COVID-19
អន្តរជាតិ
ប្រធានាធិបតីអាមេរិក ដូណាល់ ត្រាំ (AFP)
×![]()
ប្រធានាធិបតីអាមេរិក ដូណាល់ ត្រាំ ជាថ្មីម្ដងទៀត បានវាយតម្លៃខ្ពស់លើវិធានការគ្រប់គ្រងវិបត្តិជំងឺ COVID-19 ដែលបច្ចុប្បន្នប្រជាជនអាមេរិក២០ម៉ឺននាក់អស់ជីវិតដោយសារជំងឺនេះ។ លោកក៏បានព្យាករថា វ៉ាក់សាំងប្រឆាំងជំងឺ COVID-19 នឹងមានឲ្យប្រើប្រាស់ក្នុងពេលប៉ុន្មានសប្ដាហ៍ខាងមុខនេះ។ 
ក្នុងកិច្ចសម្ភាសជាមួយទូរទស្សន៍អាមេរិក Fox នៅថ្ងៃទី ២១ ខែកញ្ញា លោក ដូណាល់ ត្រាំ គូសបញ្ជាក់ថា សហរដ្ឋអាមេរិក នឹងទទួលជោគជ័យឆាប់ៗនេះក្នុងការប្រយុទ្ធប្រឆាំងជំងឺរាតត្បាតសកល COVID-19 ទោះជាមាន ឬគ្មានវ៉ាក់សាំងក៏ដោយក្តី។
លោកប្រធានាធិបតី អះអាងបន្តថា៖«ពួកគេស្អប់នៅពេលខ្ញុំនិយាយបែបនេះ តែនេះជារឿងដែលនឹងកើតឡើងចៀសមិនផុត។ យើងបានធ្វើការងារយ៉ាងល្អអស្ចារ្យ»។ សម្រាប់លោកត្រាំ សម្រាប់កិច្ចការទំនាក់ទំនងសាធារណៈ លោកឲ្យពិន្ទុខ្លួនឯង «D» តែសម្រាប់កិច្ចការប្រឆាំង COVID-19 លោកឲ្យពិន្ទុខ្លួនឯងដល់ទៅ «A+» ឯណោះ។
និយាយដល់រឿងវ៉ាក់សាំងប្រឆាំង COVID-19 វិញ ប្រធានាធិបតីវ័យ៧៤ឆ្នាំរូបនេះ បានព្យាករទុកថានឹងមានឲ្យប្រើប្រាស់ក្នុងពេលឆាប់ៗខាងមុខ ពោលគឺប្រហែលជាចុងខែតុលានេះឯង។ យ៉ាងណាមិញ ការអះអាងរបស់លោកត្រាំនេះ គឺផ្ទុយពីការវាយតម្លៃរបស់មន្ត្រីសុខភាពសាធារណៈកំពូលរបស់រដ្ឋបាលលោក ដែលទទួលបន្ទុកការអភិវឌ្ឍវ៉ាក់សាំង លោក Moncef Slaoui ។ លោក Slaoui ធ្លាប់បានអះអាងថា វ៉ាក់សាំង COVID-19 មិនទំនងជាត្រូវអនុម័តបានឡើយនាដើមខែវិច្ឆិកាខាងមុខ។
នេះពុំមែនជាលើកទីមួយឡើយដែលលោកប្រធានាធិបតីនិយាយលើកសរសើរចំពោះការដឹកនាំរបស់លោកក្នុងពេលមានវិបត្តិសុខភាពសាធារណៈនេះ។ កាលពីខែមីនាកន្លងទៅ លោក ក៏ធ្លាប់ឲ្យពិន្ទុខ្លួនឯង ១០/១០ ចំពោះការឆ្លើយតបរបស់រដ្ឋបាលលោកប្រឆាំងជំងឺ COVID-19 ផងដែរ ដោយកាលនោះជំងឺនេះ កំពុងរាតត្បាតយ៉ាងលឿនរហ័សក្នុងសហរដ្ឋអាមេរិក៕
Tag:
សហរដ្ឋអាមេរិក
ដូណាល់ ត្រាំ
COVID-19
© រក្សាសិទ្ធិដោយ thmeythmey.com
