អន្តរជាតិ
ស៊ី ប្រកាសប្រាប់ពិភពលោកថា ចិននឹងឈប់បំភាយឧស្ម័នកាបូនិចលើសកម្រិតត្រឹមឆ្នាំ ២០៦០
×
ដោយ ៖កង ម៉េងហុង
ប្រទេសដែលបញ្ចេញឧស្ម័នកាបូនិចធំបំផុតទីពីរ ចិនប្តេជ្ញាថាខ្លួននឹងឈានឆ្ពោះ ទៅប្រែក្លាយជាប្រទេសដែលបំបាត់បាននូវការបំភាយឧស្ម័នកាបូនិចលើសកម្រិតទៅក្នុងបរិយាកាសនៅត្រឹមឆ្នាំ ២០៦០។ នេះជាការប្តេជ្ញាចិត្តថ្មីមួយក្នុងការឈានទៅដឹកនាំពិភពលោកដើម្បីប្រយុទ្ធប្រឆាំងនឹងការប្រែប្រួលអាកាសធាតុសាកល។
ប្រធានាធិបតីចិនលោក ស៊ី ជីនភីង នៅក្នុងមហាសន្និបាតអង្គការសហប្រជាជាតិកាលពីថ្ងៃអង្គារទី ២២ ខែកញ្ញា បានប្តេជ្ញាជាផ្លូវការថា ចិននឹងប្រែក្លាយខ្លួនជាប្រទេសដែលមិនបញ្ចេញឧស្ម័នផ្ទះកញ្ចក់លើសកម្រិតទៅកាន់បរិយាកាសក្នុងរយៈពេល ៤០ឆ្នាំខាងមុខ។
បើតាមទីភ្នាក់ងារព័ត៌មាន AFP ប្រមុខរដ្ឋចិនរូបនេះលើកឡើងពីគោលដៅច្បាស់លាស់របស់ខ្លួនក្នុងការកាត់បន្ថយការបញ្ចេញឧស្ម័នផ្ទះកញ្ចក់ ស្របពេលចិនជាប់ឈ្មោះជាប្រទេសដែលនាំមុខគេខាងបំពុលបរិយាកាសពោលគឺ មួយភាគបួនឧស្ម័នផ្ទះកញ្ចក់នៅលើពិភពលោក គឺចេញពីចិន។ អ្វីដែលសំខាន់ ចិនក៏រងការស្តីបន្ទោសខ្លាំងដែរ ចំពោះការរួមចំណែកបំពុលបរិយាកាសដែលជាហេតុផលចម្បងដែលធ្វើឲ្យកម្តៅផែនដីកើនឡើងយ៉ាងឆាប់រហ័សនោះ។
«យើងព្យាយាមធ្វើឲ្យការបំភាយឧស្ម័នកាបូនិចកើនដល់កម្រិតខ្ពស់បំផុតត្រឹមឆ្នាំ ២០៣០ ហើយសម្រេចអោយបានបញ្ឈប់ការបញ្ចេញឧស្ម័នលើសកម្រិតនៅត្រឹមឆ្នាំ ២០៦០»។ មេដឹកនាំចិនរូបនេះបានលើកឡើងដូច្នេះ។
នៅក្នុងសុន្ទរកថាដដែលនោះ លោក ស៊ី ក៏បានប្រកាសគាំទ្រជាថ្មីចំពោះកិច្ចព្រមព្រៀងស្តីពីអាកាសធាតុទីក្រុងប៉ារីសឆ្នាំ ២០១៥ ហើយលោកក៏បានអំពាវនាវឱ្យពិភពលោកផ្តោតលើការកាត់បន្ថយផលប៉ះពាល់ចំពោះបរិស្ថាន ខណៈពេលដែលពិភពលោកកំពុងងើបឡើងវិញពីវិបត្តិកូវីត ១៩។
តាមពិតទៅ ក្រោមកិច្ចព្រមព្រៀងទីក្រុងប៉ារីស ចិនបញ្ជាក់ថា ការបំភាយឧស្ម័នកាបូនិចរបស់ខ្លួនឈានកម្រិតខ្ពស់បំផុតនៅត្រឹមឆ្នាំ ២០៣០។ ប៉ុន្តែទោះជាបែបនេះក្តី សហភាពអឺរ៉ុបព្យាយាមជំរុញឲ្យមហាអំណាចអាស៊ីមួយនេះបង្កើនមហិច្ឆតារបស់ខ្លួនឲ្យខ្ពស់ជាងនេះ ដោយធ្វើឲ្យកម្រិតខ្ពស់បំផុតនៃការបំភាយឧស្ម័នកាបូនិចកើតឡើងត្រឹមឆ្នាំ ២០២៥ វិញ។ នេះក៏ដោយហេតុថា ពិភពលោកកំពុងស្ថិតក្នុងស្ថានភាពយឺតយ៉ាវក្នុងការឈានទៅប្រឆាំងនឹងការប្រែប្រួលអាកាសធាតុសាកលតាមរយៈការកាត់បន្ថយឧស្ម័នកាបូនិចនេះ។
ស្របពេលជាមួយគ្នានោះដែរ លោក ស៊ី បានបន្តសុន្ទរកថារបស់ខ្លួនដោយស្នើឲ្យប្រទេសទាំងអស់បន្តការអភិវឌ្ឍប្រកបដោយការច្នៃប្រឌិត ធានាធ្វើយ៉ាងណាបន្ថយផល់ប៉ះពាល់លើបរិស្ថានឲ្យកាន់តែតិចតួចបំផុត និងជំរុញការបើកចំហសម្រាប់ការអភិវឌ្ឍទាំងអស់គ្នា៕
Tag:
ប្រែប្រួលអាកាសធាតុ
កាបូនឌីអុកស៊ីត
© រក្សាសិទ្ធិដោយ thmeythmey.com