និស្សិតខ្មែរ ១រូប និងនិស្សិតអាស៊ាន ១៥រូបទៀត ប្រជែងបានអាហារូបករណ៍ល្បីឈ្មោះ ថ្នាក់តំបន់

អត្ថបទពាណិជ្ជកម្ម

និស្សិតខ្មែរ ១រូប និងនិស្សិតអាស៊ាន ១៥រូបទៀត ប្រជែងបានអាហារូបករណ៍ល្បីឈ្មោះ ថ្នាក់តំបន់

03, Sep 2020 , 4:40 pm

រូបភាព

ដោយ: សារព័ត៌មានថ្មីៗ

ភ្នំពេញ ថ្ងៃទី៣ ខែសីហា ឆ្នាំ២០២០៖ កម្មវិធីអាហារូបករណ៍តំបន់អាស៊ាន របស់ធនាគារ ស៊ីអាយអិមប៊ី ឆ្នាំ២០២០ បានប្រកាសឈ្មោះនិស្សិតជ័យលាភីចំនួន ១៦រូប ដែលបានអាហារូបករណ៍១០០% ពីកម្មវិធីរបស់ខ្លួន ដើម្បីបន្តការសិក្សានៅតាមបណ្តាសាកលវិទ្យាល្បីៗមួយចំនួននៅក្នុងតំបន់អាស៊ាន និងនៅទូទាំងពិភពលោក។ ជ័យលាភីទាំង១៦រូបនេះ គឺត្រូវបានជម្រុះចេញពីក្នុងចំណោមបេក្ខជនជិត ១ម៉ឺននាក់ មកពីបណ្តាប្រទេស ក្នុងតំបន់អាស៊ាន រួមមានប្រទេសកម្ពុជា ម៉ាឡេស៊ី ឥណ្ឌូនេស៊ី សិង្ហបុរី ថៃ ហ្វីលីពីន និងវៀតណាម ដែលបានដាក់ពាក្យស្នើសុំ និងប្រកួតប្រជែង។

បើតាមកម្មវិធីអាហារូបករណ៍តំបន់អាស៊ាន របស់ធនាគារ ស៊ីអាយអិមប៊ី ឆ្នាំ២០២០ និស្សិតជ័យលាភីអារូបករណ៍លំដាប់អន្តរជាតិនេះ បានជ្រើសរើសសាកលវិទ្យាល័យល្បីឈ្មោះនានា ទាំងនៅក្នុងតំបន់អាស៊ាន និងជុំវិញពិភពលោក រួមមានសហរដ្ឋអាមេរិក និងចក្រភពអង់គ្លេសជាដើម សម្រាប់ការសិក្សាថ្នាក់បរិញ្ញាបត្ររបស់ខ្លួន។

ក្នុងចំណោមនិស្សិតជ័យលាភីទាំងអស់ ក៏មាននិស្សិតខ្មែរដ៏ឆ្នើមមួយរូបផងដែរ ដែលទទួលបានអាហារូបករណ៍ថ្នាក់តំបន់នេះ។ ក្រៅពីមានប្រវត្តិសិក្សាពូកែ ជាមួយនឹងនិទ្ទេសថ្នាក់ទុតិយភូមិ លំដាប់ A និងពិន្ទុ ៩៩,៨៩ យុវតី ងួន លីនដា ក៏ទទួលបានចំណាត់ថ្នាក់លេខ ១ ទៀតផង ក្នុងចំណោមនិស្សិតអាស៊ាន ទាំង៣១រូប ក្នុងកិច្ចសម្ភាសវគ្គផ្តាច់ព្រ័ត្រ ដោយគណៈកម្មាធិការ និងគណៈគ្រប់គ្រង របស់ស៊ីអាយអិមប៊ី គ្រុប។ ក្រោយទទួលបានជ័យលាភីអាហារូបករណ៍ថ្នាក់តំបន់នេះ យុវតី លីនដា បានសម្រេចជ្រើសរើសសិក្សាថ្នាក់បរិញ្ញាបត្រ វិស្វកម្មជីវសាស្ត្រ នៅសាកលវិទ្យាល័យ ភូមិន្ទភ្នំពេញ។

ដោយសារជាកូនស្រីទោលក្នុងគ្រួសារ និងមានបំណងលើកកម្ពស់វិស័យអប់រំរបស់ជាតិ យុវតី លីនដា ពេញចិត្តជ្រើសរើសសិក្សានៅក្នុងប្រទេស សម្រាប់កម្មវិធីអាហារូបករណ៍តំបន់អាស៊ាន របស់ធនាគារ ស៊ីអាយអិមប៊ី ឆ្នាំ២០២០។ ជាមួយគ្នានេះ យុវតីឆ្នើមរូបនេះ បានបង្ហាញចំណាប់អារម្មណ៍ថា៖ «ខ្ញុំពិតជាសប្បាយចិត្តណាស់ ដែលប្រជែងបានអាហារូបករណ៍ថ្នាក់តំបន់នេះ ក្នុងចំណោមនិស្សិត មកពីទូទាំងតំបន់អាស៊ាន។ តាមរយៈអាហារូបករណ៍នេះ ខ្ញុំអាចសម្រេចក្តីស្រមៃរបស់ខ្ញុំ ក្នុងការសិក្សាមុខជំនាញ និងជ្រើសរើសសាកលវិទ្យាល័យ ដែលខ្ញុំស្រឡាញ់ រួមទាំងទទួលបានការរ៉ាប់រងថ្លៃចំណាយផ្សេងៗ។ ខ្ញុំសូមថ្លែងអំណរគុណ ដល់ធនាគារ ស៊ីអាយអិមប៊ី និង ស៊ីអាយអិមប៊ី គ្រុប ដែលបានរៀបចំកម្មវិធីអាហារូបករណ៍នេះឡើង»។

ដើម្បីប្រជែងយកអាហារូបករណ៍តំបន់អាស៊ាន របស់ធនាគារ ស៊ីអាយអិមប៊ី និស្សិតជ័យលាភី ត្រូវឆ្លងកាត់ដំណាក់កាលជ្រើសរើស និងវាយតម្លៃយ៉ាងហ្មត់ចត់ ពីគណៈកម្មាធិការ និងគណៈគ្រប់គ្រង ទាំងក្នុងស្រុក និងថ្នាក់តំបន់ របស់ស៊ីអាយអិមប៊ី គ្រុប ផ្អែកលើការធ្វើតេស្តអនឡាញ ការសម្ភាសពីរដំណាក់កាល និងកម្មសិក្សាបោះជំរំជាដើម។ អាហារូបករណ៍ថ្នាក់តំបន់នេះ ឧបត្ថម្ភលើថ្លៃសិក្សាពេញលេញ និងថ្លៃចំណាយផ្សេងៗទាំងស្រុង សម្រាប់មួយចប់ថ្នាក់បរិញ្ញាបត្រ របស់និស្សិតជ័យលាភី ដែលពួកគេអាចជ្រើសរើសសាកលវិទ្យាល័យល្បីឈ្មោះណាក៏ដោយ ទាំងនៅក្នុងស្រុក ក្នុងតំបន់អាស៊ាន និងជុំវិញពិភពលោក។

លោកស្រី អ៊ុំ ចិន្តាភក្តី នាយកធនធានសាជីវកម្ម របស់ធនាគារ ស៊ីអាយអិមប៊ី បានមានប្រសាសន៍ថា៖ «ស្របតាមទស្សនវិស័យ និងការប្តេជ្ញាចិត្តរបស់ ស៊ីអាយអិមប៊ី គ្រុប ធនាគារ ស៊ីអាយអិមប៊ី បានផ្សព្វផ្សាយ និងលើកទឹកចិត្ត ដល់និស្សិតខ្មែរទាំងអស់ ឲ្យដាក់ពាក្យស្នើសុំ និងប្រកួតប្រជែង ក្នុងកម្មវិធីអាហារូបករណ៍ថ្នាក់តំបន់នេះ ជាមួយនិស្សិតអាស៊ានដទៃទៀត ជារៀងរាល់ឆ្នាំ។ ហើយឆ្នាំនេះ គឺជាកិត្តិយសរបស់ធនាគារ និងប្រទេសយើងទាំងមូល ដែលមាននិស្សិតខ្មែរយើងមួយរូបទៀត ប្រជែងបានអាហារូបករណ៍នេះ ជាមួយនឹងពិន្ទុខ្ពស់ដាច់គេ។ ខ្ញុំសូមជូនពរ ដល់និស្សិតឆ្នើមទាំងអស់ ដែលទទួលបានអាហារូបករណ៍នេះ បន្តជោគជ័យលើការសិក្សា និងអាជីពការងារ ដើម្បីរួមចំណែកជួយដល់សង្គមជាតិ នាពេលអនាគត»។

គួររំលឹកផងដែរថា មាននិស្សិតខ្មែរឆ្នើម ចំនួន ២រូប មកហើយ ដែលប្រជែងឈ្នះជ័យលាភីអាហារូបករណ៍នេះ ដោយនិស្សិតមួយរូប កំពុងសិក្សានៅសាកលវិទ្យាល័យ McGil ប្រទេសកាណាដា និងនិស្សិតមួយរូបទៀត នឹងសិក្សានៅសាកលវិទ្យាល័យ ភូមិន្ទភ្នំពេញ ប្រទេសកម្ពុជា នាពេលឆាប់ៗនេះ។ អត្ថប្រយោជន៍ដ៏សំខាន់មួយទៀត សម្រាប់និស្សិតជ័យលាភីអាហារូបករណ៍ទាំងអស់ គឺឱកាសទទួលបានការងារ ក្នុងចំណោមប្រទេសទាំង ១៦ ដែលមានសាខារបស់ ស៊ីអាយអិមប៊ី គ្រុប៕