គណៈកម្មាធិការជាតិបណ្តុះបណ្តាល អនុម័តកញ្ចប់ស្តង់ដា ៦វិស័យដែលមានជាង៣០មុខរបរ

ជាតិ

គណៈកម្មាធិការជាតិបណ្តុះបណ្តាល អនុម័តកញ្ចប់ស្តង់ដា ៦វិស័យដែលមានជាង៣០មុខរបរ

22, Sep 2020 , 9:59 pm

រូបភាព

លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានគណៈកម្មាធិការជាតិបណ្តុះបណ្តាល ថ្លែងនៅក្នុងកិច្ចប្រជុំគណៈកម្មាធិការជាតិបណ្តុះបណ្តាលលើទី១០ នៅថ្ងៃទី២២កញ្ញា ឆ្នាំ២០២០។ រូបថត៖ ហ្វេសប៊ុកក្រសួងការងារ

ដោយ: អ៊ូ សុខមាន (OU Sokmean)

ភ្នំពេញ៖ គណៈកម្មាធិការជាតិបណ្តុះបណ្តាល (National Training Board, NTB) បានអនុម័តលើកញ្ចប់ស្តង់ដារបណ្តុះបណ្តាល៦វិស័យផ្សេងគ្នា ដែលមានមុខរបរការងារចំនួន៣៣ និងលិខិតបទដ្ឋានគតិយុត្តសម្រាប់គាំទ្រ និងអនុវត្តក្នុងវិស័យអប់រំបណ្តុះបណ្តាលបច្ចេកទេស និងវិជ្ជាជីវៈ(TVET)។ នេះបើយោងតាមក្រសួងការងារ និងបណ្តុះបណ្តាវិជ្ជាជីវៈ។

វិស័យទាំង៦ ដែលគណៈកម្មាធិការជាតិបណ្តុះបណ្តាល អនុម័តយល់ព្រមលើកញ្ចប់ស្តង់ដាបណ្តុះបណ្តាល ក្នុងវិស័យTechnical and Vocational Education and Training(TVET)នោះមាន វិស័យសំណង់ មាន៨មុខរបរ, វិស័យមេកានិក (អនុវិស័យរថយន្ត) មាន៧មុខរបរ, វិស័យអគ្គិសនី និងថាមពល មាន៥មុខរបរ, វិស័យធុរកិច្ច និងព័ត៌មានវិទ្យា មាន៤មុខរបរ, វិស័យកម្មន្តសាល មាន៧មុខរបរ និងវិស័យបរិក្ខារត្រជាក់-កំដៅ មាន២មុខរបរ។

ក្រសួងការងារបានបញ្ជាក់ថា ការអនុម័តកញ្ចប់ស្តង់ដារបណ្តុះបណ្តាលចំនួន៦វិស័យ ក្នុងវិស័យTVET គឺសម្រាប់គាំទ្រដល់ការអនុវត្តក្របខណ្ឌគុណវុឌ្ឍិជាតិកម្ពុជា(CQF) ឱ្យផ្សារភ្ជាប់ទៅនឹងក្របខ័ណ្ឌគុណវុឌ្ឍិយោងអាស៊ាន(AQRF) ក៏ដូចជាការគាំទ្រប្រព័ន្ធវាយតម្លៃផ្អែកលើសមត្ថភាព និងការផ្តល់គុណវុឌ្ឍិសម្រាប់កម្ពុជា(CBACS) ដើម្បីលើកកម្ពស់និងជំរុញការអភិវឌ្ឍវិស័យTVET ឱ្យឆ្លើយតបទៅនឹងសេចក្តីត្រូវការរបស់សង្គមសេដ្ឋកិច្ចកម្ពុជា បច្ចុប្បន្ន។

បើតាមលោក អ៊ិត សំហេង រដ្ឋមន្ត្រីក្រសួងការងារ និងជាប្រធានគណៈកម្មាធិការជាតិបណ្តុះបណ្តាល ថ្លែង នៅក្នុងកិច្ចប្រជុំគណៈកម្មាធិការជាតិបណ្តុះបណ្តាលលើទី១០ នៅថ្ងៃទី២២កញ្ញា ឆ្នាំ២០២០ កន្លងមកគណៈកម្មាធិការជាតិបណ្តុះបណ្តាល ធ្លាប់បានអនុម័តដាក់ឱ្យប្រើប្រាស់ និងអនុវត្តគោលនយោបាយមួយចំនួនសម្រាប់អនុវត្តនៅក្នុងវិស័យTVET និងកញ្ចប់ស្តង់ដាបណ្តុះបណ្តាលតាមវិស័យអាទិភាពលើមុខរបរដែលទីផ្សារកំពុងមានតម្រូវការខ្ពស់នាពេលបច្ចុប្បន្ន និងទៅអនាគតជាច្រើនរួចមកហើយ។

លោកបានបញ្ជាក់ថា កញ្ចប់ស្តង់ដាបណ្តុះបណ្តាលទាំងនេះ គឺជាឯកសារគោលក្នុងការកំណត់សមត្ថភាពសំខាន់ៗ ដូចជាសមត្ថភាពមូលដ្ឋាន ឬសមត្ថភាពគាំទ្រការបំពេញការងារ (ជំនាញទន់) និងសមត្ថភាពស្នូល (ជំនាញបច្ចេកទេសបំពេញការងារ)ជាដើម។

សូមេរម្លឹកថា កិច្ចប្រជុំរបស់គណៈកម្មាធិការជាតិបណ្តុះបណ្តាលលើកទី៩ ដែលប្រព្រឹត្តឡើងកាលពី ខែតុលា ឆ្នាំ២០១៧ បានអនុម័តលើគោលនយោបាយមួយចំនួន សម្រាប់អនុវត្តនៅក្នុងវិស័យTVET។ ក្នុងនោះមាន ប្រព័ន្ធវាយតម្លៃផ្អែកលើសមត្ថភាព និងផ្តល់គុណវុឌ្ឍិសម្រាប់កម្ពុជា (Competency Based Assessment and Certification System, CBACS), គោលនយោយបាយស្តីពីការវាយតម្លៃផ្អែកលើសមត្ថភាព និងផ្តល់គុណវុឌ្ឍិ (Policy on Assessment and Certification, PAC), គោលនយោបាយស្តីពីកម្មសិក្សា (Policy on Internship, PI) ដែលជាឯកសារសំខាន់ៗគាំទ្រដល់ការអនុវត្តក្របខ័ណ្ឌគុណវុឌ្ឍិជាតិកម្ពុជា (Cambodian Qualification Framework, CQF) និងកញ្ចប់ស្តង់ដាបណ្តុះបណ្តាលមួយចំនួនទៀត៕