ជាតិ
សង្គមជាតិ
អគ្គស្នងការរង ៖ ប្រធានការិយាល័យប្រឆាំងភេរវកម្ម នឹងទទួលពិន័យចំពោះការប្រើប្រាស់អាវុធខុសច្បាប់ លោក ភិនរ៉ា បានដកកាំភ្លើង ខណៈពេលអង្គុយជុំគ្នាក្នុងហាងគុយទាវ។ (រូបពីវីដេអូដែលចែកចាយបន្តគ្នាលើបណ្ដាញសង្គម)
× ភ្នំពេញ៖ លោក ឆាយ គឹមខឿន អ្នកនាំពាក្យអគ្គស្នងការនគរបាលជាតិអះអាងថា អង្គភាពជំនាញនឹងកោះហៅ លោក ថ្លាង ភិនរ៉ា ប្រធានការិយាល័យប្រឆាំងភេរវកម្ម ដើម្បីសាកសួរជុំវិញការដកកាំភ្លើងគំរាមថៅកែហាងគុយទាវអង្គរជុំនៅទួលគោក។
លោក ឆាយ គឹមខឿន ថ្លែងប្រាប់សារព័ត៌មានថ្មីៗតាមទូរស័ព្ទនៅព្រឹកថ្ងៃទី២៣កញ្ញានេះថា នៅពេលលោក ថ្លាង ភិនរ៉ា មកបំភ្លឺរឿងក្ដី ទោះបីជាមានហេតុផលណាក៏ដោយ អង្គភាពជំនាញនឹងដាក់ពិន័យចំពោះការប្រើប្រាស់អាវុធខុសច្បាប់។
«ក្រោយការបំភ្លឺ ទោះមានហេតុផលយ៉ាងណាក្ដីក៏ត្រូវទទួលពិន័យដែរ។ គាត់មានសិទ្ធិប្រើប្រាស់អាវុធ ប៉ុន្តែគាត់ប្រើប្រាស់ខុសពេលវេលា ខុសវិន័យអង្គភាព ដាច់ខាតត្រូវទទួលពិន័យហើយ ទទួលពិន័យកម្រិតណាគឺអាស្រ័យលើការស្រាវជ្រាវរបស់អង្គភាពជំនាញ»។ នេះបើតាមការលើកឡើងរបស់លោក ឆាយ គឹមខឿន ដោយបញ្ជាក់ថា ការធ្វើបែបនេះ គឺដើម្បីពង្រឹងវិន័យក្នុងអង្គភាព។
ប្រសិនបើការសាកសួរលោក ថ្លាង ភិនរ៉ា រកឃើញថាមានកំហុសមែន ហើយភាគីទាំងពីរសម្របសម្រួលគ្នាមិនត្រូវ សំណុំរឿងនេះនឹងត្រូវបញ្ជូនទៅតុលាការ។ នេះបើតាមការបញ្ជាក់របស់លោក ឆាយ គឹមខឿន។
បើតាមវីដេអូចែកចាយលើបណ្ដាញសង្គម លោក ថ្លាង ភិនរ៉ា បានដកកាំភ្លើងចេញមកក្រៅ ខណៈពេលអង្គុយជុំគ្នាក្នុងហាងគុយទាវអង្គរជុំ។ ក្រោយកើតហេតុនេះ គេក៏ឃើញមានលិខិតបណ្ដឹងរបស់ជនរងគ្រោះឈ្មោះ ជុយ សុខហេង ថៅកែហាងគុយទាវអង្គរជុំ បានដាក់ពាក្យបណ្ដឹងទៅ ក្រសួងមហាផ្ទៃ សាលាដំបូងរាជធានីភ្នំពេញ និងគណៈមេធាវី។ ក្នុងលិខិតបណ្ដឹងដែលចែកចាយបន្តគ្នាក្នុងបណ្ដាញសង្គមនេះ ជនរងគ្រោះបានទាមទារជំងឺចិត្ត១០ម៉ឺនដុល្លារ និងស្នើឲ្យផ្តន្ទាទោសលើមន្ត្រីរូបនេះ៕
© រក្សាសិទ្ធិដោយ thmeythmey.com