ទម្លាប់រៃអង្គាសវេនបិណ្ឌ បង្ហាញពីសាមគ្គីភាពរបស់អ្នកភូមិព្រែកដាច់ និងភូមិព្រែកតូច ខេត្តកណ្ដាល

ជាតិ

សង្គមជាតិ

ទម្លាប់រៃអង្គាសវេនបិណ្ឌ បង្ហាញពីសាមគ្គីភាពរបស់អ្នកភូមិព្រែកដាច់ និងភូមិព្រែកតូច ខេត្តកណ្ដាល

14, Sep 2020 , 9:19 pm

រូបភាព

ដោយ៖ ប៉ូ សុភា

ទម្លាប់ដើររៃអង្គាស ប្រាក់ អង្ករ អុស និងរបស់របរផ្សេងៗតាមវេនបិណ្ឌនីមួយៗក្នុងរដូវកាន់បិណ្ឌ ជាប្រពៃណីប្រចាំភូមិព្រែកដាច់ និងភូមិព្រែកតូច ក្នុងស្រុកលើកដែក ខេត្តកណ្ដាល ។ ទម្លាប់នេះបានបង្ហាញពីទំនាក់ទំនងយ៉ាងជិតស្និតប្រកបដោយការអធ្យាស្រ័យ និងសាមគ្គីភាពរបស់អ្នកភូមិ ដើម្បីចូលរួមអបអរកម្មវិធីបុណ្យប្រពៃណីជាតិ។

ជារៀងរាល់ឆ្នាំក្នុងរដូវកាន់បិណ្ឌ និងភ្ជុំបិណ្ឌប្រជាពលរដ្ឋតាមក្រុមវេនបិណ្ឌក្នុងភូមិព្រែដាច់ ឃុំព្រែកដាច់ក្នុងស្រុកលើកដែក ខេត្តកណ្តាល តែងមានទម្លាប់ដើររៃអង្គាស គ្រឿងឧបភោគ និងបរិភោគដូចជា ប្រាក់ អង្ករ ទៀនធូប បន្លែ ផ្លែឈើ អុស ស្នូលពោត ពីពុទ្ធបរិស័ទតាមវេនក្នុងភូមិ ដើម្បីជួយផ្គត់ផ្គង់ដល់ដំណើរការកាន់បិណ្ឌ។

លោក យន រឹន ជាគណៈកម្មការវេនបិណ្ឌ នៅក្នុងមជ្ឈមណ្ឌលវិបស្សនាធុរៈទួលអង្កាញ់ ក្នុងភូមិព្រែកដាច់ថា ជាទម្លាប់ធម្មតា ក្រុមគណៈកម្មការតែងរួមគ្នាជាក្រុម ក្នុងការរៃអង្គាស៣ថ្ងៃមុន រៀងរាល់ឆ្នាំមក។ « វេនខ្ញុំកាន់បិណ្ឌ ដូចនេះយើងប្រជុំក្រុមគណៈកម្មការរៃអង្កាស៣ថ្ងៃមុន ដូច្នេះក្រុមវេនបិណ្ឌ មានតាៗដើររៃមុន រីឯក្រុមក្មេងៗល្ងាចនេះនឹងរួមគ្នាដើររៃអង្កាសអុស និងស្នូលពោត សម្រាប់កម្មវិធីនៅថ្ងៃស្អែក »។

យុវជន ម៉ន វិឆិត វ័យ២០ឆ្នាំ ជាយុវជនម្នាក់ដែលចូលរួមក្នុងការរៃអង្គាស អុស និងស្នូលពោតតាមក្រុមវេណរបស់ខ្លួន នៅវត្តទួលអង្កាញ់បាននិយាយថា ទម្លាប់វៃអង្គាសបានជួយឲ្យអ្នកភូមិមានទំនាក់ទំនងល្អនឹងគ្នា ។ម្យ៉ាងវិញទៀត សកម្មភាពទាំងនេះបានបង្ហាញឱ្យឃើញពីវប្បធម៌ចេះចែករំលែកគ្នារបស់អ្នកភូមិផងដែរ ។ « ដល់វេនបិណ្ឌរបស់ក្រុមខ្ញុំរាល់ឆ្នាំ ក្រុមយុវវ័យពួកខ្ញុំតែងតែហៅគ្នាដើររៃអុស ស្នូលពោត យកទៅដាក់នៅវត្តរាល់ឆ្នាំ »។

ចំណែកឯភូមិព្រែកតូច ឃុំព្រែកតូច ស្រុកលើកដែកឯណោះវិញ ក៏ធ្វើពិធីវេនដាក់បិណ្ឌនេះដូចគ្នាដែរ។ព្រឹទ្ធាចារ្យ នី ណយ រស់នៅក្នុងភូមិព្រែកតូច ឃុំព្រែកតូច ពោលថា ទម្លាប់រៃអង្គាសនេះ បានបង្ហាញពីទំនាក់ទំនងសាមគ្គីភាព ដ៏ស្និតស្នាលរបស់ពលរដ្ឋ ក្នុងការរួមគ្នាផ្ដួចផ្ដើមប្រារព្ធកម្មពិធីបុណ្យកាន់បិណ្ឌ និងភ្ជុំបិណ្ឌ។

លោកព្រឹទ្ធាចារ្យ វ័យ៧៤ឆ្នាំខាងលើនិយាយថា ៖« បើគិតពីការរៃអង្គាសនេះ ខ្ញុំមិនដឹងមានតាំងពីពេលណាទេ ព្រោះចាប់ពីដឹងក្តីមក ខ្ញុំបានឃើញឪពុកម្តាយ និងចាស់ៗតែងតែធ្វើតតគ្នារៀងមក »។

លោកព្រឹទ្ធាចារ្យ នី ណយ បានដំណើរពីការរៃអង្គាសថា តាំងពីដើមមកគេចែកគណៈកម្មការរៃអង្គាសជាពីក្រុមគឺ ក្រុមលោកតាចាស់ៗ ដើររៃបច្ច័យ អង្ករ ព្រមទាំងគ្រឿងអភោគ និងបរិភោគ និងមួយក្រុមទៀត គឺក្រុមយុវជនវ័យកណ្តាល និងក្មេងៗដើររៃអុស ធ្យូង និងស្នូលពោតតាមភូមិ។

បើតាមលោកចៅអធិកាវត្តឥន្និមិត្ត ព្រះនាម ណយ ចាន់រ៉ា រៀងរាលឆ្នាំនៅរដូវកាលដាក់បិណ្ឌ និងភ្ជុំបិណ្ឌក្នុងរយៈពេល១៥ថ្ងៃនេះ តែងមានពុទ្ធបរិស័ទចំណុះជើងវត្តជិតឆ្ងាយតាមវេនបិណ្ឌចូលរួមពួតដៃសាមគ្គីគ្នា រៃអង្គាសពីគ្នាបន្តិចបន្តួច ដើម្បីចូលរួមប្រារព្ធកម្មវិធីកាន់បិណ្ឌឱ្យមានដំណើរការរលូន ។

សកម្មភាពចូលរួមគ្នាធ្វើការជាក្រុមរបស់ក្រុមវេននីមួយៗនេះហើយដែលអាចបញ្ជាក់ថា ពលរដ្ឋក្នុងភូមិព្រែកដាច់ចេះជួយចែករំលែក ដើម្បីសាមគ្គីក្នុងការសម្រេចគោលដៅធ្វើបុណ្យរួមរបស់ពួកគេ ។នេះជាសង្ឃដិការភិក្ខុ ណយ ចាន់រ៉ា។

ក្រៅពីភូមិទាំងពីរនេះ ក៏មានភូមិផ្សេងៗទៀតនៅក្នុងខេត្តកណ្ដាលនេះ អនុវត្តដូចគ្នាដែរ៕