ស្ថានបេសកកម្មអចិន្ត្រៃយ៍កម្ពុជាប្រចាំនៅទីស្នាក់ការអង្គការសហប្រជាជាតិ ក្នុងទីក្រុងហ្សឺណែវ ប្រទេសស្វីស បានចេញសេចក្តីថ្លែងការណ៍ តបមកអ្នកនាំពាក្យនៃការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំនៅកម្ពុជា (OHCHR) ដែលបានចេញកំណត់ហេតុសង្ខេប ស្តីពីការចាប់ក្រុមយុវជននិងក្រុមសកម្មជនជាហូរហែ ក្នុងមួយរយៈកាលចុងក្រោយនេះ។
តំណាងកម្ពុជា ចាត់ទុកការវាយតម្លៃក្នុងកំណត់ហេតុនេះ ដែលរិះគន់រដ្ឋាភិបាលកម្ពុជា ថាជាការសន្និដ្ឋានខុសឆ្គងនិងនាំឲ្យមានការភាន់ច្រឡំ មកលើការអនុវត្តច្បាប់នៅកម្ពុជា។ តំណាងកម្ពុជា និយាយល្អពីកម្ពុជាថា៖«ប្រទេសកម្ពុជា ពុំអនុញ្ញាតឲ្យមានការចាប់ខ្លួនតាមអំពើចិត្តនោះឡើយ។ មន្ត្រីអនុវត្តច្បាប់រូបណា ដែលមានកំហុសឆ្គងនិងបំពានច្បាប់ ត្រូវតែទទួលទណ្ឌកម្ម។ មានឧទាហរណ៍ជាច្រើន អំពីការដាក់ទោសទណ្ឌលើមន្ត្រី ប្រព្រឹត្តខុស នាពេលកន្លងមក»។
តំណាងកម្ពុជា រំលេចទិដ្ឋភាពវិជ្ជមានទៀតថា អង្គការក្រៅរដ្ឋាភិបាលនិងអ្នកការពារសិទ្ធិមនុស្ស កំពុងដំណើរការដោយសេរីនៅកម្ពុជា និងត្រូវបានលើកទឹកចិត្តឲ្យចូលរួមអភិវឌ្ឍជាតិ។ តំណាងកម្ពុជា បន្ថែមថា មានតែអង្គការនិងបុគ្គលបំពានច្បាប់ប៉ុណ្ណោះ ដែលត្រូវហាមឃាត់។
បរិយាយពីចំណុចល្អៗរបស់រដ្ឋាភិបាលកម្ពុជារួចហើយ តំណាងកម្ពុជា ក៏ក្រើនរំលឹកថា ការិយាល័យឧត្តមស្នងការអង្គការសហប្រជាជាតិ មានកាតព្វកិច្ចគោរពអធិបតេយ្យនិងដែនសមត្ថកិច្ចរបស់រដ្ឋជាម្ចាស់ផ្ទះ។
តាមរយៈកំណត់ហេតុ កាលពីថ្ងៃទី១១ ខែកញ្ញា ឆ្នាំ២០២០ អ្នកនាំពាក្យនៃការិយាល័យឧត្តមស្នងការអង្គការសហប្រជាជាតិ បានវាយតម្លៃក្នុងន័យអវិជ្ជមានដូច្នេះថា៖«ស្ថានភាពនាពេលបច្ចុប្បន្ននេះ បង្ហាញឲ្យយើងកាន់តែឃើញនូវការមិនអត់ឱនរបស់រដ្ឋាភិបាល ចំពោះគំនិតផ្ទុយពីខ្លួន និងការគាបសង្កត់ទៅលើសិទ្ធិសេរីភាពក្នុងការបញ្ចេញមតិ ការជួបជុំដោយសន្តិវិធី និងការចងក្រងសមាគម...»។
ក្រៅពីការរិះគន់ ការិយាល័យឧត្តមស្នងការអង្គការសហប្រជាជាតិ តាមរយៈអ្នកនាំពាក្យរបស់ខ្លួន បានអំពាវនាវដល់រដ្ឋាភិបាលកម្ពុជា ឲ្យដោះលែងសកម្មជននិងយុវជន ដែលត្រូវបានឃុំខ្លួន ជាបន្ទាន់និងគ្មានលក្ខខណ្ឌ និងស្នើឲ្យបញ្ចប់ការបំភិតបំភ័យទៅលើអង្គការសង្គមស៊ីវិល។ បន្ថែមពីនេះ ការិយាល័យឧត្តមស្នងការអង្គការសហប្រជាជាតិ អំពាវនាវដល់កម្លាំសន្តិសុខ បញ្ឈប់ការប្រើកម្លាំងហួសប្រមាណលើអ្នកតវ៉ា។
អ្នកស្រី រ៉ូ ណាស្មីត អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកឃ្លាំមើលសិទ្ធិមនុស្សនៅកម្ពុជា បានបង្ហាញក្តីបារម្ភចំពោះការចាប់យុវជននិងសកម្មទាំងនោះ។ អ្នកស្រី លើកទឹកចិត្តដល់អាជ្ញាធរកម្ពុជា ឲ្យគោរពសិទ្ធិបញ្ចេញមតិនិងការជួបជុំ។ អ្នកស្រី សរសេរលើបណ្តាញសង្គមថា៖«ខ្ញុំ កំពុងតាមដានព្រឹត្តិការណ៍ទាំងនេះយ៉ាងដិតដល់ នៅក្នុងប្រទេសកម្ពុជា»។
អង្គការជាតិ-អន្តរជាតិនានា ក៏ចូលរួមស្នើឲ្យដោះលែងយុវជននិងសកម្មជន ដែលត្រូវចាប់ខ្លួនទាំងនោះដែរ។ ប៉ុន្តែ ការឈឺឆ្អាលរបស់អង្គការជាតិ-អន្តរជាតិទាំងនោះ ហាក់គ្មានឥទ្ធិពលលើរដ្ឋាភិបាលកម្ពុជាឡើយ ដោយអ្នកជាប់ឃុំ នៅតែបន្តជាប់ឃុំដដែល។
យុវជនយុវតីជាង១០នាក់ហើយ ដែលត្រូវចាប់ខ្លួនជាបន្តបន្ទាប់ រួមមាន អតីតព្រះសង្ឃ កើត សារាយ យុវជន មាន ព្រហ្មមុនី យុវជន ហ៊ុន វណ្ណៈ យុវជន ថា ឡាវី យុវជន ថុន រដ្ឋា យុវជន មួង សុភ័ក្ត្រ យុវតី ឈឿ ដារាវី យុវតី សូ មេត្តា យុវតី ស កន្និកា យុវតី ឡុង គន្ធា និង យុវតី ភួន កែវរស្មី ជាដើម។ អតីតព្រះសង្ឃ និងយុវជនយុវតីទាំងនោះ ភាគច្រើនជាសមាជិកនៃក្រុមយុវជនខ្មែរថាវរៈនិងក្រុមយុវជនចលនាមាតាធម្មជាតិ។
លោក រ៉ុង ឈុន មេសហជីព និង លោក សួង សុភ័ណ្ឌ ប្រធានគណបក្សខ្មែរឈ្នះ ត្រូវចាប់ខ្លួនមុនយុវជនយុវតីខាងលើ។ អ្នកទាំង២ ត្រូវចាប់ខ្លួនពាក់ព័ន្ធនឹងរឿងព្រំដែន។ ឯយុវជយុវតី ត្រូវចាប់ខ្លួន ពាក់ព័ន្ធនឹងការចេញទាមទារឲ្យដោះលែងអ្នកទាំង២ និងទាមទារឲ្យមានយុត្តិធម៌សង្គម។ នៅមានមនុស្សមួយទៀត ដែលត្រូវចាប់ខ្លួន ដូចជា យុវជនជាអ្នកចម្រៀងរ៉េប ជា គន្ធា រួមទាំងមន្ត្រីអតីតគណបក្សប្រឆាំង២រូប គឺ លោក ជុំ វុទ្ធី និង លោក ឈួ ផេង៕