អនុគណៈកម្មាធិការលទ្ធកម្ម, ព័ត៌មាន គមនាគមន៍ បច្ចេកវិទ្យា សហគ្រាសរដ្ឋ និងមូលនិធិនៃសភាថៃ បានបោះឆ្នោតដោយសំឡេង៥ទល់៤លើគម្រោងទិញនាវាមុជទឹកចំនួនពីរគ្រឿងពីប្រទេសចិនដែលជាគម្រោងស្ថិតក្រោមថវិកាចំណាយឆ្នាំ២០២១ របស់ទ័ពជើងទឹក។ បើតាមកាសែតថៃ The Nation សមាជិកសភាបក្សប្រឆាំងចំនួន៤រូប បានបោះឆ្នោតប្រឆាំង ហើយសមាជិកសភា៥រូបទៀតមកពីសម្ព័ន្ធភាពកាន់អំណាចបោះឆ្នោតគាំទ្រក្នុងកិច្ចប្រជុំថ្ងៃទី២១ ខែសីហា។

 

ការទិញនាវាមុជទឹកពីរគ្រឿងដោយមួយគ្រឿងមានតម្លៃ១១,២៥ពាន់លានបាត ជាផ្នែកមួយនៃកិច្ចព្រមព្រៀងដែលចុះហត្ថលេខាដោយអតីតរដ្ឋាភិបាលសឹកថៃក្នុងការទិញនាវាបីគ្រឿង។ នាវាមុជទឹកដំបូង ត្រូវបានទិញនៅឆ្នាំ២០១៧ ហើយត្រូវទទួលនៅឆ្នាំ២០២៤ខាងមុខ។ 

 

បើតាម The Nation ព័ត៌មាននៃការយល់ព្រមលើគម្រោងទិញនាវាមុជទឹក បានសុសសាយពេញបណ្ដាញសង្គមនៅថៃ។ ប្រជាជនថៃជាច្រើន បានបង្ហាញការមិនពេញចិត្តនឹងការទិញនេះ។ ពួកគេរិះគន់សមាជិកសភាដែលគាំទ្រការទិញនាវាមុជទឹកនេះ ថា ខ្ជះខ្ជាយលុយបង់ពន្ធរបស់ប្រជាជន នៅពេលដែលប្រជាជនកំពុងជួបបញ្ហាលំបាកដោយសារ COVID-19 ។ 

 

លើសពីនោះ ប្រជាជនថៃ ក៏នាំគ្នាចែករំលែករូបថតរបស់សមាជិកដែលគាំទ្រគម្រោងទិញនាវាមុជទឹកហើយអំពាវនាវកុំបោះឆ្នោតឲ្យពួកគេនៅអាណត្តិក្រោយ។ សមាជិកសភាទាំង៥ មានលោក Suphol Phong-ngam, Jiradech Srivirat, Kornis Ngamsukolratana មកពីបក្សកម្លាំងប្រជារាស្ត្រ, លោក Siriwan Pratsachaksatthru មកពីបក្សប្រជាធិបតេយ្យ និងលោក Chayuth Phumaganchana របស់បក្សភូមិចៃថៃ។ 

 

យ៉ាងណាមិញ កិច្ចព្រមព្រៀងទិញនេះ នៅមិនទាន់ចូលជាផ្លូវការឡើយ ដោយសភាថៃមិនទាន់អនុម័តលើកញ្ចប់ថវិកាចំណាយឆ្នាំ២០២១ នៅឡើយទេ៕