តាមរយៈអ្នកនាំពាក្យក្រសួងការបរទេសលោកស្រី Lê Thị Thu Hằng នៅចុងសប្តាហ៍នេះ រដ្ឋាភិបាលវៀតណាម បានថ្កោលទោសរដ្ឋាភិបាលចិន ដែលបានពង្រាយយន្តហោះទម្លាក់គ្រាប់បែកប្រភេទ Xian H-6 នៅក្នុងតំបន់ប្រជុំកោះ ប៉ារ៉ាស្សែល នៃសមុទ្រចិនខាងត្បូង។ នេះបើយោងតាមការចុះផ្សាយរបស់សារព័ត៌មាន Vietnam News។

 

តាមប្រភពព័ត៌មានដដែល នាឱកាសនៃសន្និសីទសារព័ត៌មានប្រចាំថ្ងៃរបស់ក្រសួងការបរទេសវៀតណាម លោកស្រី Lê Thị Thu Hằng  បានលើកឡើងថា វៀតណាមធ្លាប់ប្រាប់ចិនជាច្រើនលើកមកហើយថា តំបន់ប្រជុំស្ព្រាតលី និងប៉ារ៉ាស្សែល គឺជាផ្នែកមួយនៃដែនអធិបតេយ្យវៀតណាមដែលមិនអាចបំបែកបានឡើយ។ ហើយវៀតណាម មានមូលដ្ឋានគ្រប់គ្រាន់ដើម្បីបង្ហាញ និងជាភស្តុតាង។

 

លោកស្រីអ្នកនាំពាក្យ បានគូសបញ្ជាក់ថា ការពង្រាយសព្វាវុធ និងយន្តហោះប្រយុទ្ធនៅក្នុងតំបន់ប្រជុំកោះប៉ារ៉ាស្សែល មិនត្រឹមតែបំពានដែនអធិបតេយ្យរបស់វៀតណាមប៉ុណ្ណោះនោះទេ ក៏ប៉ុន្តែ វា គឺជាគំរាមកំហែង និងមហន្តរាយមួយសម្រាប់សន្តិភាព និងស្ថិរភាពក្នុងតំបន់ទៀតផង។ អ្នកការទូតជាន់ខ្ពស់វៀតណាមរូបនេះក៏បានទទូចឲ្យភាគីពាក់ព័ន្ធទាំងអស់បង្ហាញពីការទទួលខុសត្រូវក្នុងការកសាងសន្តិភាព និងស្ថិភាពនៅក្នុងសមុទ្រចិនខាងត្បូងផងដែរ។ 

 

ទោះបីជាអាស៊ាន និងចិន កំពុងតែស្ថិតក្នុងដំណាក់កាលចរចាក្នុងការបង្កើតក្រមប្រតិបត្តិសមុទ្រចិនខាងត្បូងក៏ដោយ រយៈពេលចុងក្រោយនេះ ភាគីពាក់ព័ន្ធសមុទ្រចិនខាងត្បូង ដែលរួមមានព្រុយណេ ម៉ាឡេស៊ី ហ្វីលីពីន និងវៀតណាម ហាក់បង្ហាញជំហរកាន់តែមិនពេញចិត្តទៅកាន់ចិន។ តាមការចុះផ្សាយជាបន្តបន្ទាប់មកនេះ ចិន មិនត្រឹមវាតទី និងបង្កើតមជ្ឈមណ្ឌលរដ្ឋបាលនៅតំបន់ជម្លោះប៉ុណ្ណោះនោះទេ តែថែមទាំងធ្វើយោធូបនីយកម្មកាន់តែសកម្មនៅទីនោះទៀតផង៕