អន្តរជាតិ
នយោបាយអន្តរជាតិ
បាតុករថៃ ទាមទារឲ្យមានកំណែទម្រង់នយោបាយ និងការកាត់បន្ថយអំណាចព្រះមហាក្សត្រ បាតុករជាង១ម៉ឺននាក់ជួបជុំគ្នានៅវិមានប្រជាធិបតេយ្យ។ រូបភាព៖ AFP
× យ៉ាងហោចណាស់បាតុករថៃ១ម៉ឺននាក់ បានជួបជុំគ្នាធ្វើបាតុកម្មដ៏ធំបំផុតតាំងតែពីរដ្ឋប្រហារយោធាឆ្នាំ២០១៤ ដោយទាមទារឲ្យមានកំណែទម្រង់នយោបាយ។ បាតុកម្មនេះ ធ្វើឡើងនៅថ្ងៃទី១៦ សីហា ដោយរៀបចំដោយចលនាយុវជន និងនិស្សិតប្រឆាំងរដ្ឋាភិបាល និងប្រជាធិបតេយ្យនិយមដែលមានឈ្មោះថា Free People។ នេះយោងតាមទីភ្នាក់ងារព័ត៌មាន AFP។
«ការបំផុសគំនិតតែមួយគត់របស់ Free People គឺសេចក្តីសង្ឃឹម ក្នុងការសម្រេចឲ្យបាននូវប្រទេសថៃដែលមានរដ្ឋាភិបាលប្រជាធិបតេយ្យ ដោយមានរបបរាជានិយមអាស្រ័យរដ្ឋធម្មនុញពិតប្រាកដ»។ នេះជាការលើកឡើងក្នុងសេចក្តីថ្លែងការណ៍របស់ក្រុមយុវជន។
នៅក្នុងបាតុកម្មនេះ ក្រុមបាតុករបានដាក់សំណើរទាមទារឲ្យរដ្ឋាភិបាលរបស់លោក ប្រាយុទ្ធ ចាន់អូចារ រំលាយរដ្ឋសភា វិសោធនកម្មរដ្ឋធម្មនុញ្ញ និងបញ្ឈប់ការបំពានដោយមន្ត្រីរដ្ឋាភិបាល។ បន្ថែមពីនេះ ក្រុមបាតុករក៏បានដាក់ចេញនូវលក្ខខណ្ឌផ្សេងទៀតចំនួន២ ដែលទាមទារមិនឲ្យមានរដ្ឋប្រហារយោធា និងមិនឲ្យមានរដ្ឋាភិបាលរួបរួមជាតិឡើយ។
ក្រៅតែពីនេះ ក៏មានផងដែរការរទាមទារឲ្យមានកំណែទម្រង់របបរាជានិយមចំនួន១០ចំណុច ដែលរួមមានការកាត់បន្ថយអំណាចព្រះមហាក្សត្រ។ ក្រុមបាតុករបានទាមទាឲ្យបញ្ឈប់ការប្រើមាត្រា១១២ នៃក្រមព្រហ្មទណ្ឌថៃដែលដាក់ទោសដល់ទៅ១៥ឆ្នាំចំពោះអ្នកបរិហារ ប្រមាថ ឫគម្រាមព្រះមហាក្សត្រ មហាក្សត្រិយានី និងទាយាទ។
បាតុកម្មនេះចាប់ផ្តើមនៅរសៀលថ្ងៃទី១៦ សីហា ដោយធ្វើការជួបជុំនៅជិតវិមានប្រជាធិបតេយ្យ ខណៈបាតុករចូលរួមនាំគ្នាឈរបន្តរហូតដល់រុក្ខវិថីRatchadamnoen។ បាតុកម្មនេះ ធ្វើឡើងអស់រយៈពេល៨ម៉ោងនិងបានរំសាយនៅពេលយប់ដោយសន្តិវិធី ប៉ុន្តែលោក Tattep Ford Ruangprapaikitseree អ្នកដឹកនាំយុវជនបានអះអាងថា បើសិនជាគ្មានការកែប្រែពីរដ្ឋាភិបាលទាក់ទងនឹងការទាមទាររបស់ពួកគេត្រឹមខែកញ្ញាទេ គេនឹងពង្រីកសកម្មភាពរបស់គេ និងជួបជុំគ្នាជាថ្មីម្តងទៀតនៅវិមានប្រជាធិបតេយ្យ។
សូមរំលឹកផងដែរថា ជាង១ខែមកហើយ បាតុកម្មដឹកនាំដោយក្រុមនិស្សិតបានផ្ទុះឡើងនៅជុំវិញប្រទេសដើម្បីប្រឆាំងទៅនឹងរដ្ឋាភិបាលរបស់លោកប្រាយុទ្ធ ក៏ដូចជាច្បាប់ការពារព្រះមហាក្សត្រថៃ៕
© រក្សាសិទ្ធិដោយ thmeythmey.com