ជាតិ
បន្ទាយស្រី បានលេខ១ ពីការប្រកួតមាន់អាំងឆ្ងាញ់ ឯសូទ្រនិគមលេខ២ ក្រុងសៀមរាបលេខ៣
មាន់អាំងស្រុកបន្ទាយស្រី ដែលទទួលបានចំណាត់ថ្នាក់លេខ១ក្នុងការប្រកួតមាន់អាំងឆ្ងាញ់
×![]()
មាន់អាំងស្រុកបន្ទាយស្រី ទទួលបានចំណាត់ថ្នាក់លេខ១ ជាមាន់អាំងដែលមានរសជាតិឆ្ងាញ់ជាងគេ នៅក្នុងចំណោមក្រុង-ស្រុកទាំង១២ នៃខេត្តសៀមរាប។ សម្រាប់មាន់អាំងឆ្ងាញ់ ចំណាត់ថ្នាក់លេខ២ គឺបានទៅលើស្រុកសូត្រនិគម និងលេខ៣ បានទៅមាន់អាំងក្រុងសៀមរាប។ ជ័យលាភីនេះ ត្រូវបានប្រកាសនៅក្នុងកម្មវិធី ប្រកួតមាន់អាំងឆ្ងាញ់ ដែលជាកម្មវិធីមួយ ក្នុងចំណោមកម្មវិធីជាច្រើនទៀត នៃព្រឹត្តការណ៍«សម្រាកសៀមរាប»។
រដ្ឋបាលខេត្តសៀមរាប បានចុះផ្សាយសម្តីរបសលោក ភឿន គឹមលី ប្រធានមន្ទីរពាណិជ្ជកម្មខេត្តថា ការដាក់ពិន្ទុនៅក្នុងកម្មវិធីនេះ គឺក្រៅតែពីរសជាតិ គណៈកម្មការ បានពិនិត្យ និងវិនិច្ឆ័យយ៉ាងម៉ត់ចត់ ទៅលើសោភ័ណភាព អនាម័យ របៀបផ្សំគ្រឿង និងប្រភពមាន់ដែលយកមកអាំង។ លោក ភឿន គឹមលី បន្តទៀតថា គោលបំណងនៃការប្រកួតមាន់អាំងឆ្ងាញ់នេះ គឺដើម្បីបង្ហាញនូវស្នាដៃចម្អិន(អាំងមាន់) របស់ចុងភៅគ្រប់តំបន់ នៃខេត្តសៀមរាប ក៏ដូចជាបង្ហាញរូបមន្តពិសេសខុសៗគ្នារបស់ចុងភៅនីមួយៗ។
ជុំវិញការប្រកួតនេះ លោក ភឿន គីមលី ក៏បានប្រាប់សារព័ត៌មានថ្មីៗដែរថា ការបង្កើតឲ្យមានការប្រកួតមាន់អាំងងឆ្ងាញ់ ព្រោះមុខម្ហូប១នេះ ជាម្ហូបមានភាពល្បីល្បាញក្នុងខេត្តសៀមរាប ដូច្នេះការរៀបចំការប្រកួតនេះ អាចធ្វើឲ្យកាន់តែមានការផ្សព្វផ្សាយទៅដល់ភ្ញៀវទេសចរឲ្យស្គាល់ពីម្ហូបប្រចាំតំបន់មួយនេះ។
សូមជម្រាបថា ក្រៅតែពីកម្មវិធីប្រកួតមាន់អាំងឆ្ងាញ់ ព្រឹត្តិការណ៍«សម្រាកសៀមរាប» ដែលមានរយៈពេល៥ថ្ងៃ ចាប់ពីថ្ងៃទី១៥ ដល់ថ្ងៃទី២១សីហា រដ្ឋបាលខេត្តសៀម រាបបានរៀបចំផ្សារលើទឹក, ស្ដង់ពិព័រណ៍ម្ហូបអាហារ បន្លែ ផ្លែឈើ សម្រាប់ការកម្សាន្តនានា និងឱ្យភ្ញៀវទេសចរបានហូបអាហារផងដែរ៕
© រក្សាសិទ្ធិដោយ thmeythmey.com
