ជាតិ
សហគមន៍ចាប៉ីអមតៈ បង្កើតកម្មវិធីរំឭកគុណគ្រូ ដើម្បីបញ្ជូនកុសលដល់បុព្វការីជនចាប៉ីដងវែង
×
ដោយ៖ ប៉ូ សុភា
ក្រុមសហគមន៍ចាប៉ីអមតៈ និងអ្នកស្រលាញ់ចាប៉ី បានរៀបចំកម្មវីធីរំឭកគុណគ្រូ និងបង្សុកូលជូនព្រឹទ្ធាចារ្យចាប៉ីដងវែងគ្រប់ជំនាន់នៅវត្តនាគវន្ត កាលពីថ្ងៃទី៣ កញ្ញា ។ ក្រៅពីពិធីបង្សុកូលឧទ្ទិសកុសលជូនបុព្វការីចាប៉ីនេះ ក៏មានការបង្ហាញសម្លៀកបំពាក់បែបប្រពៃណី និងការសម្ដែងចាប៉ីដោយផ្ទាល់ទីកាន់សាធារណៈជនផងដែរ។
លោក ពេជ សារ៉ាត ប្រធានសហគមន៍ចាប៉ីអមតៈ
ប្រធានសហគមន៍ចាប៉ីអមតៈ លោក ពេជ សារ៉ាត ថា ការរៀបចំកម្មវិធីនេះ ក្នុងគោលបំណងឱ្យអ្នកចាប៉ីទាំងអស់បានមកជួបជុំធ្វើបុណ្យរួមគ្នា ដើម្បីឧទ្ទិសកុសលជូនបុព្វការីជនចាប៉ីដងវែងគ្រប់ជំនាន់ដែលលោកបានចែកឋានទៅ និងឆ្លៀតឱកាសឱ្យអ្នកចាប៉ីគ្រប់រូបបានបង្ហាញពីការស្លៀកពាក់បែបបុរាណ និងសំដែងចាប៉ីដងវែង ជូនសាធារណៈមកចូលរួមក្នុងកម្មវិធីដាក់បិណ្ឌផង ។ « ការសម្ដែងចាប៉ីនេះ ទុកជាការរំឭកគុណដែលបុព្វការីជនលោកបានបន្សល់ទុកនូវស្នាដៃសិល្បៈដល់ក្មេងៗជំនាន់ក្រោយ មួយវិញឈឆ្លៀតឱកាសបានជួយផ្សព្វផ្សាយសិល្បៈ ដើម្បីថែរក្សានិងអភិរក្សតន្ត្រីចាប៉ីបុរាណខ្មែរផងដែរ»។ នេះជាការបញ្ជាក់របស់លោក ពេជ សារ៉ាត ។
លោកព្រឹទ្ធាចារ្យចាប៉ីដងវែង ឯ យិន វ័យ៦៣ឆ្នាំ
ដ្បិតក្នុងកម្មវិធីនេះ ទទួលបានផ្លែផ្កាល្អ ក៏ប៉ុន្តែលោក ពេជ សារ៉ាត គិតថា សិល្បៈចាប៉ី នូវតែមិនទាន់ ទទួលស្គាល់ទូលំទូលាយពីសំណាក់សាធារណៈជននៅឡើយ។ ថ្លែងប្រាប់សារព័ត៌មានថ្មីៗ ប្រធានសហគមន៍ចាប៉ីអមតៈរូបនេះ បានបញ្ជាក់ដូច្នេះថា៖ « កម្មវីធីរំឭកគុណគ្រូធ្វើឡើងបានរលូន ដោយសារមានការចូលរួមពីអ្នកចាប៉ី និងសាធារណៈជនមួយចំនួនតូចដែលស្នេហាសិល្បៈបុរាណនេះ។ ក៏ប៉ុន្តែខ្ញុំនូវតែមើលឃើញថាពលរដ្ឋមួយចំនួនធំនូវតែមិនចាប់អារម្មណ៍ថែរក្សា និងមិនឱ្យតម្លៃសិល្បៈបុរាណមួយនេះដដែល»។
ព្រឹទ្ធាចារ្យ ឯ យិន វ័យ ៦៣ឆ្នាំជាអ្នកចាប៉ីដងវែង ដែលធ្វើដំណើរមកពីខេត្តព្រៃវែង ដើម្បីមកចូលរួមក្នុងកម្មវិធី មានប្រសាសន៍ថា កម្មវិធីនេះពិតជាមានន័យណាស់សម្រាប់សហជិកក្នុងសហគមន៍ និងអ្នកចាប៉ីគ្រប់ទីកន្លែងមកជួបជុំគ្នា ដើម្បីបានធ្វើបុណ្យឧទ្ទិសកុសលជូនដល់បុព្វការីចាប៉ីជើងចាស់ ដែលបានធ្វើមរណៈកាលទៅ។ « ខ្ញុំត្រេកអរណាស់ ដែលមានឱកាសបានចូលរួមធ្វើបុណ្យជាមួយអ្នកចាប៉ីដទៃទៀតនៅទីនេះ បានទាំងជួបជុំអ្នកចាប៉ីធ្វើបុណ្យឧទ្ទិសកុសលជូនបុព្វបុរសដើម »។ នេះជាការលើកឡើងរបស់ព្រឹទ្ធាចារ្យ ឯ យិន។
លោកព្រឹទ្ធាចារ្យចាប៉ិដងវែង អ៊ិន សាវុន វ័យ៧៧ឆ្នាំ
ព្រឹទ្ធាចារ្យ អ៊ិន សាវុន ដែលបានឃើញអ្នកចាប៉ីចូលរួមកម្មវិធីរំឭកគុណគ្រូនេះ ចាត់ទុកជាសញ្ញាវិជ្ជមាន មួយ នៃការជួយរក្សានូវកេរ្តិ៍ដំណែលមរតកចាប៉ីដងវែង។ ព្រឹទ្ធាចារ្យ អ៊ិន សាវុន បានបញ្ជាក់ថា៖« សកម្មភាពថ្ងៃនេះសញ្ញាដែលបានបញ្ជាក់ថា ខ្ញុំនិងអ្នកចាប៉ីគ្រប់រូបមិនបានបំភ្លេចគ្រូដើមរបស់យើងឡើយ ហើយនូវតែរំឭក និងចូលរួមថែរក្សាកេរ្តិ៍ដំណែលមួយនេះបន្តទៅទៀត »។
នៅថ្ងៃកាន់បិណ្ឌទី១នេះ ក្រុមសហគមន៍ចាប៉ីអមតៈ និងអ្នកស្រលាញ់ចាប៉ីមកពីគ្រប់មជ្ឈដ្ឋាន បានរៀបចំគ្រឿងឧបភោគបរិភោគដូចជា ស្លាដក ភេសជ្ជៈនិងចង្ហាន់មួយចំនួន ដើម្បីប្រគេនព្រះសង្ឃ ដើម្បីបង្សុកូលជូនព្រឹទ្ធាចារ្យចាប៉ីដងវែងគ្រប់ជំនាន់ ក្នុងពិធីរំឭកគុណគ្រូ នៅវត្តនាគវន្ត។ក្នុងកម្មវិធីនោះមានសិល្បៈករ សិល្បៈការនីចាប៉ីចាស់ក្មេងចូលរួមប្រមាណជា ២០រូប ភាគច្រើនជាសិស្សចាប៉ីជំនាន់ក្រោយ ។
ប្រធានសហគន៍ចាប៉ីអមតៈ និងអ្នកស្នេហាសិល្បៈចាប៉ីដងវែងទាំងអស់ នឹងកំណត់ប្រារព្វកម្មវិធីនេះទៀត នៅឆ្នាំក្រោយ៕
Tag:
កម្មវិធី
រំឭកគុណ
បុព្វការី
សិល្បៈ
បុរាណ
ចាប៉ី
ព្រឹទ្ធាចារ្យ
© រក្សាសិទ្ធិដោយ thmeythmey.com