លោក Frank Lampard និយាយថាការធ្វើបាន៣គ្រាប់របស់ Kai Havertz ដើម្បីជួយ Chelsea យកឈ្នះ Barnsley ៦-០ ក្នុងការប្រកួតពានរង្វាន់ EFL Cup នឹងក្លាយជាជំនួបដំបូងដ៏អស្ចារ្យបំផុតសម្រាប់កីឡាករចំណូលថ្មីរូបនេះ។
នេះជាគ្រាប់បាល់ដំបូង និង hat-trick របស់ខ្សែបម្រើអន្តរជាតិអាល្លឺម៉ង់ ចាប់តាំងពីរូបគេបានផ្លាស់ពី Bayer Leverkusen ទៅទឹកដី Stamford Bridge ក្នុងតម្លៃ ៧១ លានផោន (៩០លានដុល្លារអាមេរិក) ដែលជាតម្លៃថ្លៃជាងគេសម្រាប់ក្លិបនៅរដូវកាលនេះ។
នាជំនួប EFL Cup ជុំទី៤ នៅយប់ថ្ងៃទី២៣ ខែកញ្ញា ៦គ្រាប់របស់ក្រុមតោខៀវ ស៊ុតបញ្ចូលទីដោយកីឡាករ៤រូប។ Tammy Abraham ធ្វើបានគ្រាប់ដំបូង ហើយ Kai Havertz ស៊ុត៣គ្រាប់ម្នាក់ឯង ឯ Ross Barkley និង Olivier Giroud រកបានម្នាក់១គ្រាប់។
អ្នកចាត់ការទូទៅ Lampard បានសរសើរ Havertz មិនដាច់ពីមាត់ឡើយ បន្ទាប់ពីរូបគេធ្វើបានដល់ទៅ៣គ្រាប់សម្រាប់ការបង្ហាញខ្លួនដំបូងនេះ។ លោកថា៖ «ខ្ញុំពិតជាសប្បាយចិត្តនឹង Havertz ណាស់។ វាជាអ្វីគ្រប់យ៉ាងដែលខ្ញុំចង់បាននៅប្រកួតដំបូងសម្រាប់គាត់យប់នេះ។ យប់នេះជាលំហាត់ប្រាណដ៏អស្ចារ្យសម្រាប់គាត់ និងដើម្បីមើលពីរបៀបលេងក៏ដូចជាការគ្រប់គ្រងបាល់របស់គាត់»។
អំឡុងពេលទីផ្សារដោះដូររដូវកាលនេះ មហាសេដ្ឋីរុស្ស៊ីលោក Roman Abramovich ដែលជាម្ចាស់ Chelsea បានចំណាយប្រាក់ជាង ២០០ លានផោន (ជិត៣០០លានដុល្លារអាមេរិក) រួចហើយ ដើម្បីទិញចូលកីឡាករ៤រូបដែលរួមមាន Timo Werner, Kai Havertz, Hakim Ziyech និង Ben Chilwell ។ ដោយឡែក Thiago Silva និង Malang Sarr បានផ្លាស់ទៅកាន់ Stamford Bridge ដោយគ្មានតម្លៃខ្លួន។
យ៉ាងណាក៏ដោយ កាលពីជំនួបសប្តាហ៍ទី២ក្នុងក្របខណ្ឌ Premier League ក្រុមរបស់លោក Lampard បានបរាជ័យក្រោមថ្វីជើង Liverpool ក្នុងលទ្ធផល ២-០ ខណៈក្រុមលោក Jurgen Klopp ទើបចំណាយតិចតួចប៉ុណ្ណោះក្នុងការទិញកីឡាករចូលរដូវកាល ២០២០-២១នេះ។
សម្រាប់លទ្ធផលការប្រកួត EFL Cup គូដទៃទៀត៖
Fulham ២ – ០ Sheffield Wednesday
Millwall ០ – ២ Burnley
Preston North End ០ – ២ Brighton & Hove Albion
Stoke City ១ – ០ Gillingham
Fleetwood Town ២ – ៥ Everton
Leicester City ០ – ២ Arsenal
Morecambe ០ – ៧ Newcastle United