COVID-19
អន្តរជាតិ
ក្រុងប៉េកាំង ដកវិធានការពាក់ម៉ាស់នៅទីសាធារណៈ ក្រោយករណី COVID-19 ធ្លាក់ចុះទាប
រូបពី៖ Reuters
×![]()
អាជ្ញាធរសុខាភិបាលក្នុងរដ្ឋធានីប៉េកាំង ប្រទេសចិន បានសម្រេចដកហូតការតម្រូវឲ្យពាក់ម៉ាស់នៅទីសាធារណៈ។ នេះគឺជាការបន្ធូរបន្ថយមួយកម្រិតទៀតលើការរឹតត្បិត COVID-19 ក្រោយទីក្រុងនេះគ្មានករណីឆ្លង COVID-19 ថ្មីចំនួន១៣ថ្ងៃជាប់ៗ។ 
ទោះមានការបន្ធូរបន្ថយវិធានការទប់ស្កាត់ COVID-19 ពីសំណាក់អាជ្ញាធរបែបនេះ ប្រជាជនមួយចំនួនធំ បានបន្តពាក់ម៉ាស់ក្នុងទីក្រុង ប៉េកាំង នៅថ្ងៃទី ២១ ខែសីហា។ នេះគឺជាមើលឃើញរបស់ទីភ្នាក់ងារព័ត៌មាន Reuters ។
អ្នកខ្លះនិយាយថា ម៉ាស់ធ្វើឲ្យពួកគេមានអារម្មណ៍សុវត្ថិភាព ខណៈអ្នកដទៃទៀតអះអាងថា សម្ពាធសង្គមតម្រូវឲ្យពាក់ម៉ាស់ ក៏ជាកត្ដាមួយផងដែរ។ ស្ត្រីអាយុ២៤ឆ្នាំ ឈ្មោះថា ឆាវ បានប្រាប់ទីភ្នាក់ងារព័ត៌មាន Reuters ថា៖«ខ្ញុំគិតថា ខ្ញុំអាចដោះម៉ាស់បានគ្រប់ពេលវេលា តែខ្ញុំក៏ចាំអ៊ុតមើលដែរថានរណាព្រមឲ្យខ្ញុំជិតនោះ។ ព្រោះខ្ញុំខ្លាចថា មនុស្ស នឹងមានអារម្មណ៍ខ្លាចញញើត ប្រសិនបើពួកគេឃើញខ្ញុំអត់ពាក់ម៉ាស់»។
នេះគឺជាលើកទី២ហើយដែលអាជ្ញាធរសុខាភិបាលទីក្រុងប៉េកាំង បានបន្ធូរបន្ថយការរឹតត្បិតលើការពាក់ម៉ាស់ក្នុងទីក្រុងដែលមានប្រជាជនរស់នៅជាង២១លាននាក់នេះ។ តួយ៉ាង កាលពីចុងខែមេសា មជ្ឈមណ្ឌលគ្រប់គ្រង COVID019 របស់ទីក្រុងប៉េកាំង ធ្លាប់បានអះអាងម្ដងដែរថា ពលរដ្ឋអាចដើរហើរទៅក្រៅដោយមិនចាំបាច់ពាក់ម៉ាស់ឡើយ។
យ៉ាងណា វិធានសុខាភិបាលនេះ ត្រូវបានដាក់ឡើងវិញក្នុងខែមិថុនា ក្រោយទីផ្សារលក់បោះដុំដ៏ធំមួយក្នុងទីក្រុងនេះ ផ្ទុះរាលដាលករណី COVVID-19 ថ្មី។ ប្រទេស ចិន បានរាយការណ៍គ្មានករណីឆ្លង COVID-19 ក្នុងស្រុកចំនួន៥ថ្ងៃជាប់គ្នាក្រោយគ្រប់គ្រងដោយជោគជ័យលើការផ្ទុះរាលដាលក្នុងទីក្រុងប៉េកាំង ទីក្រុងXinjiang និងក្រុងដទៃទៀត។
ក្រុមអ្នកជំនាញសុខាភិបាល ធ្លាប់បានអះអាង គន្លឹះជោគជ័យរបស់ប្រទេសមួយក្នុងការគ្រប់គ្រងជំងឺនេះ គឺស្ថិតលើការដាក់វិធានការរឹតត្បិត ដូចជា ពាក់ម៉ាស់ ចៀសវាងចេញក្រៅផ្ទះ និងចូលរួមធ្វើតេស្ត COVID-19 ទ្រង់ទ្រាយធំ។
សូមបញ្ជាក់ថា រដ្ឋាភិបាលចិន នៅថ្ងៃទី ២០ ខែសីហា បានរាយការណ៍ករណីឆ្លង COVID-19 (ករណីនាំចូល) ចំនួន២២ករណី ដែលធ្វើឲ្យករណីឆ្លងសរុបឡើងដល់ ៨៤ ៩១៧ករណី ។ ក្នុងនោះ អ្នកជំងឺ ៧៩ ៧៩២នាក់ ជាសះស្បើយ និង៤៦៣៤នាក់បាត់បង់ជីវិត៕
Tag:
ចិន
COVID-19
© រក្សាសិទ្ធិដោយ thmeythmey.com
