ស៊ិន កក្កដា និង ស៊ិន សុផាណាត់ សម្រេចបាន Hat-Trick រៀងៗខ្លួនក្នុងជំនួបតែមួយ

កីឡាជាតិ

ជាតិ

ស៊ិន កក្កដា និង ស៊ិន សុផាណាត់ សម្រេចបាន Hat-Trick រៀងៗខ្លួនក្នុងជំនួបតែមួយ

20, Aug 2020 , 1:19 pm

រូបភាព

កីឡាករ_ស៊ិន_កក្កដា_ស្តាំនិងកីឡាករ_ស៊ិន_សុផាណាត់_ពេលប្រកួតជាមួយក្រុមត្បូងឃ្មុំ

ដោយ:

ក្រុមវិសាខាលត់ក្រុមត្បូងឃ្មុំក្នុងលទ្ធផល ៩-០ នាជំនួបជើងទី១ នៃពានរង្វាន់សម្តេច ហ៊ុន សែន ថ្នាក់ជាតិ កាលពីល្ងាចថ្ងៃទី១៩ ខែសីហា ឆ្នាំ២០២០ នៅកីឡដ្ឋានព្រីនស៍។ អ្វីដែលគួរឲ្យចាប់អារម្មណ៍ក្នុងជំនួបដ៏ជក់ចិត្តនេះ គឺកីឡាករវិសាខាពីររូបសម្រេចបាន Hat-Trick (៣គ្រាប់)រៀងៗខ្លួន។

ខ្សែបម្រើ ស៊ិន កក្កដា និងកីឡាករ ស៊ិន សុផាណាត់ រកបាន Hat-Trick រៀងៗខ្លួន ដើម្បីរួមចំណែកជួយឲ្យក្រុមវិសាខាយកឈ្នះត្បូងឃ្មុំ ៩-០ នៅជើងទី១នៃពានរង្វាន់សម្តេច ហ៊ុន សែន ថ្នាក់ជាតិ។ ជ័យជម្នះនេះ ជួយឲ្យវិសាខាមានភាគរយខ្ពស់ក្នុងការឈានទៅកាន់វគ្គ៨ក្រុមចុងក្រោយ ដែលមានណាហ្គាវើល ព្រៃវែង និងគីរីវង់សុខសែនជ័យកំពុងរង់ចាំ។

ការប្រកួតនៅកីឡដ្ឋានព្រីនស៍ដំណើរការបានពីរនាទី កីឡាករ ស៊ិន សុផាណាត់ រកគ្រាប់បាល់នាំមុខ ១-០ ឲ្យម្ចាស់ផ្ទះវិសាខា មុនកីឡាករ ស៊ិន កក្កដា បន្ថែមមួយគ្រាប់ទៀតនៅ១០នាទីបន្ទាប់។ ការប្រកួតដំណើរការបានជាង១០នាទីខ្សែប្រយុទ្ធ រ៉ឹង ប៊ុនហៀង រកបានគ្រាប់ទី៣ មុនកីឡាករ ស៊ិន កក្កដា សម្រេចគ្រាប់ទី៤ និងទី៥ជាបន្តបន្ទាប់ ដែលជួយឲ្យរូបគេក្លាយជាកីឡាកររកបាន Hat-Trick ត្រឹមរយៈពេល៣៥នាទី។

៥គ្រាប់ក្នុងតង់ទី១សម្រាប់វិសាខាមិនទាន់ស្កប់ស្គាល់នោះទេ នៅនាទីទី៤៥គ្រាប់បាល់ទី៦ ក៏បានកើតឡើង ដែលរកបានដោយកីឡាករ ស៊ិន សុផាណាត់ ហើយជាគ្រាប់ទីពីររបស់គេ។ ឈានដល់តង់ទីពីរកីឡាកររូបនេះសម្រេចបានមួយគ្រាប់បន្ថែមនៅនាទីទី៦០ ហើយក៏ជាគ្រាប់ទីបីរបស់គេផងដែរ។ ក្រោយមកកីឡាករ អិន វិច្ឆ័យ រកបានគ្រាប់ទី៨នៅនាទីទី៨៥ មុនកីឡាករ ម៉ាត់ សាក់រវី រកបានគ្រាប់ទី៩នៅនាទីបន្ថែមក្នុងតង់ទីពីរ ដែលជាគ្រាប់ជ័យជម្នះ ៩-០ របស់វិសាខាលើក្រុមត្បូងឃ្មុំ៕