ជាតិ
តារាល្បីៗ
លោក ព្រាប សុវត្ថិ ចាកចេញពី ហង្ស មាស ក្រោយរួមរស់ជាង២០ឆ្នាំ
× លោក ព្រាប សុវត្ថិ បានសម្រេចចាកចេញពីផលិតកម្មហង្ស មាស ដែលរួមរស់នៅប្រមាណ២៣ឆ្នាំមកហើយ ទៅកាន់ទ្រនំថ្មី គឺផលិតកម្ម Galaxy Navatra។ នេះបើតាមផលិតកម្ម Galaxy Navatra។
ផលិតកម្ម Galaxy Navatra បានសរសេរនៅទំព័រហ្វេសប៊ុក របស់ខ្លួននៅថ្ងៃទី ២០ សីហា ឆ្នាំ២០២០នេះ ដូច្នេះ៖«សូមស្វាគមន៍យ៉ាងកក់ក្ដៅបំផុតចំពោះវត្តមានកំពូលតារាចម្រៀង ព្រាប សុវត្ថិ ចូលមករួមរស់ក្នុងគ្រួសារតែមួយនៃគ្រួសារ Galaxy Navatra»។
គេនៅមិនទាន់ដឹងមូលហេតុ នៃការចាកចេញពីផលិតកម្មចាស់ របស់លោក ព្រាប សុវត្ថិ នៅឡើយ ប៉ុន្តែលោក យឹម តាស្រង់ នាយកចាត់ការទូទៅផលិតកម្ម Galaxy Navatra បានប្រាប់អង្គភាពហ្វ្រសញ៉ូវថាចំពោះមូលហេតុនៃការចូលរួមទ្រនំថ្មីនេះ នឹងត្រូវបកស្រាយនៅក្នុងសន្និសីទកាសែត នាថ្ងៃទី២៥ ខែសីហា ដែលផលិតកម្ម Galaxy Navatra រៀបចុះពិធីស្វាគមន៍វត្តមាន អ្នកចម្រៀងល្បីឈ្មោះ វ័យ៤៥ឆ្នាំរូបនេះ។
លោក យឹម តាស្រង់ បានត្រឹមតែបញ្ជាក់ហ្វ្រសញ៉ូវថា លោក ព្រាប សុវត្ថិ សម្រេចទៅរួមរស់នឹង Galaxy Navatra ជាមួយកិច្ចសន្យា៥ឆ្នាំ។
ទោះជាមិនទាន់មានមូលហេតុជាក់លាក់ ប៉ុន្តែគេដឹងថាកូនប្រុស ទាំង៣នាក់ របស់លោក ព្រាប សុវត្ថិ កំពុងជ្រកក្រោមទ្រនំ ផលិតកម្ម ហង្ស មាស។ ពួកគេ ត្រូវបានប្រកាសជាតារាចម្រៀងពេញសិទ្ធិ នៅផលិតកម្ម ហង្ស មាស កាលពីដើមឆ្នាំ២០១៨។
អ្នកចម្រៀងដ៏ល្បីល្បាញប្រចាំប្រទេសកម្ពុជា លោក ព្រាប សុវត្ថិ កើតនៅក្នុងឆ្នាំ១៩៧៥ នៅកោះធំ ខេត្តកណ្តាល។ តារាចម្រៀងវ័យ៤៥ឆ្នាំរូបនេះ បានចូលរួមទ្រនំនៅផលិតកម្មរស្មី ហង្ស មាស តាំងតែពីឆ្នាំ១៩៩៧មក ពោលគឺរយៈ២៣ឆ្នាំហើយ គិតមកទល់បច្ចុប្បន្ន។ ក្រៅពីមានគេកេរ្តិ៍ឈ្មោះល្បីរន្ទឺផ្នែកចម្រៀង លោក ព្រាប សុវត្ថិ ក៏មុខងារក្នុងរាជការដែរ ដោយមានឋានន្តរស័ក្តិថ្នាក់វរៈសេនីយ៍។ លោក បានចូលបម្រើកងទ័ព នៅអង្គភាពការិយាល័យនយោបាយ តាំងពីឆ្នាំ ១៩៩៤៕
Tag:
ព្រាប សុវត្ថិ
សិល្បៈ
អ្នកចម្រៀង
© រក្សាសិទ្ធិដោយ thmeythmey.com