ជាតិ
សង្គមជាតិ
×![]()
ដោយ៖ ប៉ូ សុភា
ថ្ងៃកាន់បិណ្ឌ និងភ្ជុំបិណ្ឌ ព្រះសង្ឃនិងអាចារ្យ វត្តនាគវន្ត និងវត្តសំពៅមាស បានរៀបចំអាហារចែកឱ្យពុទ្ធបរិស័ទដែលមានជីវភាពខ្វះខាតនៅជិតៗវត្ត តាមមន្ទីពេទ្យ និងមណ្ឌលកុមារកំព្រាជាដើម ។ ព្រះចៅអធិការ វត្ត មានសង្ឃដិការថា ការបែងចែកអាហាររបស់វត្តដល់អ្នកខ្សត់ខ្សោយជីវភាពនេះ ក្នុងគោលបំណងជួយដល់ដោះស្រាយការលំបាកពួកគេ។ ជាពិសេសមិនឱ្យមានករណីខ្ជះខ្ជាយអាហារនៅវត្ត ក្នុងថ្ងៃបុណ្យភ្ជុំ។
នៅម៉ោងប្រមាណជា ១២ថ្ងៃត្រង់ ក្រុមគណៈកម្មការវត្តនាគវន្ត រួមជាមួយចៅសង្កាត់ខណ្ឌទួលគោកបានរៀបចំវេចខ្ចប់បាយ សម្ល (ស្ងោរ ឆា ចៀន អាំង) និងបង្អែមជាកញ្ចប់ៗដើម្បីយកទៅចែកជូនចាស់ជរា ក្មេងៗ ជនអនាថាតាមដងផ្លូវ និងមណ្ឌលកុមារកំព្រាកុលាបទី៤នៅក្នុងខណ្ឌទួលគោក។
ព្រះបវរមុនី ងិន យីម អនុគណខណ្ឌទួលគោក និងជាព្រះចៅអធិការវត្តនាគវន្ត មានសង្ឃដិការថា នៅក្នុងវត្តពេលថ្ងៃបុណ្យទានតែងអាហារសម្បូរជាងថ្ងៃធម្មតា ដូច្នេះសង្ឃ និងគណៈកម្មការបានរៀបចំរួចជាស្រេច ដើម្បីបែងចែកតាមគោលដៅ។ « ក្នុងថ្ងៃបុណ្យអាហារសម្បូរណាស់ ដូច្នេះអាចារ្យបានចែកឱ្យក្មេងៗ និងចាស់ជរាចំណុះជើងវត្ត នឹងនៅសល់ប៉ុន្មានគណៈកម្មការបានសហការជាមួយចៅសង្កាត់ចាត់ចែងបន្តចែកដល់ក្រុមសន្តិសុខ អ្នកអនាម័យ និងមួយចំនួនទៀត ឆ្លៀតយកចែកទៅមណ្ឌលកុមាកំព្រាដែលត្រូវការជំនួយអាហារ »។
ព្រះបវរមុនី ងិន យីម ព្រះជន្ម ៥៨ព្រះវស្សា មានសង្ឃដិការបន្តថា អាហារដែលពុទ្ធបរិស័ទយកមកប្រគេនព្រះសង្ឃក្នុងថ្ងៃបុណ្យមិនសល់ទេ ព្រោះវត្តបានរៀបចំបែងចែកអាហារទាំងនេះ មិនឱ្យនៅសល់ខូចនោះឡើយ។ « ចង្ហាន់ញាតិញោមប្រគេនមកអាត្មា មិនដែលនៅសល់ ដោយសារក្រោយការប្រើប្រាស់ក្នុងវត្ត ព្រះសង្ឃនិងអាចារ្យរួមនឹងចៅសង្កាត់ខណ្ឌទួលគោក បានរួមសហការគ្នាបែងចែកអាហារទាំងនោះបានយ៉ាងល្អតាមគោលដៅដូចជា អាចារ្យចែកអាហារនៅនឹងវត្ត រីឯខាងចៅសង្កាត់ចែកក្នុងខណ្ឌនិងនៅតាមមណ្ឌលកុមារកំព្រាជាដើម »។ នេះជាការបញ្ជាក់របស់របស់ព្រះចៅអធិការវត្តនាគវន្ត។
ឈរនៅមុខសាលាឆាន់ក្នុងវត្តនាគវន្តអ្នកស្រី ហេង វ៉ានី មានវ័យ៣១ឆ្នាំជាអ្នកជួលផ្ទះជាប់របងវត្តនាគវន្ត បានទទួលអាហារពីវត្តនាគវ័ន្ត មិនដែលអាក់ខានឡើយ។ « ឱ្យតែថ្ងៃបុណ្យខ្ញុំនិងក្មេងៗដទៃទៀតតែងមកឈរចាំយកអាហារនៅទីនេះ ព្រោះក្រោយពីចង្ហាន់ថ្ងៃត្រង់ព្រះសង្ឃនិងគណៈកម្មការនឹងចែកអាហារឱ្យពួកយើងយកទៅបរិភោគហើយ »។ នេះជាការបញ្ជាក់របស់អ្នកស្រី វ៉ានី។
លោក ថា ចាន់ថន ជាមន្ត្រីជំនួយការណ៍សាធារណៈ ក្នុងខណ្ឌទួលគោកមានប្រសាសន៍ថា ក្នុងវត្តនាគវន្តចៅអធិការ និងអាចារ្យវត្តនេះរៀបចំបានយ៉ាងល្អ នៅក្នុងថ្ងៃបុណ្យមិនដែលមានអាហារសល់ទេ។ លោក បានបញ្ជាក់ដូច្នេះ៖« នៅក្នុងថ្ងៃមានបុណ្យទាននៅវត្តនេះ មិនចាំបាច់ភ័យថាមានអាហារសល់ទេ ព្រោះឱ្យតែដល់ម៉ោងមានអ្នកភូមិនៅក្បែរនេះនាំគ្នាមកយកហើយ។ ម្យ៉ាងវិញទៀតបើមានអាហារច្រើនដូចជាថ្ងៃកាន់បិណ្ឌ ព្រះចៅអធិការវត្តនេះបានរៀបចំធុងជ័រធំៗទុកដាក់ម្ហូបអាហារបន្ថែម យកទៅចែកបន្តដល់មណ្ឌលកុមារកំព្រានៅក្នុងខណ្ឌ »។
ព្រះចៅអធិការ ងិន យីមមានសង្ឃដិការបន្តថាគណៈកម្មការវត្តរៀបបង្កើតគណៈកម្មការបែងចែកអាហារនេះឡើងក្នុងគោលបំណងរក្សាឱ្យបាននូវអនាម័យ និងមិនឱ្យកើតមានករណីខ្ជៈខ្ជាយអាហារក្នុងបរិវេណវត្ត»។
មិនខុសពីវត្តនាគវ័ន្តឡើយ វត្តសំពៅមាស ឯណេះវិញ ក៏រៀបចំបែងចែកអាហារក្នុងថ្ងៃកាន់បិណ្ឌចែកដល់ពុទ្ធបរិស័ទផងដែរ។ ចាប់ផ្តើមពីបិណ្ឌទី១ មក ព្រះសង្ឃនឹងគណៈកម្មការវត្ត បានរៀបអាហារជាកញ្ចប់ចែកទៅអ្នកខ្វះខាតនៅជិតវត្ត អ្នកធាក់ស៊ីក្លូរ និងពលរដ្ឋមួយចំនួន ដែលសម្រាកព្យាបាលតាមមន្ទីពេទ្យសម្តេចឪ និងមន្ទីពេទ្យគន្ធបុប្ផាជាដើម។
ព្រះចៅអធិការវត្តសំពៅមាសព្រះនាម ព្រះមង្គលសត្ថា កង ណាម៉ានី មានសង្ឃដិការថា ការបែងចែកអាហារនេះ ដើម្បីគ្រប់គ្រងម្ហូបអាហារដែលមានលើសសេចក្តីត្រូវការរបស់វត្ត ព្រមទាំងឆ្លៀតឱកាសបានចែកទានបន្តផង។ « ដ្បិតពួកគាត់ទទួលបានអាហារពីវត្តបន្តិចបន្តួចក្តី ប៉ុន្តែអាហារទាំងនោះពិតជាមានអត្ថន័យណាស់សម្រាប់អ្នកចែកទាន។ ម្យ៉ាងវិញទៀតក្នុងនាមអាត្មាជាព្រះចៅអធិការវត្ត ពិតជាមិនចង់ឱ្យមានអាហារសល់ក្នុងថ្ងៃបុណ្យ ដោយសារសង្ឃនិងគណៈកម្មការវត្តគ្មានលទ្ធភាពគ្រប់គ្រងនោះទេ។ នេះជាសង្ឃដិការរបស់ព្រះចៅអធិការវត្តសំពៅ៕
Tag:
អាហារ
ជរា
មណ្ឌល
កុមារកំព្រា
© រក្សាសិទ្ធិដោយ thmeythmey.com
