អន្តរជាតិ
បក្ស LDP ជប៉ុន នឹងជ្រើសតាំងអ្នកស្នងតំណែងលោក អាបេ នៅពាក់កណ្តាលខែកញ្ញា
លោកស៊ិនហ្សូ អាបេ នាយករដ្ឋមន្រ្តីជប៉ុន។ រូបភាព៖ AFP
×![]()
ដោយ: ធៀន ភារិន្ទ
បក្សប្រជាធិបតេយ្យសេរី(LDP) ជប៉ុន នឹងបោះឆ្នោតជ្រើសរើសអ្នកស្នងតំណែងរបស់លោកនាយករដ្ឋមន្ត្រី ស៊ិនហ្សូ អាបេ នៅពាក់កណ្តាលខែកញ្ញាខាងមុខ។ នេះបើតាមការចុះផ្សាយរបស់ទីភ្នាក់ងារព័ត៌មានជប៉ុន Kyodo នៅថ្ងៃទី២៨ ខែសីហា។
បន្ទាប់ពីដឹកនាំជប៉ុនបាន ៨ឆ្នាំជាប់គ្នា លោកនាយករដ្ឋមន្ត្រី ស៊ិនហ្សូ អាបេ បានប្រកាសលាលែងពីតំណែង ដោយសារតែបញ្ហាក្រពះ។ ដំណឹងនេះ បានបង្កឲ្យមានការភ្ញាក់ផ្អើលយ៉ាងខ្លាំង បើទោះបីជាមានព័ត៌មានក្នុងស្រុកជប៉ុនបានចុះផ្សាយពីបញ្ហានេះមុខក៏ដោយ។ នីតិវិធីបន្ទាប់ គឺការជ្រើសរើសអ្នកស្នងតំណែងរបស់លោកនាយករដ្ឋមន្ត្រី។
តាមការចុះផ្សាយរបស់ទីភ្នាក់ងារជប៉ុន Kyodo កាលបរិច្ឆេទនៃការបោះឆ្នោតជ្រើសរើសប្រធានបក្សប្រជាធិបតេយ្យសេរី នឹងត្រូវប្រកាសនៅថ្ងៃទី១ ខែកញ្ញាខាងមុខនេះ។ ថ្ងៃទី១៥ ខែកញ្ញា អាចជាថ្ងៃបោះឆ្នោតជ្រើសរើសមេដឹកនាំរបស់បក្សប្រជាធិបតេយ្យសេរី ដែលជាបក្សកាន់អំណាចរបស់ជប៉ុន។ ប្រធានបក្សថ្មីនេះ នឹងឈរឈ្មោះជាបេក្ខជននាយករដ្ឋមន្ត្រីនៅសភា ហើយគេរំពឹងថា នឹងជាប់ឆ្នោតដោយស្រួល ព្រោះបក្ស LDP មានសំឡេងគ្រប់គ្រាន់នៅសភា។ ប្រធានបក្សថ្មី នឹងកាន់តំណែងដល់ខែកញ្ញា ឆ្នាំ២០២១ ដែលជាពេលចប់អាណត្តិប្រធានបក្សរបស់លោក អាបេ។
បុគ្គល ដែលអាចស្នងតំណែងរបស់លោកនាយករដ្ឋមន្ត្រីមិនទាន់ដឹងច្បាស់ ខណៈបេក្ខជនមានច្រើន។ អគ្គលេខាធិការបក្ស LDP លោក Shigeru Ishiba, អតីតរដ្ឋមន្ត្រីការបរទេសជប៉ុន លោក Fumio Kishida បានបង្ហាញពីចេតនាចង់ឈរឈ្មោះ ក្នុងការបោះឆ្នោតរបស់បក្ស។ ជាមួយគ្នានេះ លោក Yoshihide Sugaប្រធានលេខាធិការគណៈរដ្ឋមន្ត្រី និងរដ្ឋមន្ត្រីការពារជាតិ តារ៉ូ កូណូ ក៏ជាបេក្ខជនដ៏សំខាន់មួយដែរ ក្នុងការបោះឆ្នោតនេះ។
ចំណែកឧបនាយករដ្ឋមន្ត្រី និងរដ្ឋមន្ត្រីហិរញ្ញវត្ថុ តារ៉ូ អាសូ បានអះអាងថា លោកមិនមានគម្រោងឈរឈ្មោះ ដើម្បីប្រកួតប្រជែងយកតំណែងប្រធានបក្ស និងស្នងតំណែងនាយករដ្ឋមន្ត្រីទេ។
នៅក្នុងថ្ងៃប្រកាសលាលែងពីតំណែង លោកអាបេ បានប្រកាសថា លោកនឹងកាន់តំណែងជានាយករដ្ឋមន្ត្រីសិន រហូតដល់ថ្ងៃបក្សអាចជ្រើសរើសអ្នកស្នងតំណែងជំនួស។ បន្ថែមពីលើនេះលោក អាបេ ក៏មិនបានឆ្លើយនឹងសំណួររបស់អ្នកសារព័ត៌មាន ជុំវិញថាតើនរណា អាចកាន់តំណែងជំនួសលោកបានដែរ។
សូមបញ្ជាក់ថា លោកអាបេ នៅក្នុងឆ្នាំ២០០៧ ក៏បានប្រកាសលាលែងពីតំណែងពីនាយករដ្ឋមន្ត្រីជប៉ុនដែរ ដោយសារតែជំងឺក្រពះនេះ។ ប៉ុន្តែនៅចុងឆ្នាំ២០១២ លោកអាបេបានក្លាយជានាយករដ្ឋមន្ត្រីជប៉ុនម្តងទៀត។ លោក អាបេ ក៏បំបែកកំណត់ត្រាមួយ គឺជានាយករដ្ឋមន្ត្រី ដែលកាន់តំណែងបានជាប់ៗគ្នាយូរជាងគេបង្អស់ ដោយលោកកាន់តំណែងបានរហូតដល់ទៅ ២៧៩៩ថ្ងៃ គិតត្រឹមថ្ងៃទី២៦ ខែធ្នូ ឆ្នាំ២០១២ ថ្ងៃទី២៤ ខែសីហា ឆ្នាំ២០២០ នេះ។ កន្លងមក លោក Eisaku Sato ដែលជាអតីតនាយករដ្ឋមន្ត្រីជប៉ុនពីឆ្នាំ១៩៦៤ ដល់ឆ្នាំ១៩៧២ និងត្រូវជាជីតារបស់លោក អាបេ ផងនោះ កាន់តំណែងបាន២៧៩៨ថ្ងៃជាប់គ្នា៕
Tag:
ជប៉ុន
© រក្សាសិទ្ធិដោយ thmeythmey.com
