អាមេរិក នៅថ្ងៃទី២១ ខែកញ្ញា បានប្រកាសដាក់ទណ្ឌកម្មក្រោមក្របខណ្ឌអង្គការសហប្រជាជាតិ (UN) លើអ៊ឺរ៉ង់ ទោះជាសម្ព័ន្ធមិត្តរបស់ខ្លួន និងប្រទេសជាច្រើនមិនយល់ស្របក្ដី។ អាមេរិកអះអាងថា ទណ្ឌកម្មដែលខ្លួនដាក់នេះស្របតាមសេចក្តីសម្រេចរបស់ UN ។ នៅថ្ងៃដដែល អាមេរិកក៏ប្រកាសទណ្ឌកម្មលើប្រធានាធិបតីវ៉េណេស៊ុយអេឡា នីកូឡាស់ ម៉ាឌុយរ៉ូ ។
រដ្ឋបាលរបស់លោកប្រធានាធិបតីអាមេរិក ដូណាល់ ត្រាំ សម្រេចដាក់ទណ្ឌកម្មលើបុគ្គល និងស្ថាប័នចំនួន២៧របស់អ៊ីរ៉ង់ក្នុងនោះមានក្រសួងការពារជាតិ និងទីភ្នាក់ងារនុយក្លែអ៊ែរផង ដោយអះអាងថាបុគ្គល និងស្ថាប័នទាំងនេះស្ថិតក្រោមទណ្ឌកម្មរបស់អង្គការសហប្រជាជាតិ។ ប៉ុន្តែអង្គការសហប្រជាជាតិ ចេញមកបដិសេធវិញថា ការដាក់ទណ្ឌកម្មលើអ៊ីរ៉ង់ មិនអាស្រ័យទៅលើអាមេរិកឡើយ។
មុនសម្រេចចិត្តដាក់ទណ្ឌកម្មពេលនេះ អាមេរិក បានបញ្ចុះបញ្ចូលប្រទេសនានា ពិសេសហត្ថលេខីកិច្ចព្រមព្រៀងនុយក្លេអ៊ែរឆ្នាំ២០១៥ ឲ្យអនុវត្តវិធានការទណ្ឌកម្មដែលមានចែងក្នុងកិច្ចព្រមព្រៀងនេះ។ អង់គ្លេស បារាំង អាល្លឺម៉ង់ រុស្ស៊ី ចិន រួមទាំងសមាជិកក្រុមប្រឹក្សាសន្តិសុខឯទៀតមិនគាំទ្រឡើយ។ យ៉ាងណា រដ្ឋបាលលោក ត្រាំ នៅតែជម្នះចាត់វិធានការលើអ៊ីរ៉ង់ដដែល។
ក្នុងសេចក្ដីថ្លែងការណ៍ថ្ងៃទី២១ ខែកញ្ញា រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ លើកឡើងថា អាមេរិកអាចអនុវត្តទណ្ឌកម្មលើអ៊ីរ៉ង់បាន ដោយសារតែអ៊ីរ៉ង់បានរំលោភបម្រាមនាំចូលអាវុធរបស់អង្គការសហប្រជាជាតិ ក៏ដូចជាការវាយប្រហារលើទៅតាំងផលិតប្រេងរបស់អារ៉ាប៊ីសាអូឌីត។ ក្នុងការដាក់ទណ្ឌកម្មនេះ អាមេរិកបែជាប្រើសេចក្តីសម្រេចចិត្តរបស់អង្គការសហប្រជាជាតិ ដែលគាំទ្រកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ២០១៥ ទៅវិញ។
សូមបញ្ជាក់ថា កិច្ចព្រមព្រៀងនុយក្លេអ៊ែរអ៊ីរ៉ង់ អនុញ្ញាតឲ្យប្រទេសភាគីដាក់ទណ្ឌកម្មលើអ៊ីរ៉ង់វិញ បើសិនជារកឃើញថារំលោភនឹងកិច្ចព្រមព្រៀងនេះ។ ប៉ុន្តែអាមេរិក ក្រោមការដឹកនាំរបស់លោកត្រាំ បានដកខ្លួនចេញពីកិច្ចព្រមព្រៀង កាលពីឆ្នាំ២០១៨ទៅហើយ។ ត្រង់នេះ អាមេរិកប្រកែកថា ខ្លួនមានសិទ្ធិដាក់ទណ្ឌកម្មដដែល ព្រោះសេចក្ដីសម្រេចរបស់អង្គការសហប្រជាជាតិដែលគាំទ្រកិច្ចព្រមព្រៀងឆ្នាំ២០១៥ មានឈ្មោះអាមេរិកដែរ។
ទោះជាអាមេរិក ខំលើកហេតុផលយ៉ាងនេះក្តី សម្ព័ន្ធមិត្តអឺរ៉ុប ក៏ដូចជាចិន និងរុស្ស៊ីចេញមុខជំទាស់។ ចំណែកបណ្តាប្រទេសក្នុងក្រុមប្រឹក្សាសន្តិសុខ និយាយថា អាទិភាពនៅពេលនេះ គឺស្វែងរកដំណោះស្រាយសន្តិវិធីជាមួយនឹងកម្មវិធីនុយក្លេអ៊ែរអ៊ីរ៉ង់។
ក្រៅពីដាក់ទណ្ឌកម្មដោយទទឹងទិសដោយខ្លួនឯង ប្រមុខការបរទេសអាមេរិក បានសង្កត់ធ្ងន់ថា សមាជិកអង្គការសហប្រជាជាតិទាំងអស់ ក៏មានការទទួលខុសត្រូវក្នុងការអនុវត្តទណ្ឌកម្មប្រឆាំងអ៊ីរ៉ង់ដែរ។ លោកបញ្ជាក់ទៀតថា ក្នុងនោះក៏រួមបញ្ចូលអង់គ្លេស បារាំង និងអាល្លឺម៉ង់ ដែលអាមេរិករំពឹងថា នឹងអនុវត្តទណ្ឌកម្មខាងលើ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
ក្រៅពីទណ្ឌកម្មទាក់ទងកិច្ចព្រមព្រៀងឆ្នាំ២០១៥ អាមេរិក ក៏នៅតែចចេស ចង់ពន្យារបម្រាមជួញដូរអាវុធជាមួយអ៊ីរ៉ង់ ដែលនឹងផុតរលត់ទៅនៅថ្ងៃទី១៨ ខែតុលាខាងមុខ បើទោះបីជាក្រុមប្រឹក្សាសន្តិសុខបោះឆ្នោតជំទាស់លើការពន្យារពេលក្តី។ គេរំពឹងថាអាមេរិក នឹងដាក់ទណ្ឌកម្មឯកតោភាគី លើប្រទេសដែលរកស៊ីអាវុធជាមួយអ៊ីរ៉ង់។
ក្រៅពីអ៊ីរ៉ង់ អាមេរិក ក៏ដាក់ទណ្ឌកម្មបន្ថែមទៅលើប្រធានាធិបតីវ៉េណេស៊ុយអេឡា នីកូឡាស់ ម៉ាឌុយរ៉ូ ផងដែរ។ ក្រសួងការបរទេសអាមេរិក លើកឡើងថា លោក ម៉ាឌុយរ៉ូ កំពុងបង្កើនកិច្ចសហប្រតិបត្តិការជាមួយអ៊ីរ៉ង់ក្នុងវិស័យប្រេង ក៏ដូចជាវិស័យការពារជាតិ។ បើតាមលោក ប៉ុមប៉េអូ ជិត២ឆ្នាំមកហើយដែលមន្ត្រីពុករលួយរបស់អ៊ីរ៉ង់ បានធ្វើការជាមួយរបបមិនស្របច្បាប់នៅវេណេស៊ុយអេឡា ដោយមិនអើពើពីបម្រាមនាំចូលអាវុធរបស់អង្គការសហប្រជាជាតិ៕