លោក វ៉ាង យី៖ ប្រធានព្រឹទ្ធសភាឆែក នឹងជួបទុក្ខធំព្រោះបំពានគោលនយោបាយចិនតែមួយ

អន្តរជាតិ

លោក វ៉ាង យី៖ ប្រធានព្រឹទ្ធសភាឆែក នឹងជួបទុក្ខធំព្រោះបំពានគោលនយោបាយចិនតែមួយ

31, Aug 2020 , 1:02 pm

រូបភាព

រដ្ឋមន្រ្តីការបរទេសចិន វ៉ាង យី និងប្រធានព្រឹទ្ធសភាឆែក Milos Vystrcil ។

ដោយ: តន ចាន់រិទ្ធារ៉ា

ប្រមុខការទូតចិន វ៉ាង យី បានចេញសារព្រមានចំៗទៅកាន់ប្រធានព្រឹទ្ធសភាឆែក Milos Vystrcil ដែលកំំពុងធ្វើទស្សនកិច្ចនៅកោះតៃវ៉ាន់។ ពីទឹកដីអាល្លឺម៉ង់ លោក វ៉ាង ព្រមានថា ប្រធានព្រឹទ្ធសភាឆែករូបនេះ នឹងរងផលវិបាកធ្ងន់ធ្ងរចំពោះសកម្មភាពបំពានគោលនយោបាយចិនតែមួយបែបនេះ ដែលវាជាការធ្វើសត្រូវជាមួយប្រជាជនចិនទាំងអស់។

ដំណើរទស្សនកិច្ចរបស់លោក Milos Vystrcil ប្រធានព្រឹទ្ធសភាឆែកនៅកោះតៃវ៉ាន់ ធ្វើឲ្យទីក្រុងប៉េកាំងក្ដៅស្លឹកត្រចៀកយ៉ាងខ្លាំង។ លោក Vystrcil ទៅដល់កោះតៃវ៉ាន់នៅថ្ងៃទី៣០ ខែសីហា ជាមួយប្រតិភូ៩០នាក់ សម្រាប់ដំណើរទស្សនកិច្ច៥ថ្ងៃ ដែលត្រូវបានចាត់ទុកជាបេសកកម្មពាណិជ្ជកម្មផង។ លោកនឹងថ្លែងសុន្ទរកថានៅសភាតៃវ៉ាន់ និងជួបជាមួយប្រធានាធិបតី Tsai Ing-wen។

ចិនបានព្រមានប្រធានព្រឹទ្ធសភឆែកតាំងពីមុនទៅដល់តៃវ៉ាន់មកម្ល៉េះពីផលវិបាកដែលអាចកើតឡើងពីដំណើរទស្សនកិច្ចបែបនេះ។ នៅថ្ងៃទី៣១ ខែសីហា រដ្ឋមន្ត្រីការបរទេសចិន វ៉ាង យី ក៏បានព្រមានលោក Vystrcil ម្ដងទៀត។ បើតាមសេចក្ដីថ្លែងការណ៍របស់ក្រសួងការបរទេសចិន លោក វ៉ាង បានថ្លែងពីទឹកដីអាល្លឺម៉ង់ថា៖ «យើងនឹងឲ្យលោក Vystrcil ទទួលផលតបស្នងវិញយ៉ាងចាស់ដៃចំពោះគំនិតខ្លី និងទង្វើឱកាសនិយមផ្នែកនយោបាយរបស់លោក។»

ក្នុងសេចក្ដីថ្លែងការណ៍ដដែល លោក វ៉ាង ដែលជាទីប្រឹក្សារដ្ឋចិនផងនោះ ក៏ព្រមានទៀតថា ការតតាំងគោលនយោបាយចិនតែមួយ ជាការយកប្រជាជនចិន១,៤ពាន់លាននាក់ធ្វើសត្រូវ ហើយរដ្ឋាភិបាល និងប្រជាជនចិន នឹងមិនអត់អោនឲ្យការបង្ករឿងដោយចំហរបស់ប្រធានសភាឆែក និងក្លាំងប្រឆាំងចិនបែបនេះឡើយ។

គោលនយោបាយចិនតែមួយ សំដៅលើការឯកភាពគ្នារវាងចិន និងកោះតៃវ៉ាន់ដែលថា ទាំងចិនដីគោក ទាំងតៃវ៉ាន់ ជារបស់ចិនតែមួយ។ ភាគីទាំងពីរសុទ្ធតែអះអាងរៀងៗខ្លួនថា ជាតំណាងស្របច្បាប់តែមួយគត់របស់ចិន។ ប៉ុន្តែតៃវ៉ាន់ ដែលជាដែនកោះតូចមួយនោះ បានបាត់បង់សម្ព័ន្ធមិត្តបន្តិចម្ដងៗទៅឲ្យចិនដីគោក។ ប្រទេសមិនដល់២០ឡើយនៅជុំវិញពិភពលោកដែលទទួលស្គាល់តៃវ៉ាន់ជាប្រទេសឯករាជ្យនោះ។