ជាតិ
ទេសចរជាង៧ពាន់នាក់ បានទៅកម្សាន្តនៅខេត្តកោះកុង នៅថ្ងៃទី១៩ សីហា រូបភាពពីហ្វេសប៊ុកក្រសួងទេសចរណ៍
× កោះកុង ដែលជាខេត្តស្ថិតនៅតាមបណ្ដោយឆ្នេរសមុទ្រ ទទួលបានភ្ញៀវទេសចរសរុប ៧ ០៣១នាក់ ក្នុងនោះទេសចរជាតិចំនួន ៦ ៩២៩នាក់ និងទេសចរអន្តរជាតិចំនួន១០២នាក់ កាលពីថ្ងៃទី១៩ សីហា ដែលជាថ្ងៃទី ១៩ ខែសីហា ឆ្នាំ២០២០។ នេះបើតាមរបាយការណ៍ភ្ញៀវទេសចរ ពីការិយាល័យព័ត៌មានទេសចរណ៍ខេត្តកោះកុង។
លោក សាគុណ ភក្តី អនុប្រធានការិយាល័យព័ត៌មានទេសចរណ៍ខេត្តកោះកុង បានបញ្ជាក់ប្រាប់សារព័ត៌មានថ្មីៗ២៥ថា តំបន់ដែលភ្ញៀវទេសចរទៅលេងច្រើនជាងគេមាន ឆ្នេរនេសាទ ទឹកធ្លាក់តាតៃ បន្ទាប់មកគឺសហគមន៍ទេសចរណ៍ពាមក្រសោប។
រូបភាពពីហ្វេសប៊ុកក្រសួងទេសចរណ៍
ដើម្បីស្វាគមន៍ភ្ញៀវទេសចរ ទៅកម្សាន្តក្នុងថ្ងៃឈប់សម្រាកនេះ រដ្ឋបាលខេត្តកោះកុង ក៏បានពង្រាយ កម្លាំងប្រដាប់អាវុធ និងមន្ត្រីនគរបាលឈរជើងនៅតាមគោលដៅទេសចរណ៍នីមួយៗ ដើម្បីរក្សាសន្តិសុខ និងសណ្តាប់ធ្នាប់ជូនអ្នកទេសចរផងដែរ។ លើសពីនេះ ស្តង់គ្រូពេទ្រសង្គ្រោះបឋម និងការអនុវត្តវិធានសុវត្ថិភាព តាមរមណីយដ្ឋាននានា ក៏ត្រូវបានរៀបចំផងដែរ។
ខេត្តកោះកុង ជាខេត្តដែលមានសក្តានុពលទេសចរណ៍ដ៏សម្បូរបែបដូចជា តំបន់វិស្សមកាល តំបន់អេកូទេសចរណ៍ធម្មជាតិ ព្រៃកោងកាង ទឹកធ្លាក់ តំបន់ឆ្នេរ តំបន់ផ្កាថ្ម និងតំបន់កោះមួយចំនួន។ ក្នុងថ្ងៃឈប់សម្រាកចំនួន៥ថ្ងៃគឺថ្ងៃទី ១៧ រហូតដល់២១ ខែសីហា ឆ្នាំ២០២០ កោះកុង ក៏ជាទិសដៅទេសចរណ៍សម្រាប់ភ្ញៀវទេសចរជាតិ និងអន្តរជាតិផងដែរ។ ជាក់ស្ដែងនៅថ្ងៃទី១៧ និង១៨ ខេត្តកោះកុងទទួលបានភ្ញៀវទេសចរសរុប ១១ ១២៩នាក់៕
រូបភាពពីហ្វេសប៊ុកក្រសួងទេសចរណ៍
រូបភាពពីហ្វេសប៊ុកក្រសួងទេសចរណ៍
© រក្សាសិទ្ធិដោយ thmeythmey.com