កីឡាអន្តរជាតិ
អន្តរជាតិ
រថយន្តជាច្រើនគ្រឿងត្រូវអ្នកគាំទ្រ PSG ដុតបំផ្លាញ ក្រោយចាញ់ Bayern Munich វគ្គផ្តាច់ព្រ័ត្រ UCL
× រថយន្តច្រើនគ្រឿងក្នុងក្រុងប៉ារីសត្រូវបានអ្នកគាំទ្រដុតបំផ្លាញចោលបន្ទាប់ពី Paris Saint-Germain ចាញ់ Bayern Munich ក្នុងការប្រកួតវគ្គផ្តាច់ព្រ័ត្រពានរង្វាន់ UEFA Champions League ដែលធ្វើឡើងនៅទឹកដីព័រទុយហ្គាល់នារាត្រីថ្ងៃទី២៣ ខែសីហា។
ភាពរញ៉េរញ៉ៃបានកើតឡើងក្នុងរដ្ឋធានីរបស់បារាំង ដោយសារការរំជួលចិត្តខ្លាំងពីសំណាក់អ្នកគាំទ្រ PSG នៅពេលដែលក្រុមរបស់ពួកគេទទួលបានត្រឹមខកចិត្តសម្រាប់ការបំបែកកំណត់ត្រាប្រវត្តិសាស្ត្រក្លិបក្នុងក្របខណ្ឌពានកំពូលអឺរ៉ុប។
អ្នកគាំទ្រក្រុម PSG រាប់ពាន់នាក់បានប្រមូលផ្តុំគ្នានៅលើផ្លូវ Champs-Elysees ដើម្បីទស្សនាការប្រកួតវគ្គផ្តាច់ព្រ័ត្រ Champions League រដូវកាល ២០១៩-២០ តាមរយៈផ្ទាំងសំពត់ស នៅរាត្រីថ្ងៃទី២៣ សីហា។ នេះជាការបង្ហាញខ្លួនវគ្គផ្តាច់ព្រ័ត្រលើកដំបូងរបស់ក្លិបយក្សបារាំង ខណៈក្រុមដាក់ក្តីរំពឹងខ្ពស់ក្នុងការដណ្តើមយកពាននេះ។
យ៉ាងណាក៏ដោយ អ្វីៗត្រូវបានរលាយសាបសូន្យ ដោយសារថ្វីជើងកីឡាករសញ្ជាតិបារាំង Kingsley Coman ដែលប្រើក្បាលអុកបាល់បញ្ចូលទីនៅនាទី៥៩ ពីការបញ្ជូនរបស់ Joshua Kimmich ដើម្បីជួយក្រុម Bayern Munich យកឈ្នះ PSG ១-០។ លទ្ធផលនេះបានធ្វើឲ្យប៉ះពាល់ដល់អារម្មណ៍អ្នកគាំទ្រ PSG យ៉ាងខ្លាំងរហូតបានបង្កជាហិង្សានៅលើដងផ្លូវភ្លាមៗក្រោយចប់ការប្រកួតតែម្តង។
រូបភាពដែលទទួលបានពីក្រុមអ្នកថតរូបអាជីព Getty Images បង្ហាញពីភាពចលាចលកើតឡើងបន្ទាប់ពីការប្រកួតដោយអ្នកពន្លត់អគ្គិភ័យកំពុងពន្លត់រថយន្ត ដែលត្រូវដុតបំផ្លាញពីសំណាក់អ្នកគាំទ្រ។ អ្នកគាំទ្រខ្លះទៀត គប់បំពង់ផ្សែងនៅលើផ្លូវ Champs-Elysees នោះ និងបំផ្លាញទ្រព្យសម្បត្តិជាច្រើនទៀតផង។
ក្រោមការវិនិយោគរបស់មហាសេដ្ឋីកាតា PSG អាចឈានដល់វគ្គផ្តាច់ព្រ័ត្រក្របខណ្ឌអឺរ៉ុបជាលើកដំបូងចាប់តាំងពីបង្កើតក្លិបក្នុងឆ្នាំ១៩៧០មក។
សម្រាប់ក្រុម Bayern Munich វិញ នេះជាការឈ្នះពានអឺរ៉ុបលំដាប់ទីមួយជាលើកទី៦ ក្រុមយក្សអាល្លឺម៉ង់នេះ ធ្លាប់ជាម្ចាស់ពាន Champions League ៥លើករួចមកហើយ ដោយឈ្នះលើកដំបូងក្នុងឆ្នាំ១៩៧៤ និងបន្តបន្ទាប់ទៀត ឆ្នាំ១៩៧៥, ឆ្នាំ១៩៧៦, ឆ្នាំ២០០១ និងឆ្នាំ២០១៣៕
Tag:
Paris Saint-Germain
UEFA Champions League
Bayern Munich
© រក្សាសិទ្ធិដោយ thmeythmey.com