COVID-19
ជាតិ
សង្គមជាតិ
ឈប់សម្រាក៥ថ្ងៃ! ពលរដ្ឋខ្លះ មានគោលដៅកម្សាន្ត ឯខ្លះទៀតសុខចិត្តនៅធ្វើការ ព្រោះជីវភាពខ្វះខាតក្នុងវិបត្តិកូវីដ-១៩
×![]()
ដោយ: & ឡាយ សុភាវតី
ភ្នំពេញ៖ រដ្ឋាភិបាល បានសម្រេចឲ្យពលរដ្ឋឈប់សម្រាកការងាររយៈពេល៥ថ្ងៃ គឺចាប់ពីថ្ងៃទី១៧ ដល់ថ្ងៃទី២១ សីហា ដើម្បីសងការសម្រាកជួសថ្ងៃចូលឆ្នាំកន្លងមក។ ទោះជាបានឱកាសឈប់សម្រាកហើយក្តី តែពលរដ្ឋខ្លះ សុខចិត្តនៅធ្វើការ ព្រោះជីវភាពខ្វះខាតក្នុងវិបត្តិកូវីដ-១៩ ខណៈពលរដ្ឋខ្លះ មានគោលដៅកម្សាន្ត ។
ជាបុគ្គលិកផ្នែកអាកាសចរនៅអាកាសយានដ្ឋានអន្តរជាតិភ្នំពេញ កញ្ញា ផល លីវយី ដែលមានពេលឈប់សម្រាកបានពីរថ្ងៃគឺថ្ងៃទី២២ និង២៣ ខែសីហា នឹងឆ្លៀតពេលនោះទៅកម្សាន្តលេងនៅតាមរមណីយដ្ឋានខេត្តសៀមរាប ដែលជាកន្លែងកញ្ញា ឧស្សាហ៍ទៅកម្សាន្តលេងជារៀងរាល់ឆ្នាំឲ្យតែមានបុណ្យទានម្តងៗ។
កញ្ញា លីវយី ដែលតែងតែចូលចិត្តដើរលេងនៅតាមបណ្តាខេត្ត សង្កេតឃើញការផ្សព្វផ្សាយតាមបណ្តាញសង្គមហ្វេសប៊ុកពីគោលដៅខេត្តសៀមរាប ដែលមានការរៀបចំតុបតែងលម្អដោយភ្លើងព័ណ៌ មានការកែច្នៃថ្មី និងជាកន្លែងដែលមានសក្តានុពុល ទើបធ្វើឲ្យរូបនាងមិនជិនណាយនឹងកន្លែងនោះឡើយ បើទោះបីឆ្នាំនេះ លីវយី បានទៅកម្សាន្តនៅទីនោះបាន៣ដងរួចហើយក៏ដោយ។
ស្ថានភាពជំងឺកូវីដ-១៩ មិនទាន់ស្ងប់ស្ងាត់ក៏ពិតមែន ប៉ុន្តែកញ្ញាលីវយី នៅតែហ៊ានទៅកម្សាន្តលេងនៅទីនោះដោយប្រកាន់ខ្ជាន់នូវភាពប្រុងប្រយ័ត្នការពារជានិច្ច។ កញ្ញា លីវយី បានរៀបរាប់ដូច្នេះថា៖«ខ្ញុំមានវិធានការការពារខ្លួន ដូចជាពាក់ម៉ាស់ ដាក់ទឹកអាល់កុលជាប់ខ្លួន ហើយនឹងមិនទៅកន្លែងណាដែលមានមនុស្សច្រើនឡើយ។ ទោះបីមិនអាចជៀសផុតពីមនុស្សច្រើន តែយើងរក្សាគម្លាតពីគ្នា»។
បើតាមកញ្ញា លីវយី ការធ្វើដំណើរកម្សាន្តរបស់ខ្លួនកន្លងមក និងគម្រោងដំណើរកម្សាន្តនៅថ្ងៃឈប់សម្រាកខាងមុខនេះ នឹងជាផ្នែកមួយជួយឲ្យពលរដ្ឋដែលជាអាជីវករដែលរស់នៅតំបន់នោះ អាចរកថវិកាពីភ្ញៀវទេសចរបានមួយកម្រិតដែរ។
ចំណែកយុវសិស្ស លីម ឡាយហុក ដែលជាសិស្សថ្នាក់ទី១២ នៅសាលារៀនអន្តរទ្វីបអាមេរិកាំង(AIS) បានបញ្ជាក់ថា តាំងពីសិក្សាតាមអនឡាញអស់រយៈពេល៥ខែកន្លងមក ខ្លួនមិនដែលបានទៅកម្សាន្តលេងនៅតាមតំបន់រមណីយដ្ឋានណាឡើយ។ ដោយសារតែដឹងថានៅសល់ពេល៤ខែទៀត នឹងត្រូវប្រឡងបាក់ឌុប ឡាយហុក នឹងចំណាយពេលថ្ងៃឈប់សម្រាកចំនួន៣ថ្ងៃ ទៅកម្សាន្តលេងនៅខេត្តព្រះសីហនុ។
យុវសិស្ស ឡាយហុក បានរៀបរាប់ដូច្នេះថា៖«តាំងពីខ្ញុំរៀនមកខ្ញុំអត់ដែលបានដើរលេងនៅណាឆ្ងាយឡើយ។ អ៊ីចឹងថ្ងៃឈប់សម្រាកនេះខ្ញុំនឹងទៅខេត្តកំពង់សោមលេងជាមួយនឹងក្រុមគ្រួសារ។ ហើយពេលខ្ញុំមកវិញ ខ្ញុំនឹងបន្តរៀនទៀត»។
ផ្ទុយពីអ្នកមានលទ្ធភាពនឹងធនធានសម្រាប់ការធ្វើដំណើរដើរកម្សាន្តនេះ ពលរដ្ឋខ្លះទៀត មិនហ៊ានដើរកម្សាន្តទេ ហើយសុខចិត្តនៅធ្វើការ ព្រោះជីវភាពខ្វះខាតក្នុងវិបត្តិកូវីដ-១៩។
ជាអ្នកចំណាកស្រុកពីបាត់ដំបងមកធ្វើការសន្តិសុខនៅក្រុងភ្នំពេញ លោក ម៉ង់ រិទ្ធដារ៉ា អះអាងថា ថ្ងៃសម្រាក៥ថ្ងៃនេះ ខ្លួនមានថវិកាសម្រាប់ទៅលេងផ្ទះ ប៉ុន្តែក្រុមហ៊ុនមិនអនុញ្ញាតឲ្យឈប់សម្រាកឡើយ។ ប៉ុន្តែលោក រិទ្ធដារ៉ា ក៏ហ៊ានដាក់ច្បាប់ឈប់ដែរ ព្រោះខ្លាចបាត់បង់ការងារនិងប្រាក់ចំណូលទៅថ្ងៃមុខ។
«សន្តិសុខគេម៉េចឲ្យឈប់ ចូលឆ្នាំនេះធ្វើការធម្មតា ថ្ងៃមុនបងប្អូនខូច(ស្លាប់)នៅស្រុក សុំឈប់គេមិនឲ្យឈប់ផង។ ចង់ឈប់សម្រាកដែរ ប៉ុន្តែមិនហ៊ានឈប់ ខ្លាចពេលសម្រាកទៅគេដាក់អ្នកថ្មី យើងអត់ការងារធ្វើ។ លុយទៅលេងស្រុកមាន ប៉ុន្តែយើងមិនមែនអ្នកមានណា បើអត់ការងារធ្វើយើងយ៉ាប់ហើយ អ៊ឹចឹងមានតែតស៊ូទៅ»។ នេះបើតាមការលើកឡើងរបស់លោក រិទ្ធដារ៉ា ដោយបន្ថែមទៀតថា កាលពីឆ្នាំមុនរូបលោកក៏មិនបានទៅលេងផ្ទះដែរ ដោយសារកន្លែងការងារបន្ថែមប្រាក់៥០ដុល្លារឲ្យ ទើបរូបលោកសម្រេចចិត្តនៅធ្វើការ។
សម្រាប់ថ្ងៃឈប់សម្រាកសងថ្ងៃចូលឆ្នាំខែពីថ្ងៃទី១៧ដល់២១នេះ ក្រុមហ៊ុនមិនបានបន្ថែមប្រាក់ខែឬប្រាក់លើកទឹកចិត្តឲ្យលោករិទ្ធដារ៉ាឡើយ។ លោកថ្លែងថា៖ «ធ្វើការងារធម្មតា ឆ្នាំនេះក្រុមហ៊ុនមិនបានប្រាប់ថាថែមប្រាក់អីឲ្យទេ ឆ្នាំនេះ ចូលឆ្នាំត្រឡប់ចុះត្រឡប់ឡើង មិនពេញលេញ ខ្ញុំក៏មិនដឹង មិនហ៊ានសួរគេដែរ តាមគេឲ្យក៏យក គេមិនក៏មិនដឹងធ្វើយ៉ាងណាដែរ កុំឲ្យតែអត់ការងារធ្វើ»។
កញ្ញា សុខ ចិន្ដា ដែលជាអ្នករត់តុនៅភោជនីដ្ឋាននៅលិចផ្សាយបឹងត្របែកថា ថៅកែឲ្យធ្វើការដូចថ្ងៃទូទៅនៅអំឡុងពេលថ្ងៃសម្រាកឆ្នាំខ្មែរ ប៉ុន្តែបើបុគ្គលិកណាចង់ឈប់សម្រាក អាចសម្រាកបានដោយកាត់ប្រាក់ខែតាមថ្ងៃឈប់។ ដោយសារជីវភាពខ្វះខាតហើយប្រាក់ខែក៏តិចតួច កញ្ញា ចិន្តា ក៏សម្រេចទៅបំពេញការងារ។
កញ្ញាសម្បុរស្រអែមវ័យ១៩ឆ្នាំរូបនេះ ថ្លែងថា៖ «ថៅកែឲ្យធ្វើការធម្មតា តែបើអ្នកចង់ឈប់ក៏ឈប់បាន គ្រាន់តែកាត់ប្រាក់ខែតាមថ្ងៃឈប់។ ខ្ញុំក៏មិនចង់ឈប់អីដែរ ព្រោះឈប់កាត់លុយ ប្រាក់ខែតិចចាយមិនគ្រប់ផង អ្នកផ្ទះខ្ញុំឥឡូវអត់ការងារធ្វើគ្រប់គ្នា បងប្អូនខ្ញុំពីនាក់កំពុងដើរការងារ ម្ដាយខ្ញុំដើរបោកខោអាវគេរាល់ថ្ងៃ អ៊ឺចឹងយ៉ាងណាក៏ត្រូវធ្វើការងារដែរ»។
ទោះបីគ្មានប្រាក់លើកទឹកចិត្តឬប្រាក់បន្ថែមពីថៅកែក៏ កញ្ញា ចិន្តា ពោលទាំងរីករាយថា ធ្វើការនៅអំឡុងពេលឈប់សម្រាកនេះ នឹងមានភ្ញៀវច្រើនហើយកញ្ញាសង្ឃឹមថា នឹងទទួលបានប្រាក់បន្ថែមពីភ្ញៀវច្រើនដូចគ្នា។
កាលពីថ្ងៃទី១៥ ខែកក្កដា ឆ្នាំ២០២០ សម្ដេចនាយករដ្ឋមន្ត្រី ហ៊ុន សែន បានចេញអនុក្រឹត្យផ្លូវការ ស្តីពីការអនុញ្ញាតឲ្យមន្ត្រីរាជការ កម្មករ និយោជិត ឈប់សម្រាកការងារចាប់ពីថ្ងៃទី១៧-២១ ខែសីហា ឆ្នាំ២០២០ សងថ្ងៃបុណ្យចូលឆ្នាំថ្មី។ បើតាមសម្ដេច ហ៊ុន សែន អំឡុងពេលឈប់សម្រាកនេះ និយោជកទាំងអស់ មិនត្រូវកាត់ប្រាក់ឈ្នួលបុគ្គលិក ឬនិយោជិតឡើយ ពោលគឺកម្មករនិយោជិត ត្រូវទទួលបានប្រាក់ឈ្នួលធម្មតា៕
Tag:
សម្រាកចូលឆ្នាំ
ជីវភាព
© រក្សាសិទ្ធិដោយ thmeythmey.com
