដែលរៀបចំនៅពេលនេះ នឹងអាចធ្វើឱ្យចរន្តវិស័យទេសចរណ៍ក្នុងខេត្តបេតិកភណ្ឌមួយនេះ ងើបវិញខ្លះៗ ឱ្យអាជីវករមានក្ដីសង្ឃឹមឡើងវិញ លើវិស័យមួយនេះ។ អ្នកគ្រប់គ្រងសណ្ឋាគារមួយចំនួនក្នុងក្រុងសៀមរាប ប្រាប់សារព័ត៌មានថ្មីៗថា ពួកគេទទួលបានការកក់ជាបណ្ដើរៗ ពីអតិថិជនជាទេសចរក្នុងស្រុក និងបង្ហាញក្ដីសង្ឃឹមថា ទេសចរនឹងមកកម្សាន្តខេត្តសៀមរាប ក្នុងចំនួនច្រើននាថ្ងៃឈប់សម្រាករយៈពេលយូរនេះ។
រដ្ឋបាលខេត្តសៀមរាប បានប្រកាសពីការរៀបចំកម្មវិធីកម្សាន្តរយៈពេល៥ថ្ងៃ គឺចាប់ពីថ្ងៃទី១៧ ដល់ថ្ងៃទី២១ សីហា ដែលក្នុងនោះមានទាំងកម្មវិធីសាសនា ពិព័រណ៍ម្ហូបអាហារ ផ្សារអណ្ដែតទឹក និងការលេងល្បែងកម្សាន្ត។ល។ ក្នុងនោះ តំបន់ផាប់ស្ទ្រីត ដែលកន្លែងកម្សាន្តធំជាងគេនៅកណ្ដាលក្រុង ក៏បើកដំណាលគ្នានេះដែរ។ អភិបាលខេត្តសៀមរាប លោក ទៀ សីហា ប្រាប់សារព័ត៌មានថ្មីៗនៅសប្ដាហ៍មុនថា កម្មវិធីទាំងនេះធ្វើឡើងក្នុងបំណង ឱ្យចរន្តវិស័យទេសចរណ៍ខេត្តដំណើរការវិញ ទោះក្នុងកម្រិតណាក៏ដោយ។
ម្ចាស់សណ្ឋាគារ មេម៉រ លោក កៅ ហ្វីលីព បានបង្ហាញការគាំទ្រចំពោះពិធីខាងលើ។ លោកយល់ថា រដ្ឋបាលខេត្តបានរៀបចំកម្មវិធីជាច្រើន និងដោយមានការគិតគូរយ៉ាងដិតដល់ដល់សុវត្ថិភាពអ្នកចូលរួម ការបង្ការ និងទប់ស្កាត់ជំងឺកូវីដ១៩។ តាមការបញ្ជាក់របស់លោក ហ្វីលីព មកដល់ពេលនេះ សណ្ឋាគាររបស់លោក ទទួលបានការកក់បន្ទប់បណ្ដើរៗហើយ និងរំពឹងថា ទទួលការកក់បន្ថែមនៅកៀកថ្ងៃប្រារព្ធពិធី។
ចំណែកអ្នកគ្រប់គ្រងសណ្ឋាគារ The Sanctuary Residence លោកស្រី ហួរ វណ្ណល័ក្ខ ក៏មានការរំពឹងថានឹងទទួលការកក់បន្ទប់ពេញនារដូវនេះដែរ។ លោកស្រីយល់ថា ការរៀបចំកម្មវិធី និងតុបតែងលម្អក្រុងរបស់រដ្ឋបាលខេត្ត គឺបានជួយជំរុញចរន្តទេសចរណ៍ក្នុងខេត្តបានច្រើន ដោយសារជាសកម្មភាពថ្មីមិនធ្លាប់មាន និងមានភាពទាក់ទាញ។ បន្ថែមពីនេះលោកស្រីស្នើឱ្យរដ្ឋបាលខេត្ត គួរពិចារណា អាចបន្តរៀបចំដូច្នេះ បើទោះបីផុតថ្ងៃប្រារព្ធពិធីក្ដី ព្រោះការរៀបចំតុបតែងនេះ ជាផ្នែកមួយទាក់ទាញទេសចរក្នុងកម្រិតណាមួយផងដែរ។
ងាកទៅសណ្ឋាគារ ហ៊ីលឡក់ Hillocks Hotel & Spa ក៏ទទួលការកក់ពេញកំឡុងថ្ងៃឈប់សម្រាកខាងមុខនេះដែរ។ ប្រធានផ្នែកការិយាល័យជួរមុខ និងគេហកិច្ច លោកស្រី ឈា ផល្លី ប្រាប់ថា ថ្ងៃទី១៦,១៧ និង១៨ បន្ទប់ទាំង៣៨ នៅសណ្ឋាគារខ្លួន ត្រូវបានភ្ញៀវកក់ពេញតែម្ដង។ ហើយកំឡុងថ្ងៃ២០ ទទួលបានការកក់ខ្លះៗ ហើយរំពឹងថា អាចពេញផងដែរ។ នេះជាការបញ្ជាក់ពីថ្នាក់ដឹកនាំសណ្ឋាគារ ហ៊ីលឡក់។ លោកស្រីយល់ថា ការរៀបចំពិធីខាងលើ ជាយុទ្ធសាស្ដ្រដែលរដ្ឋបាលខេត្តខិតខំប្រឹងប្រែងជួយវិស័យឯកជន ស្របពេលដែលបច្ចុប្បន្នទេសចរក្នុងស្រុក មានដំណើរកម្សាន្តច្រើន ហើយខេត្តសៀមរាបជាគោលដៅមួយសម្រាប់ពួកគេ៕
អ្នកនា ឈា ផល្លី ប្រធានផ្នែកការិយាល័យជួរមុខ និងគេហកិច្ច នៅសណ្ឋាគារ ហ៊ីលឡក់ Hillocks Hotel & Spa
Tag:
ទេសចរណ៍
អង្គរ
© រក្សាសិទ្ធិដោយ thmeythmey.com
