ជាតិ
សង្គមជាតិ
អាមេរិក នឹងគាំទ្រអាជ្ញាធរមីនដល់ទីបញ្ចប់នៃការបោះសម្អាតគ្រាប់មីននៅកម្ពុជា
លោក W. Patrick Murphy ឯកអគ្គរដ្ឋសហរដ្ឋអាមេរិកប្រចាំកម្ពុជា ក្នុងថ្លែងសុន្ទរកថា Murphy ក្នុងពិធីគោរពវិញ្ញាណក្ខន្ធដល់ពលរដ្ឋខ្មែរដែលបានស្លាប់ដោយសារគ្រាប់មីន ក្នុងបរិវេណស្ថានទូតអាមេរិក កាលពីព្រឹកថ្ងៃទី៣១សីហា ឆ្នាំ២០២០។ រូបថត៖ អ៊ូ សុខមាន/thmeythmey
×![]()
ភ្នំពេញ៖ សហរដ្ឋអាមេរិក នឹងបន្តសកម្មភាពគាំទ្រដល់អាជ្ញាធរមីនដល់ទីបញ្ចប់នៃការបោះសម្អាតគ្រាប់មីនឱ្យអស់ពីកម្ពុជា។ នេះជាការលើកឡើងរបស់លោក W. Patrick Murphy ឯកអគ្គរដ្ឋសហរដ្ឋអាមេរិកប្រចាំកម្ពុជា ដោយបានបញ្ជាក់ ចាប់តាំងពីឆ្នាំ១៩៩៣មក អាមេរិកបានផ្តល់ជំនួយដល់កម្ពុជា បានជាង១៧០លានដុល្លារ ហើយ។
បើតាមលោក W. Patrick Murphy ក្នុងពិធីគោរពវិញ្ញាណក្ខន្ធដល់ពលរដ្ឋខ្មែរដែលបានស្លាប់ដោយសារគ្រាប់មីន កាលពីព្រឹកថ្ងៃទី៣១សីហា ក្នុងបរិវេណស្ថានទូតអាមេរិកប្រចាំកម្ពុជា ការគាំទ្រដល់កម្ពុជាក្នុងការបោះសម្អាតគ្រាប់មីនឱ្យអស់នៅត្រឹមឆ្នាំ២០២៥ ស្របតាមគោលនយោបាយរបស់រដ្ឋាភិបាលនេះ គឺជាការគាំទ្រជំនួយហិរញ្ញវត្ថុផ្នែកមនុស្សធម៌ ខណៈដែលសហរដ្ឋអាមេរិក មិនមែនជាប្រទេសផលិតគ្រាប់មីន។
លោក W. Patrick Murphy ឯកអគ្គរដ្ឋសហរដ្ឋអាមេរិកប្រចាំកម្ពុជា កំពុងឈរថតជាមួយ លី ធុជ អនុប្រធានអាជ្ញាធរមីន(ស្តាំ) និងមន្ត្រីរបស់អាជ្ញាធរមីន ក្នុងបរិវេណស្ថានទូតអាមេរិក កាលពីព្រឹកថ្ងៃទី៣១សីហា ឆ្នាំ២០២០។ រូបថត៖ អ៊ូ សុខមាន/thmeythmey
ឯកអគ្គរដ្ឋទូតអាមេរិកប្រចាំកម្ពុជារូបនេះ មានប្រសាសន៍ថា៖«មិនមានគ្រាប់មីនសូម្បីតែមួយគ្រាប់ ដែលផលិតនៅសហរដ្ឋអាមេរិក។ ប៉ុន្តែ អាមេរិកគឺជាអ្នកដែលបានចូលរួមចំណែកធំបំផុតនៅក្នុងកិច្ចខិតខំប្រឹងប្រែងបោះសម្អាតគ្រាប់មីននៅកម្ពុជា»។
លោកបានបន្តថា តាមរយៈកិច្ចខិតខំចូលរួមបោះសម្អាតមីននៅកម្ពុជាកន្លងមកនេះ គឺពិតជាបានបង្ហាញនូវភាពជោគជ័យពិតប្រាកដមួយ ដែលបានកាត់បន្ថយជនរងគ្រោះដោយសារគ្រាប់មីន ពីចំនួន៤ពាន់នាក់ មកធ្លាក់នៅត្រឹមក្រោម៧០នាក់ប៉ុណ្ណោះក្នុងមួយឆ្នាំ នារយៈពេលប៉ុន្មានឆ្នាំចុងក្រោយនេះ។
បច្ចុប្បន្ន កម្ពុជានៅមានមីនចន្លោះពី៤ទៅ៦លានគ្រាប់ទៀតដែលមិនទាន់ផ្ទះ ដោយមាននៅក្នុងតំបន់សង្ស័យជិត៩ពាន់កន្លែង នៅទូទាំងប្រទេស។ នេះបើយោងតាមស្ថិតិមីនរបស់អាជ្ញាធនមីន ដោយបង្ហាញថា ចាប់តាំងពីឆ្នាំ១៩៧៩មក មានពលរដ្ឋកម្ពុជាចំនួន៦,៤ម៉ឺនបានស្លាប់ និង៤ម៉ឺននាក់ទៀត ពិការដោយសារតែគ្រាប់មីន។
លោក W. Patrick Murphy ឯកអគ្គរដ្ឋសហរដ្ឋអាមេរិកប្រចាំកម្ពុជា កំពុងឈរថតជាមួយ លី ធុជ អនុប្រធានអាជ្ញាធរមីន(ស្តាំ)និងជាមួយេះព្រះសង្ឃចំនួន៤អង្គក្នុងពិធីគោរពវិញ្ញាណក្ខន្ធដល់ពលរដ្ឋខ្មែរដែលបានស្លាប់ដោយសារគ្រាប់មីន កាលពីព្រឹកថ្ងៃទី៣១សីហា ឆ្នាំ២០២០។ រូបថត៖ អ៊ូ សុខមាន/thmeythmey
គិតមកដល់ពេលនេះ កម្ពុជា បានរកឃើញនិងកម្ទេចចោលគ្រាប់មីនប្រឆាំងមនុស្សជាង១លានគ្រាប់ គ្រាប់មីនប្រឆាំងរថគ្រោះជាង២,៤ម៉ឺនគ្រាប់ និងសំណល់ជាតិផ្ទុះជាង២,៧លានគ្រាប់។ ចំនួនប្រជាជនដែលរងគ្រោះ បានធា្លក់ចុះពី២,៣២០នាក់ ក្នុងឆ្នាំ១៩៩៦ មកនៅត្រឹម៥៨នាក់ ក្នុងឆ្នាំ២០១៨។ កន្លងមករដ្ឋាភិបាលកម្ពុជា បានអនុម័តផែនការយុទ្ធសាស្ត្រជាតិស្តីពីសកម្មភាពមីន២០១៨-២០២៥ ក្នុងគោលបំណងបំផ្លាញមីន សំណល់ជាតិផ្ទុះ និងគ្រាប់បែកចង្កោមឱ្យអស់ ដើម្បីឲ្យកម្ពុជាក្លាយជាទឹកដីដែលគ្មានមីន នៅត្រឹមឆ្នាំ២០២៥ ដោយត្រូវការថវិកាប្រមាណ៤០០លានដុលា្លរអាមេរិក៕
Tag:
មីន
លោក W. Patrick Murphy
© រក្សាសិទ្ធិដោយ thmeythmey.com
