កីឡាអន្តរជាតិ
អន្តរជាតិ
ប៉ូលិស ចាប់អ្នកគាំទ្រ PSG ១៤៨នាក់ដែលខឹងចាញ់ Bayern នៅ UCL ពីបទបង្កចលាចល
×![]()
ដោយ: សារព័ត៌មានថ្មីៗ
ប៉ូលិសបារាំង បានចាប់ខ្លួនអ្នកគាំទ្រចំនួន ១៤៨ ដែលបង្កចលាចល និងដុតបំផ្លាញរថយន្តក្នុងក្រុងប៉ារីស ដោយសារពួកគេខឹងសម្បារក្រោយក្រុម Paris St-Germain ចាញ់ Bayern Munich ដោយលទ្ធផល ១-០ ក្នុងការប្រកួតផ្តាច់ព្រ័ត្រ Champions League វគ្គផ្តាច់ព្រ័ត្រ។
អត្ថបទទាក់ទង
អ្នកគាំទ្រក្រុម PSG រាប់ពាន់នាក់បានប្រមូលផ្តុំគ្នានៅលើផ្លូវ Champs-Elysees និងនៅជុំវិញពហុកីឡដ្ឋាន Parc des Princes ដើម្បីទស្សនាការប្រកួតវគ្គផ្តាច់ព្រ័ត្រ Champions League រដូវកាល ២០១៩-២០ តាមរយៈផ្ទាំងសំពត់សធំមួយ នៅរាត្រីថ្ងៃទី២៣ សីហា។ នេះជាការបង្ហាញខ្លួនវគ្គផ្តាច់ព្រ័ត្រលើកដំបូងរបស់ក្លិបយក្សបារាំង ខណៈក្រុមដាក់ក្តីរំពឹងខ្ពស់ក្នុងការដណ្តើមយកពាននេះ។
យ៉ាងណា ភាពរញ៉េរញ៉ៃ និងហិង្សាបានកើតឡើងក្នុងរដ្ឋធានីរបស់បារាំង ដោយសារ អ្នកគាំទ្រ PSG រំជួលចិត្តខ្លាំង នៅពេលក្រុមរបស់ពួកគេទទួលបានត្រឹមខកចិត្តសម្រាប់ការបំបែកកំណត់ត្រាប្រវត្តិសាស្ត្រក្លិបក្នុងក្របខណ្ឌពានកំពូលអឺរ៉ុប បន្ទាប់ពីកីឡាករសញ្ជាតិបារាំង Kingsley Coman បានប្រើក្បាលអុកបាល់បញ្ចូលទីនៅនាទី៥៩ ពីការបញ្ជូនរបស់ Joshua Kimmich ដើម្បីជួយក្រុម Bayern Munich យកឈ្នះ PSG ១-០។។
បើតាមសម្តីប៉ូលិសក្រុមប៉ារីស អ្នកគាំទ្រទាំងនោះថែមទាំងដុតកម្ទេចរថយន្តជាច្រើនគ្រឿង គប់បំពង់ផ្សែង និងបំផ្លាញទ្រព្យសម្បត្តិសារធារណៈជាច្រើននៅលើផ្លូវ Champs-Elysees នោះ។ មិនតែប៉ុណ្ណោះ អ្នកគាំទ្រខ្លះបានឆ្លៀតឱកាសបំបែកកញ្ចក់ហាងទំនិញ ដើម្បីចូលយកឥវ៉ាន់ទៀតផង។
ប៉ូលិសបានសម្រេចចាប់ខ្លួនជនបង្កប្រមាណជិត១៥០នាក់ ក្នុងចំណោមអ្នកគាំទ្ររបស់ PSG រាប់ពាន់នាក់។
ក្រោមការវិនិយោគរបស់មហាសេដ្ឋីកាតា PSG អាចឈានដល់វគ្គផ្តាច់ព្រ័ត្រក្របខណ្ឌអឺរ៉ុបជាលើកដំបូងចាប់តាំងពីបង្កើតក្លិបក្នុងឆ្នាំ១៩៧០មក ប៉ុន្តែមិនអាចសម្រេចក្តីសុបិននេះឡើយ ដោយទទួលបានត្រឹមរងជើងឯកប៉ុណ្ណោះ។ ដោយឡែក Bayern Munich វិញ តាមរយៈជ័យជម្នះនេះ បាននាំពួកគេក្លាយជាម្ចាស់ពាន Champions League លើកទី៦ ក្នុងប្រវត្តិសាស្ត្រក្លិប៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 9 ម៉ោង
