COVID-19
អន្តរជាតិ
COVID-19 បង្កភាពស្រពេចស្រពិលដល់ដំណើរការបោះឆ្នោតថ្នាក់ជាតិនៅមីយ៉ាន់ម៉ា រូបភាព៖ Reuters
× មីយ៉ាន់ម៉ា នៅថ្ងៃទី៣ ខែកញ្ញា បានរាយការណ៍ថា មានករណីឆ្លងជំងឺ COVID-19 ចំនួន ១១៦ករណី និងព្រឹកថ្ងៃទី៤ ខែកញ្ញា មាន ២២ករណីបន្ថែមទៀត។ ការបន្តរកឃើញករណីឆ្លងបែបនេះ កំពុងបង្អាក់នីតិវិធីនៃការបោះឆ្នោត ក៏ដូចជាធ្វើឲ្យមានភាពស្រពេចស្រពិលក្នុងការបោះឆ្នោតថ្នាក់ជាតិនៅមីយ៉ាន់ម៉ាដែលគ្រោងធ្វើនៅខែវិច្ឆិកាខាងមុខ។
ស្ថានភាព COVID-19 ហាក់មិនថមថយឡើយនៅមីយ៉ាន់ម៉ា ខណៈថ្ងៃបោះឆ្នោតថ្នាក់ជាតិកៀកចូលមកដល់។ នៅព្រឹកថ្ងៃទី៤ ខែកញ្ញា មីយ៉ាន់ម៉ា ប្រកាសថាមានករណីឆ្លងកូរ៉ូណាវីរុសថ្មីចំនួន ២២ករណី។ តួលេខ COVID-19 សរុបរបស់មីយ៉ាន់ម៉ាមានចំនួន ១១៣៣ករណី និងអ្នកស្លាប់ចំនួន ៧នាក់។ ចំណែកអ្នកជាសះស្បើយមានចំនួន ៣៥៩នាក់។ ករណីឆ្លងនៅមីយ៉ាន់ម៉ា បានហក់ឡើងខ្លាំងចាប់តាំងពីថ្ងៃទី១៦ ខែសីហាកន្លងមក។
បញ្ហា COVID-19 កំពុងបង្កផលវិបាកដល់នីតិវិធីនៃការបោះឆ្នោតថ្នាក់ជាតិនៅប្រទេសអាស៊ីអាគ្នេយ៍មួយនេះ។ មកទល់ពេលនេះ គណៈកម្មការរៀបចំការបោះឆ្នោតសហព័ន្ធរបស់មីយ៉ាន់ម៉ា (UEC) មិនទាន់ប្រកាសថ្ងៃធ្វើយុទ្ធនាការបោះឆ្នោតសម្រាប់គណបក្សនយោបាយនៅឡើយទេ។ តាមច្បាប់មីយ៉ាន់ម៉ា យុទ្ធនាការបោះឆ្នោត ត្រូវធ្វើឡើងក្នុងរយៈពេល ៦០ថ្ងៃ មុនការបោះឆ្នោតថ្នាក់ជាតិ។
ចំណែកការបោះឆ្នោតថ្នាក់ជាតិវិញ មីយ៉ាន់ម៉ា អាចនឹងលើកពេលបោះឆ្នោតដែលគ្រោងរៀបចំនៅថ្ងៃទី៨ ខែវិច្ឆិកា ទៅកាលបរិច្ឆេទផ្សេង ប្រសិនបើ COVID-19 នៅតែអុកឡុកក្នុងប្រទេស។ បើតាមការអះអាងរបស់អ្នកនាំពាក្យ UEC លោក U Myint Naing នៅថ្ងៃទី៣ ខែកញ្ញា ព័ត៌មានទាក់ទិននឹងការពន្យារពេលបោះឆ្នោត មីយ៉ាន់ម៉ា នឹងប្រកាសនៅខែក្រោយ។
«យើងនឹងសម្រេច បន្ទាប់ពីពិនិត្យមើលស្ថាន1ភាព COVID-19 ក្នុងខែតុលា»។ អ្នកនាំពាក្យ UEC បានលើកឡើងបែបនេះ ដោយបន្ថែមថា គណៈកម្មការរៀបចំការបោះឆ្នោតសហព័ន្ធ គ្រោងនឹងបង្កើតមណ្ឌលបោះឆ្នោតឲ្យច្រើនជាងមុន និងកែប្រែគោលការណ៍មួយចំនួន ដើម្បីគោរពតាមវិធានបង្ការ COVID-19។
ក្នុងការកែប្រែនេះ លោក Myint Naing បានលើកឡើងពីចំណុចមួយថា ប្រជាជន ដែលមកដល់មណ្ឌលបោះឆ្នោតនៅម៉ោង៤ ឬផុតម៉ោង៤ គឺមិនបាត់បង់សិទ្ធិបោះឆ្នោតឡើយ។ នេះបើតាមការចុះផ្សាយរបស់សារព័ត៌មាន The Irrawaddy។
សូមបញ្ជាក់ថា នៅក្នុងការបោះឆ្នោតថ្នាក់ឆ្នាំ២០២០នេះ UEC នឹងប្រកាសពីតំបន់មួយចំនួន ដែលមិនអនុញ្ញាតឲ្យមានការបោះឆ្នោតផងដែរដោយសារហេតុផលជម្លោះប្រដាប់អាវុធ។ តំបន់ ដែលហាមឃាត់ការបោះឆ្នោតអាចមាន រដ្ឋរ៉ាក់ឃីន និងរដ្ឋសាន ទីដែលមានការប្រឈមមុខរវាងក្រុមប្រដាប់អាវុធភាគតិច និងយោធាមីយ៉ាន់ម៉ា ជាដើម៕
Tag:
មីយ៉ាន់ម៉ា
COVID-19
© រក្សាសិទ្ធិដោយ thmeythmey.com