សិង្ហបុរី មានអ្នកឆ្លង COVID-19 ប្រចាំថ្ងៃថ្មី៣១នាក់ ដែលជាតួលេខទាបបំផុតគិតតាំងពីខែមីនា

COVID-19

អន្តរជាតិ

សិង្ហបុរី មានអ្នកឆ្លង COVID-19 ប្រចាំថ្ងៃថ្មី៣១នាក់ ដែលជាតួលេខទាបបំផុតគិតតាំងពីខែមីនា

25, Aug 2020 , 3:42 pm

រូបភាព

ដោយ: តន ចាន់រិទ្ធារ៉ា

សិង្ហបុរី នៅថ្ងៃទី២៥ ខែសីហា បានរាយការណ៍ករណីឆ្លងប្រចាំថ្ងៃចំនួន៣១ករណី ដែលជាតួលេខទាបជាងគេបំផុតក្នុងរយៈពេល៥ខែចុងក្រោយ។ ស្ថានភាពនៅសិង្ហបុរីជារួម ត្រូវបានមើលឃើញថា ស្ថិតក្រោមការគ្រប់គ្រង ប៉ុន្តែនៅតែជាបញ្ហាប្រឈមនៅឡើយ ខណៈការបើកនីតិកាលសភាថ្មី ត្រូវធ្វើឡើងនៅទីតាំងពីរផ្សេងគ្នាជាលើកដំបូងបំផុត។

ការរាយការណ៍ករណីឆ្លង COVID-19 ប្រចាំថ្ងៃទី២៥ ខែសីហា ចំនួន៣១ករណី នាំឲ្យអ្នកឆ្លងសរុបនៅសិង្ហបុរីកើនដល់៥៦៤៣៥នាក់។ ចំនួនអ្នកស្លាប់មាន២៧នាក់ប៉ុណ្ណោះ។ ៣១ករណីនេះ ជាចំនួនទាបបំផុតដែលសិង្ហបុរីរាយការណ៍រៀងរាល់ថ្ងៃតាំងពីថ្ងៃទី២២ ខែមីនាមក។

ខណៈស្ថានការណ៍ស្ថិតក្រោមការគ្រប់គ្រងបាននោះ សិង្ហបុរី នៅតែប្រយ័ត្នប្រយែងខ្ពស់ដដែល។ នៅតាមទីសាធារណៈ ប្រជាជននាំគ្នាបន្តពាក់ម៉ាស់ និងរក្សាគម្លាត។ ជាលើកដំបូងនៅសិង្ហបុរី ការបើកនីតិកាលសភាថ្មី ដែលធ្វើនៅល្ងាចថ្ងៃទី២៤ ខែសីហា ត្រូវបានធ្វើនៅរដ្ឋសភាផង និងនៅអគារសិល្បៈផង។

ថ្លែងក្នុងសុន្ទរកថាបើកកិច្ចប្រជុំសភា ប្រធានាធិបតីសិង្ហបុរី អ្នកស្រី ហាលីម៉ា យ៉ាកុប និយាយថា សិង្ហបុរី ត្រូវតែសម្របខ្លួនតាមយុទ្ធសាស្ត្រទប់ទល់ COVID-19 ខណៈស្ថានការណ៍នៅតែវិវត្តដដែល ហើយសិង្ហបុរីត្រូវតែស្វិតស្វាញក្នុងការឆ្លើយតបនឹងការផ្លាស់ប្ដូររបៀបនេះ។

សម្រាប់អាស៊ីអាគ្នេយ៍ ហ្វីលីពីនឈរលើកំពូលតារាងដោយមានអ្នកឆ្លងសរុប១៩៧១៦៤នាក់ និងស្លាប់៣០៣៨នាក់។ ឥណ្ឌូណេស៊ី ឈរលេខរៀងបន្ទាប់ជាមួយអ្នកឆ្លងសរុប១៥៥៤១២នាក់ និងស្លាប់៦៧៥៩នាក់។ ថៃនៅលេខបីមានអ្នកឆ្លងចំនួន៣៤០២នាក់ ស្លាប់៥៨នាក់, វៀតណាមមានអ្នកឆ្លង១០២២នាក់ ស្លាប់២៧នាក់, មីយ៉ាន់ម៉ាមានអ្នកឆ្លង៤៧៤នាក់ ស្លាប់៦នាក់, កម្ពុជាមាន២៧៣នាក់, ព្រុយណេមានអ្នកឆ្លង១៤៣នាក់ ស្លាប់៣នាក់ និងឡាវមានអ្នកឆ្លង២២នាក់៕