នៅក្នុងបទសម្ភាសដំបូង សម្រាប់ការចាប់ផ្តើមកម្មវិធី «អង្គរ និងលើសពីនេះ» លោកអគ្គនាយកបាន ពន្យល់អំពីតម្លៃនៃសម្បត្តិបេតិកភណ្ឌពិភពលោក ផលប៉ះពាល់នៃថ្មប្រសាទពីធម្មជាតិ ការជួសជុលថ្ម ការពង្រីកវិសាលភាពនៃការដាំដើមឈើដើម្បីជួយកាត់បន្ថយកម្តៅមកលើថ្មប្រសាទ និងរហូតដល់តួនាទីទឹកក្នុងការទប់លំនឹងប្រាសាទទៀតផង។ «អង្គរ និងលើសពីនេះ» គឺជាកម្មវិធីផលិតឯកសាររួមគ្នារវាងអាជ្ញាធរជាតិអប្សរា និងសារព័ត៌មានថ្មីៗ។
 

លោកអគ្គនាយកអាជ្ញាធរអប្សរាបានបង្ហាញការគាំទ្រកម្មវិធីថ្មីមួយនេះ ដែលលោកសង្ឃឹមថា វានឹងផ្តល់ប្រយោជន៍ដល់សាធារណជនខ្មែរ។ លោក ហង់ ពៅ បានបញ្ជាក់យ៉ាងដូច្នេះ៖«សំខាន់ជាងគេ គឺការបង្កើតឯកសារសម្រាប់មនុស្សជំនាន់ក្រោយ ពីព្រោះជាកម្មវិធីនេះ នឹងមានដំណើរការយូរ។ ជាវីដេអូបង្ហាញសកម្មភាព រស់រវើកជាភាសាខ្មែរ។»។
 

ឧទ្យានជាតិអង្គរមានទំហំ៤០១គីឡូម៉ែត្រការ៉េ ដោយមានប្រាសាទចំនួន៩១ដែលត្រូវបានចុះបញ្ជីនៃសម្បត្តិបេតិកភណ្ឌរបស់មនុស្សជាតិនៃអង្គការយូណេស្កូ។ ប៉ុន្តែសម្រាប់ លោកអគ្គនាយកនៃអាជ្ញាធរអប្សរា ប្រាសាទបុរាណដែលបុព្វបុរសខ្មែរបន្សល់ទុកឱ្យមានច្រើនរាប់រយប្រាសាទ។ លោកបន្តថា គ្រាន់តែនៅក្នុងខេត្តសៀមរាប មានប្រាសាទយ៉ាងហោចណាស់ជាង៧០០ប្រាសាទ។
 

សារសំខាន់នៃការចងក្រងឯកសារវីដេអូនេះ បើតាមលោក ហង់ ពៅ ដដែល គឺការថតទុករូបភាព និងសកម្មភាពនៃការប្រារព្ធពិធីទំនៀមទម្លាប់របស់អ្នកស្រុក ដែលលោកគ្រោងនឹងរៀបចំឱ្យក្លាយទៅជាគោលដៅទេសចរណ៍ទៀតផង។

 

សារព័ត៌មានថ្មីៗសូមថ្លែងអំណរគុណចំពោះក្រុមហ៊ុន COCA-COLA Cambodia, ក្រុមហ៊ុន Mercedes-Benz Cambodia និងសណ្ឋាគារ Vitroth’s ដែលជួយឧបត្ថម្ភកម្មវិធី «អង្គរ និងលើសពីនេះ…!»។