បាតុករអាមេរិករាប់រយនាក់ បាននាំគ្នាដើរតវ៉ាទាមទារយុត្តិធម៌នៅក្នុងទីក្រុង Kenosha នៃរដ្ឋ Wisconsin នៅថ្ងៃទី ២៤ ខែសីហា ក្រោយពីមានករណីបុរសស្បែកខ្មៅម្នាក់ ត្រូវបានបាញ់ចំខ្នងជាច្រើនគ្រាប់ដោយប៉ូលិសស្បែកស។ លោក ចូ បៃឌិន បានស្នើឲ្យមានការស៊ើបអង្កេតដោយតម្លាភាពក្នុងករណីបាញ់បុរសស្បែកខ្មៅនេះ។
ប៉ូលិសទីក្រុង Kenosha បានឈរត្រៀបត្រានៅមុខអគារតុលាការ ខណៈក្រុមបាតុករដើរកាន់បដា និងស្រែកតវ៉ាតាមដងផ្លូវទាមទារយុត្តិធម៌ឲ្យជនរងគ្រោះ។ នេះជាថ្ងៃទី២ហើយនៃការធ្វើបាតុកម្មក្នុងទីក្រុងនេះ។
បាតុកម្មនៅយប់ថ្ងៃអាទិត្យ (ម៉ោងនៅអាមេរិក) មានភាពហិង្សាខ្លាំង ក្រោយបាតុករបានដុតបំផ្លាញរថយន្ត និងយកដុំថ្មគប់លើអគារតុលាការ ។ ព្រឹត្តិការណ៍បានធ្វើឲ្យអាជ្ញាធរទីក្រុង Kenosha បានប្រកាសបម្រាមគោចរពីម៉ោង៨ យប់ថ្ងៃចន្ទ រហូតដល់ ម៉ោង ៧ ព្រឹកថ្ងៃអង្គារ ។
ការចេញតវ៉ារបស់ប្រជាជនទីក្រុងនេះ កើតឡើងបន្ទាប់ពីវីដេអូមួយ ត្រូវបានចែករំលែកយ៉ាងសុសសាយលើអ៊ីនធឺណិត កាលពីថ្ងៃទី២៣ ខែសីហា ដែលបង្ហាញពីការបាញ់កាំភ្លើងជាច្រើនគ្រាប់លើខ្នង បុរសស្បែកខ្មៅ ឈ្មោះថា Jacob Blake ខណៈលោកបានព្យាយាមចូលទៅក្នុងរថយន្តលោក ។
លោក Blake អាយុ ២៩ឆ្នាំ ត្រូវបានគេបញ្ជូនទៅកាន់មន្ទីរពេទ្យក្នុងទីក្រុង Milwaukee ដោយមានស្ថានភាពធ្ងន់ធ្ងរ។ ក៏ប៉ុន្តែប្រព័ន្ធផ្សព្វផ្សាយក្នុងស្រុក បានរាយការណ៍ដោយស្រង់សម្ដីគ្រួសាររបស់លោក ថា លោកបានឆ្លងផុតការវះកាត់ ហើយសុខភាពលោកបានធូរស្បើយ។
តាមការចុះផ្សាយរបស់ទីភ្នាក់ងារព័ត៌មាន AFP បេក្ខជនប្រធានាធិបតីបក្សប្រជាធិបតេយ្យ លោក ចូ បៃឌិន បានស្នើឲ្យមានការស៊ើបអង្កេតដោយតម្លាភាពក្នុងករណីបាញ់បុរសស្បែកខ្មៅនេះ។
«កាលពីថ្ងៃម្សិលមិញ លោក Jacob Blake ត្រូវបានបាញ់៧គ្រាប់ចំខ្នងដោយកម្លាំងប៉ូលិស។ កូនៗរបស់លោកបានមើលពីក្នុងរថយន្ត។ [..] យើង ត្រូវការការស៊ើបអង្កេតដោយពេញលេញនិងតម្លាភាព»។ លោក បៃឌិន និយាយដូច្នេះ។
ចំណែក អភិបាលរដ្ឋ Wiscosin លោក Mandela Barnes បាននិយាយថា ការបាញ់លើបុរសស្បែកខ្មៅ Blake បានឆ្លុះបញ្ចាំងពីលំនាំហិង្សារបស់ប៉ូលិសនៅទូទាំងប្រទេសប្រឆាំងជនស្បែកខ្មៅ។ យ៉ាងណាមិញ ខាងប៉ូលិសក្រុង Kenosha បានច្រានចោលការរិះគន់ទាំងនេះ ហើយទទូចឲ្យសាធារណជនរង់ចាំលទ្ធផលនៃការស៊ើបអង្កេតរបស់ទីភ្នាក់ងារយុត្តិធម៌របស់រដ្ឋ Wisconsin ។ មន្ត្រីប៉ូលិសដែលពាក់ព័ន្ធនឹងរឿងរ៉ាវបាញ់បុរសស្បែកខ្មៅនេះ ត្រូវបានដាក់ឲ្យឈប់សម្រាក។
មូលហេតុនៃការបាញ់លើបុរសស្បែកខ្មៅនេះ នៅមិនទាន់ត្រូវបានគេដឹងច្បាស់នៅឡើយទេ។ យ៉ាងណា លោក Ben Crump មេធាវីតំណាងឲ្យគ្រួសារលោក Blake បញ្ជាក់ក្នុងសេចក្តីថ្លែងការណ៍ថា លោក Jacob Blake បានព្យាយាមបំបែកការឈ្លោះប្រកែកគ្នារវាងស្ត្រី២នាក់។ លោកបន្តថា៖«យើងនឹងស្វែងរកយុត្តិធម៌ឲ្យ Jacob Blake និងក្រុមគ្រួសារលោក ហើយយើងក៏ទាមទារចម្លើយពីប៉ូលិស Kenosha ផងដែរ»៕