អន្តរជាតិ
×![]()
ក្រុមហ៊ុនបច្ចេកវិទ្យាយក្ស អេបផល (Apple) បានក្លាយក្រុមហ៊ុនអាមេរិកទី១ ដែលមានតម្លៃ ២ ទ្រីលានដុល្លារ លើទីផ្សារភាគហ៊ុន។ ក្រុមហ៊ុន Apple បានសម្រេចជោគជ័យថ្មីនេះ ក្នុងពេលត្រឹម២ឆ្នាំ ក្រោយខ្លួនបានក្លាយជាក្រុមហ៊ុនមានតម្លៃ ១ទ្រីលានដុល្លារ ដំបូងរបស់ពិភពលោក ក្នុងឆ្នាំ២០១៨។ 
តាមការចុះផ្សាយសារព័ត៌មាន BBC តម្លៃភាគហ៊ុនក្រុមហ៊ុនយក្សនេះ ឡើងដល់ ៤៦៧,៧៧ដុល្លារ នៅថ្ងៃទី ១៩ ខែសីហា ដែលធ្វើឲ្យតម្លៃភាគហ៊ុនសរុប របស់ក្រុមហ៊ុនេះ Apple ហក់ឡើង ដល់២ទ្រីលានដុល្លារ។
ក្រៅពីក្រុមហ៊ុនApple មានតែក្រុមហ៊ុនមួយប៉ុណ្ណោះ ដែលធ្លាប់ឈានដល់តម្លៃ២ទ្រីលានដុល្លារ ហើយនោះគឺជាក្រុមហ៊ុនប្រេងរដ្ឋ Saudi Aramco របស់ប្រទេសអារ៉ាប៊ីសាអូឌីត ក្នុងខែធ្នូ ឆ្នាំ២០១៩។ ក៏ប៉ុន្តែតម្លៃរបស់ក្រុមហ៊ុនប្រេងយក្សនេះ បានធ្លាក់ចុះមក ១,៨ទ្រីលានដុល្លារវិញ ចាប់តាំងពីនោះមក។
ម្យ៉ាងទៀត ក្រុមហ៊ុនបច្ចេកវិទ្យាអាមេរិក Apple បានវ៉ាដាច់ក្រុមហ៊ុនប្រេងរបស់អារ៉ាប៊ីសាអូឌីតនេះ ក្លាយជាក្រុមហ៊ុនមានតម្លៃពាណិជ្ជកម្មថ្លៃបំផុតរបស់ពិភពលោក នៅចុងខែកក្កដា កន្លងទៅ។ នេះបើតាម BBC ។
តម្លៃភាគហ៊ុនរបស់ក្រុមហ៊ុនផលិតទូរសព្ទដៃ iPhone នេះ បានហក់ឡើងជាង៥០ភាគរយក្នុងឆ្នាំ២០២០នេះ ទៅះជាវិបត្តិជំងឺរាតត្បាតសកល COVID-19 បានបង្ខំឲ្យហាង Apple ជាច្រើនបិទទ្វារក៏ដោយ។
ក្រុមហ៊ុន Microsoft និង Amazon តាមពីក្រោយក្រុមហ៊ុន Apple ជាក្រុមហ៊ុនដែលមានតម្លៃខ្ពស់បំផុត របស់សហរដ្ឋអាមេរិក ដោយពួកគេមានតម្លៃប្រមាណ ១,៦ទ្រីលានដុល្លាររៀងៗខ្លួន។ ចំណែកក្រុមហ៊ុន Ahphabet ដែលជាម្ចាស់ Google នៅពីក្រោយគេ ជាមួយតម្លៃជាង១ទ្រីលានដុល្លារ៕
Tag:
សហរដ្ឋអាមេរិក
Apple
ផ្សារភាគហ៊ុន
© រក្សាសិទ្ធិដោយ thmeythmey.com
