កីឡាជាតិ
ជាតិ
ពានសម្តេច ហ៊ុន សែន៖ បឹងកេត ទ័ព ភ្នំពេញក្រោន ព្រះខ័នរាជស្វាយរៀង ឡើងទៅវគ្គ១/៤ ខ្សែប្រយុទ្ធ_សៀង_ចន្ធា_រកបាន_Hat_Trick_ឲ្យបឹងកេតក្នុងជំនួបជើងទីពីរជាមួយសៀមរាប
× ក្រុមបាល់ទាត់បឹងកេត ភ្នំពេញក្រោន ព្រះខ័នរាជស្វាយរៀង និងកងយោធពលខេមរភូមិន្ទ(ទ័ព)ឡើងទៅវគ្គ៨ក្រុមចុងក្រោយ(១/៤)នៃពានរង្វាន់សម្តេច ហ៊ុន សែន ថ្នាក់ជាតិ ក្រោយពួកគេទម្លាក់គូប្រកួតរៀងៗខ្លួននៅវគ្គ១/៨។
នាជំនួបជើងទីពីរនៅកីឡដ្ឋាន អេស អ យូ កាលពីថ្ងៃទី២០ ខែសីហា ឆ្នាំ២០២០ កីឡាករ ឈិន ឈឿន បានរកគ្រាប់បាល់នាំមុខ ១-០ ឲ្យព្រះខ័នរាជស្វាយរៀង ក្រោយការប្រកួតដំណើរការបាន១០នាទី។ ក្រោយមកនៅនាទីទី៦៦ កីឡាករ មិន រតនៈ បានបន្ថែមមួយគ្រាប់ទៀត ហើយក៏ជាគ្រាប់បាល់ជ័យជម្នះសម្រាប់ក្រុមភ្ញៀវផងដែរ។ ជ័យជម្នះនេះ ជួយឲ្យក្រុមជើងឯករងឆ្នាំចាស់មួយនេះ ឡើងទៅវគ្គ៨ក្រុមចុងក្រោយនៃពានរង្វាន់សម្តេច ហ៊ុន សែន ជាមួយជ័យជម្នះទាំងពីរជើង ៣-០។
ងាកទៅមើលការប្រកួតនៅកីឡដ្ឋាន អេ អ៊ី យូ កីឡាករ ប្រាក់ ធីវ៉ា សម្រេចបាន Hat-Trick សម្រាប់ភ្នំពេញក្រោនក្នុងរយៈពេល៥៨នាទី ដែលគ្រាប់ទាំងនេះកើតឡើងនៅនាទីទី៣០, ៤២ និង៥៨។ ក្រោយមកកីឡាករ អ៊ន ចាន់ប៉ូលីន លឹម ពិសុទ្ធ និង អ៊ឹម សំអូន បានរួមចំណែកម្នាក់១គ្រាប់ ដើម្បីជួយឲ្យភ្នំពេញក្រោនយកឈ្នះយកឈ្នះអាស៊ីអឺរ៉ុប ៦-០ និងទទួលបានកៅអីឡើងទៅវគ្គ១/៤ជាមួយលទ្ធផលសរុប ១០-០។
ចំណែកការប្រកួតនៅកីឡដ្ឋានខេមបូឌាអ៊ែរវ៉េ គឺមានការស៊ុតបញ្ចូលទីរហូត១៣គ្រាប់ ដែលគ្រាប់បាល់ទាំងនេះជារបស់ម្ចាស់ផ្ទះបឹងកេត។ គ្រាប់បាល់ទាំងនេះរកបានដោយខ្សែប្រយុទ្ធ សៀង ចន្ធា ៣គ្រាប់ ម៉ុន វ៉ាន់ដា ពីរគ្រាប់និងរួមចំណែកម្នាក់មួយគ្រាប់ពីកីឡាករ ម៉ាត់ នូរុណ, ហុង ផេង, ជា វេសលី, ឱ ភារុណ, សឿត ណាវ៉ា, ហ៊ត ឈិនជិន, ធឿន ពិសាខបូរមី និងការធ្វើចូលទីខ្លួនរបស់ ជៀម ម៉ង់។ ជ័យជម្នះដ៏លើសលប់លើសៀមរាបនេះ ជួយឲ្យបឹងកេតឡើងទៅវគ្គបន្តជាមួយលទ្ធផលសរុប ១៨-០។
ដោយឡែកការប្រកួតនៅកីឡដ្ឋានខេត្តកែបក្រុមកងយោធពលខេមរភូមិន្ទបានយកឈ្នះក្រុមម្ចាស់ផ្ទះក្នុងលទ្ធផល ៤-១។ គ្រាប់បាល់របស់ទ័ពរកបានដោយកីឡាករ ជា ណាវ័ន ពីរគ្រាប់ និងរួមចំណែកម្នាក់១គ្រាប់ដោយកីឡាករ ទូច រ៉ូម៉ា និង ឈឿន ឧត្តម ខណៈកីឡាករ ជឿន ណាចារ ជាអ្នករកគ្រាប់បាល់ឲ្យម្ចាស់ផ្ទះកែប។ ទ័ពឡើងទៅវគ្គ១/៤ក្នុងលទ្ធផលសរុប ១៤-៣។
បច្ចុប្បន្នមានក្រុមចំនួន៧ហើយ ដែលបានឡើងទៅកាន់វគ្គ៨ក្រុមចុងក្រោយនៃពានរង្វាន់សម្តេច ហ៊ុន សែន ថ្នាក់ជាតិ រួមមានបឹងកេត ភ្នំពេញក្រោន កងយោធពលខេមរភូមិន្ទ ណាហ្គាវើល ព្រះខ័នរាជស្វាយរៀង ព្រៃវែង និងគីរីវង់សុខសែនជ័យ។ ក្រុមដែលជាបេក្ខភាពចុងក្រោយអាចវិសាខា ឬត្បូងឃ្មុំ ខណៈជើងទី១វិសាខាបានយកឈ្នះក្នុងលទ្ធផល ៩-០៕
Tag:
បាល់ទាត់
Hun Sen Cup 2020
© រក្សាសិទ្ធិដោយ thmeythmey.com